Azərbaycan – Slovakiya münasibətlərinin inkişafında yeni mərhələ

Bakı:

26 °C

69 %

12 m/s

Əlaqə

AZ RU EN

Ana səhifə / YAP xəbərləri / Azərbaycan – Slovakiya münasibətlərinin inkişafında yeni mərhələ

Azərbaycan – Slovakiya münasibətlərinin inkişafında yeni mərhələ

10.12.2025 [15:03]

2025-ci il 8 dekabr tarixi Azərbaycan-Slovakiya münasibətlərində yeni mərhələnin başlanğıcı kimi yadda qaldı. Azərbaycan Respublikasının Prezidenti cənab İlham Əliyevin Slovakiyaya ilk rəsmi səfəri zamanı verdiyi bəyanat həm ikitərəfli əlaqələrin strateji səviyyəyə yüksəldiyini, həm də gələcək əməkdaşlığın dərin və sistemli şəkildə inkişaf etdiriləcəyini göstərdi. Bu səfər sadəcə diplomatik ziyarət olmaqla kifayətlənmədi - Avropa ilə Azərbaycan arasında enerji, nəqliyyat və texnologiya sahələrində yeni imkanlara qapı açdı və regional sabitlik, iqtisadi inteqrasiya baxımından xüsusi məna daşıdı.

Bu səfər yüksək protokol qaydalarına uyğun şəkildə qarşılanma mərasimi ilə başladı. Slovakiya Prezidenti cənab Peter Pelleqrini tərəfindən rəsmi olaraq qəbul edilən ölkə başçısı cənab İlham Əliyev fəxri qarovul dəstəsini salamladı, dövlət himnləri səsləndirildi və rəsmilər arasında təkbətək, daha sonra isə geniş tərkibdə görüşlər keçirildi. Bu mərasim göstərirdi ki, Slovakiya Azərbaycanla münasibətlərin genişləndirilməsinə xüsusi önəm verir və bu səfər iki ölkə arasında yeni diplomatik ənənənin başlanğıcıdır.

Azərbaycan Prezidentinin mətbuata bəyanatında münasibətlərin strateji xarakteri, əməkdaşlıq sahələri və gələcək planlar öz əksini tapmışdı. Dövlət başçısı vurğuladı ki, Azərbaycan və Slovakiya artıq dost ölkələr olmaqla yanaşı, rəsmi şəkildə strateji tərəfdaş statusuna yüksəlib. Bu, təkcə siyasi jest deyil, konkret əməkdaşlıq mexanizmləri, iqtisadi və siyasi hədəflər, uzunmüddətli əlaqə strategiyası deməkdir.

Səfər zamanı ən çox müzakirə edilən məsələlərdən biri enerji sahəsi oldu. Möhtərəm Prezident qeyd etdi ki, Azərbaycan artıq Slovakiyaya qaz tədarük edir və bu sahədə əməkdaşlıq genişlənməkdədir. Yeni qaz yataqlarının işlənməsi və resursların artırılması ilə gələcəkdə Slovakiyaya daha böyük həcmdə enerji göndərmək mümkündür. Bu, xüsusilə Avropada enerji təhlükəsizliyi məsələlərinin ön planda olduğu bir zamanda böyük əhəmiyyət daşıyır. Azərbaycan bu gün Avropanın 14 ölkəsinə qaz ixrac edir və bu əməkdaşlıq xəritəsində Slovakiyanın yeri sürətlə güclənir.

Nəqliyyat və logistika sahəsi də bəyanatın mühüm istiqamətlərindən biri oldu. Cənab İlham Əliyev Azərbaycanın Şərq ilə Qərb arasında mühüm tranzit qovşağı kimi rolunu vurğulayaraq, Slovakiya ilə bu sahədə birgə layihələrin həyata keçirilməsinin qaçılmaz olduğunu bildirdi. Orta Dəhliz üzrə daşımaların artırılması, dəmir yolu və avtomobil nəqliyyatı layihələrinin genişləndirilməsi, iki ölkə arasında mal və yük daşımalarının optimallaşdırılması gələcək əməkdaşlığın əsas sütunları kimi qeyd olundu.

Texnologiya və rəqəmsal iqtisadiyyat sahəsində də yeni əməkdaşlıq istiqamətləri vurğulandı. Cənab Prezident bildirdi ki, Azərbaycanın güclü enerji potensialı və sabit biznes mühiti böyük data mərkəzlərinin yaradılması üçün əlverişli şərait təmin edir. Slovakiya şirkətlərinin bu sahəyə investisiya marağı genişlənərsə, tərəflər rəqəmsal infrastrukturun inkişafı üzrə də strateji tərəfdaş ola bilərlər.

Cənab İlham Əliyev Slovakiyanın Azərbaycanın beynəlxalq müstəvidə mövqeyini anlayışla qarşıladığını, ədalətli yanaşma sərgilədiyini yüksək qiymətləndirdi. Bu, iki ölkə arasında yalnız iqtisadi deyil, siyasi dialoqun da güclü olduğunu göstərir. Cənab Prezident həmçinin Slovakiya Prezidentini Azərbaycana rəsmi səfərə dəvət etdi və bu səfərin gələn il baş tutmasının gözlənildiyini bildirdi.

Sonda onu qeyd etməliyik ki, möhtərəm Prezident cənab İlham Əliyevin Slovakiyada mətbuata verdiyi bəyanat təkcə ikitərəfli əməkdaşlığın hazırkı vəziyyətini deyil, həm də gələcək istiqamətlərini aydın şəkildə ortaya qoydu.

Bu səfər həm diplomatik, həm iqtisadi, həm də geosiyasi baxımdan əhəmiyyətli hadisə kimi qiymətləndirilir və Azərbaycan-Slovakiya münasibətlərinin inkişafında yeni bir mərhələ açır.

Rövşən Əhmədov

YAP Ağcabədi rayon təşkilatının sədri

Paylaş:

Baxılıb: 501 dəfə