Qarabağda aparılan antiterror tədbirləri qətiyyətli siyasətin, diplomatik mövqeyin və hərbi gücün göstəricisidir

Bakı:

26 °C

57 %

10 m/s

AZ RU EN

Ana səhifə / YAP xəbərləri / Qarabağda aparılan antiterror tədbirləri qətiyyətli siyasətin, diplomatik mövqeyin və hərbi gücün göstəricisidir

Qarabağda aparılan antiterror tədbirləri qətiyyətli siyasətin, diplomatik mövqeyin və hərbi gücün göstəricisidir

17.09.2025 [17:30]

Azərbaycanın Qarabağ bölgəsində həyata keçirilmiş lokal xarakterli antiterror tədbirləri ölkəmizin son illərdə apardığı qətiyyətli siyasətin, diplomatik mövqeyinin və hərbi gücünün bariz göstəricisidir. Bu tədbirlər təsadüfi deyil, illərlə davam edən erməni təxribatlarının, üçtərəfli bəyanatın pozulmasının və sülh çağırışlarına məhəl qoyulmamasının nəticəsi idi. Son aylarda Azərbaycan Ordusunun mövqelərinin atəşə tutulması, ərazilərimizin sistemli şəkildə minalanması, yeni səngər və istehkamların qurulması bölgədə gərginliyin süni şəkildə artırıldığını göstərirdi. Ermənistanın bu addımları açıq şəkildə üçtərəfli bəyanatın ruhuna və mətninə zidd idi. Bu, həm də İrəvanın sülh prosesini pozmaq niyyətini ifşa edirdi.

Sentyabrın 19-da baş verən mina partlayışları Azərbaycan vətəndaşlarının və hərbçilərinin həyatına son qoydu. Bu fakt göstərdi ki, Ermənistan yalnız hərbi deyil, həm də terrorçu metodlardan istifadə edir. Dövlətimizin adekvat addımları isə həm hərbi, həm də siyasi zərurət idi. 2020-ci il 10 noyabr bəyanatına görə erməni silahlı birləşmələri Qarabağı tərk etməli idi. Lakin onların bölgədə qalması regional təhlükəsizliyə real təhdid yaradırdı. Azərbaycan bu reallığı dünyaya çatdıraraq göstərdi ki, bölgədə uzunmüddətli sülh yalnız qanunsuz hərbi qüvvələrin çıxarılması ilə mümkündür. Antiterror əməliyyatlarının məqsədi sadəcə hərbi obyektlərin zərərsizləşdirilməsi deyildi. Burada əsas məram işğaldan azad olunmuş torpaqlarda yaşayan əhalinin təhlükəsizliyini təmin etmək, bərpa-quruculuq işlərinə zəmanət vermək və dövlətin konstitusion quruluşunu bərpa etmək idi. Azərbaycanın addımı beynəlxalq hüquq normalarına tam uyğun idi. Əməliyyat zamanı Azərbaycan Ordusu yüksək dəqiqlikli silahlardan istifadə edərək yalnız legitim hərbi hədəfləri məhv etdi. Mülki infrastruktur və yaşayış məntəqələri toxunulmaz qaldı. Bu, Ordumuzun həm peşəkarlığını, həm də humanist yanaşmasını bir daha sübut etdi. Azərbaycan həm də mülki əhalini SMS bildirişləri, səsgücləndiricilər və vərəqələrlə xəbərdar etdi, humanitar dəhlizlər yaratdı. Əməliyyat barədə Rusiya sülhməramlı kontingenti və Türkiyə-Rusiya Birgə Monitorinq Mərkəzi məlumatlandırıldı. Bu fakt Azərbaycanın şəffaf siyasətini və regional tərəfdaşlığa sadiqliyini göstərdi. Antiterror tədbirləri zamanı ölkədə fəaliyyət göstərən 23 siyasi partiyanın birgə bəyanatla cənab Prezident İlham Əliyevin ətrafında sıx birləşməsi milli həmrəyliyin parlaq nümunəsi oldu. Bu, həm də beynəlxalq ictimaiyyətə ünvanlanan güclü mesaj idi – Azərbaycan vahid xalq və dövlət kimi hərəkət edir. Milli maraqlara qarşı çıxan bəzi partiyaların imtina mövqeyi onların siyasi mahiyyətini bir daha göstərdi. Əksinə, Qərbi Azərbaycan İcması fəal çıxış edərək Ermənistanın təxribatlarını pislədi və beynəlxalq ictimaiyyəti ədalətə çağırdı. Bu da Azərbaycanın haqlı mövqeyinə əlavə dəstək oldu. Azərbaycan dəfələrlə Qarabağda yaşayan erməni sakinlərini reinteqrasiya məsələlərini müzakirə etməyə dəvət edib. Lakin bu çağırışlar cavabsız qalıb. Dövlətimizin mövqeyi dəyişməzdir: silahların təhvil verilməsi, qanunsuz rejimin buraxılması və Azərbaycanın konstitusion quruluşuna hörmət. Əks halda, antiterror tədbirləri sona qədər davam etdiriləcək.

Qarabağda həyata keçirilmiş lokal antiterror tədbirləri Azərbaycanın hərbi gücünü, siyasi iradəsini və diplomatik qətiyyətini bir daha nümayiş etdirdi. Cənab Prezident İlham Əliyevin dediyi kimi, “Azərbaycan güclü dövlət kimi yalnız öz maraqlarını deyil, həm də bölgədə sülhün təmin olunmasını hədəfləyir.” Bu əməliyyat təkcə hərbi qələbə deyil, həm də regionda sülh və sabitliyin bərqərar olunması istiqamətində atılmış tarixi addım oldu.

David İbramxəlilov,
YAP Qusar rayon təşkilatının sədri

Paylaş:

Baxılıb: 617 dəfə