Qubadlının azad edilməsi tarixi Qələbəmizi yaxınlaşdırdı

Bakı:

20 °C

52 %

4 m/s

Əlaqə

AZ RU EN

Ana səhifə / YAP xəbərləri / Qubadlının azad edilməsi tarixi Qələbəmizi yaxınlaşdırdı

Qubadlının azad edilməsi tarixi Qələbəmizi yaxınlaşdırdı

24.10.2025 [23:47]

25 oktyabr tarixi Azərbaycanın hərb salnaməsinə qızıl hərflərlə yazılmış şanlı Qubadlı Şəhəri Günüdür. Müzəffər Ali Baş Komandan İlham Əliyevin rəhbərliyi ilə rəşadətli Azərbaycan Ordusu 2020-ci il Vətən müharibəsində 27 illik işğala son qoyaraq, məhz bu tarixdə Qubadlı şəhərini işğalçılardan azad etdi. Bu tarixi Qələbə, Azərbaycanın ərazi bütövlüyünün bərpasında mühüm strateji əhəmiyyətə malik oldu.

Qubadlı rayonu 1993-cü il avqustun 31-də Ermənistan silahlı qüvvələri tərəfindən işğal edilmişdi. İşğal nəticəsində rayonun 94 yaşayış məntəqəsi, on minlərlə vətəndaşımız doğma yurdlarından didərgin düşmüş, rayonda olan yaşayış evləri, inzibati binalar, sosial və mədəniyyət obyektləri, o cümlədən tarixi abidələr və məscidlər dağıdılmış, talan edilmişdi. Otuz ilə yaxın müddətdə Qubadlı və onun ətrafı dağıntıya məruz qalmış, qanunsuz məskunlaşma halları baş vermişdi.

2020-ci il sentyabrın 27-də başlayan Vətən müharibəsi zamanı Cəbrayıl və Zəngilan istiqamətlərində aparılan uğurlu döyüş əməliyyatlarından sonra Azərbaycan Ordusu Qubadlı rayonu ərazisinə daxil oldu. Şəhər və ona hakim olan strateji yüksəkliklər düşmənin güclü istehkamları ilə müdafiə olunsa da, Azərbaycan əsgəri misilsiz peşəkarlıq və fədakarlıq göstərdi. Bir neçə gün davam edən gərgin döyüşlərdən sonra, 25 oktyabr 2020-ci ildə Qubadlı şəhəri tamamilə işğaldan azad edildi. Şəhərin azad edilməsi, Laçın dəhlizinə nəzarətin güclənməsi və Şuşa istiqamətindəki əməliyyatların uğurla davam etdirilməsi baxımından mühüm hərbi-strateji əhəmiyyət daşıyırdı.

Azərbaycan Respublikası Prezidentinin 31 iyul 2023-cü il tarixli Sərəncamı ilə 25 oktyabr tarixi Qubadlı Şəhəri Günü kimi rəsmiləşdirilmişdir. Həmçinin, Vətən müharibəsində Qubadlının azad olunması uğrunda aparılmış döyüş əməliyyatlarında iştirak edərək şəxsi igidlik və şücaət nümayiş etdirmiş hərbi qulluqçular "Qubadlının azad olunmasına görə" medalı ilə təltif edilmişlər.

Hazırda Qubadlıda genişmiqyaslı quruculuq və bərpa işləri həyata keçirilir. "Ağıllı kənd" və "Ağıllı şəhər" konsepsiyaları əsasında inşaat işləri davam edir, yeni yol və infrastruktur layihələri icra olunur. Bütün bu işlər Qubadlı sakinlərinin doğma yurdlarına təhlükəsiz və ləyaqətli qayıdışını təmin etmək məqsədi daşıyır.

25 Oktyabr - Qubadlı Şəhəri Günü təkcə hərbi qələbənin deyil, həm də Azərbaycanın sarsılmaz iradəsinin, milli birliyinin və bərpa edilən ədalətin təntənəsidir. Qubadlı həm də Şərqi Zəngəzur iqtisadi rayonunun bərpası və inkişafında, eləcə də Zəngəzur dəhlizinin açılması perspektivlərində strateji rol oynayan əsas məntəqələrdən biridir.

Lalə İskəndərova,

YAP Qusar rayon təşkilatının fəal üzvü

Paylaş:

Baxılıb: 434 dəfə