Rəhbər vəzifədə çalışan hər bir şəxs, hər bir məmur təvazökar olmalıdır

Bakı:

1 °C

93 %

10 m/s

Əlaqə

AZ RU EN

Ana səhifə / YAP xəbərləri / Rəhbər vəzifədə çalışan hər bir şəxs, hər bir məmur təvazökar olmalıdır

Rəhbər vəzifədə çalışan hər bir şəxs, hər bir məmur təvazökar olmalıdır

14.11.2025 [18:21]

Azərbaycan Respublikasının Prezidenti İlham Əliyev 12 noyabr 2025-ci ildə Naxçıvan Muxtar Respublikasında Prezidentin yeni təyin olunmuş səlahiyyətli nümayəndəsini, eləcə də bir neçə rayonun icra hakimiyyətlərinə təyin olunan başçılarını qəbul edib. Qəbul zamanı çıxış edən dövlət başçısı vəzifəyə təyin olunmuş rəhbərlərə böyük etimad göstərildiyini diqqətə çatdıraraq, onların bu etimadı doğruldacaqlarına əminliyini ifadə etmişdir. “Siz öz işinizlə, əməyinizlə qarşıda duran vəzifələrin icrası üçün səylərinizi əsirgəməyəcəksiniz. Əlbəttə ki, böyük məsuliyyət böyük işlər tələb edir. İlk növbədə, mənim bütün tapşırıqlarımı yerinə yetirməlisiniz. Mən hər dəfə bölgələrə rəhbər vəzifələrə şəxsləri təyin edəndə verdiyim tapşırıqlar onlar üçün əsas iş prinsipləri olmalıdır — ilk növbədə, xalqa xidmət etmək, xalqla bir yerdə olmaq. Həyatda və məişətdə özü, eləcə də yaxın qohumları özlərini elə aparmalıdırlar ki, bizim ümumi işimizə heç bir irad tutulmasın. Təəssüf ki, bəzi hallarda məmurlar özlərini cəmiyyətdə düzgün apara bilmirlər, ifrat dərəcədə təkəbbürlülük göstərirlər, özlərini hamıdan üstün tutmağa çalışırlar və beləliklə, həm öz nüfuzlarını itirirlər, eyni zamanda dövlətimizə, dövlətin siyasətinə də ləkə vurmuş olurlar. Bununla yanaşı, bəzi hallarda korrupsiyaya və rüşvətxorluğa yol verirlər. Azərbaycan ictimaiyyəti yaxşı bilir ki, əyri yola gedən hər bir dövlət məmuru nəticədə məhkəmə və qanun qarşısında cavab verməli olur. Belə hallar, təəssüf ki, bu gün də mövcuddur. Ancaq o da cəmiyyət üçün tam aydındır ki, heç bir qanunsuz hərəkət nəticəsiz qalmayacaq. Ona görə sizdən tələbim odur ki, xoşagəlməz hallara qarşı ciddi mübarizə aparasınız, kadr siyasətində etibarlı, peşəkar və mənəvi cəhətdən təmiz şəxsləri seçəsiniz, rəhbərlik edəcəyiniz bölgələrdə öz işinizlə mənim seçimimin düzgün olduğunu sübut edəsiniz. Əks təqdirdə, əlbəttə ki, lazımi ölçülər götürüləcək.”

Prezident İlham Əliyev 22 illik fəaliyyəti dövründə xalqa verdiyi vədləri ardıcıl olaraq yerinə yetirib. Bu illər ərzində Azərbaycanın bütün sahələrdə sürətli inkişafı təmin olunub, vətəndaşların rifahı əhəmiyyətli dərəcədə yaxşılaşıb. Ölkənin siyasi və iqtisadi imkanları genişlənib, müasir ordu qurulub, Azərbaycanın beynəlxalq arenadakı mövqeləri möhkəmlənib. Bu gün regionda həyata keçirilən bütün beynəlxalq və irimiqyaslı layihələr Azərbaycanın fəal iştirakı və milli maraqlarının nəzərə alınması ilə reallaşır. Ən önəmlisi, Prezident İlham Əliyevin rəhbərliyi ilə Azərbaycanın ərazi bütövlüyü tam təmin olunub, Ulu Öndər Heydər Əliyevin torpaqlarımızın azad edilməsi ilə bağlı müqəddəs arzusu gerçəkləşib. Dövlət başçısı şəhid ailələrinə, müharibə iştirakçılarına və həssas əhali təbəqələrinə göstərilən qayğını daim diqqət mərkəzində saxlayır. Prezident şəhid ailələrinə mənzil və avtomobil açarlarını şəxsən təqdim edir, bu qayğını sadəcə vəzifə borcu deyil, həm də şərəf və mənəvi məsuliyyət kimi dəyərləndirir. Bu səmimi münasibət insanlarda sevinc, inam və qürur hissi doğurur. Ölkədə əldə edilən hər bir uğur vətəndaşların Prezident İlham Əliyevə olan etimadını daha da artırıb, milli həmrəyliyi gücləndirib. Təcrübə göstərir ki, yalnız əsl siyasi liderlik keyfiyyətlərinə malik olan şəxs xalqın və dövlətin maraqlarını qoruya, vətəndaşla daim yaxın ünsiyyətdə ola bilər. Əsl lider istənilən çətin vəziyyətdə vaxtında və adekvat qərarlar qəbul edir, xalqının yanında olur və onun rifahını təmin etməyə çalışır. Ümummilli Lider Heydər Əliyevin müəyyən etdiyi inkişaf strategiyasını uğurla davam etdirən Prezident İlham Əliyev bu tələblərə cavab verən, xalqın etimadını doğruldan, alternativsiz siyasi liderdir. Onun siyasətinin mərkəzində Azərbaycan vətəndaşı dayanır; qəbul etdiyi qərarlar və atdığı addımlar xalq tərəfindən yüksək qiymətləndirilir. Hər bir məmur öz vəzifəsini icra edərkən cənab Prezident İlham Əliyevin həyata keçirdiyi məqsədyönlü siyasəti və xalqa göstərdiyi yüksək xidmətləri özünə nümunə götürməli, dövlət başçısının verdiyi tapşırıqlara məsuliyyət və həssaslıqla yanaşmalı, xalqa layiqli xidmət göstərərək Prezidentin etimadını doğrultmalı və ölkəmizin davamlı inkişafına öz töhfəsini verməlidir.

Şamo Qasımov

Yeni Azərbaycan Partiyası Laçın rayon təşkilatının sədr müavini

Paylaş:

Baxılıb: 321 dəfə