Qalib Azərbaycanın müasir inkişaf modeli

Bakı:

15 °C

67 %

5 m/s

Əlaqə

AZ RU EN

Ana səhifə / YAP xəbərləri / Qalib Azərbaycanın müasir inkişaf modeli

Qalib Azərbaycanın müasir inkişaf modeli

24.12.2025 [17:51]

2003-cü il 15 oktyabr tarixində keçirilmiş prezident seçkiləri

Azərbaycan xalqının siyasi iradəsinin, strateji baxışının və gələcəyə yönəlmiş seçimlərinin bariz ifadəsi oldu. Seçicilərin mütləq əksəriyyətinin cənab İlham Əliyevə səs verməsi Ulu Öndər Heydər Əliyevin müəyyənləşdirdiyi dövlətçilik kursunun davamına verilən güclü ictimai dəstək idi. Azərbaycan xalqı bu seçimlə sabitliyin, inkişafın, təhlükəsizliyin və tərəqqinin alternativsiz olduğunu bütün dünyaya nümayiş etdirdi.

Heydər Əliyev siyasi məktəbinin ən layiqli davamçısı olan Prezident İlham Əliyev fəaliyyətə başladığı ilk gündən ölkənin uzunmüddətli və dayanıqlı inkişafını hədəfləyən ardıcıl və düşünülmüş siyasət həyata keçirdi. Demokratik, hüquqi dövlət quruculuğu prosesi dərinləşdirildi, iqtisadiyyatın şaxələndirilməsi prioritet istiqamətə çevrildi. Qeyri-neft sektorunun inkişafı, regionların sosial-iqtisadi potensialının gücləndirilməsi və rəqabətqabiliyyətli iqtisadi modelin formalaşdırılması məqsədilə mühüm qərarlar qəbul olundu.

Nəhəng infrastruktur layihələrinin icrası Azərbaycanın geoiqtisadi mövqeyini əhəmiyyətli dərəcədə möhkəmləndirdi. Bakı–Tbilisi–Ceyhan neft kəməri, Bakı–Tbilisi–Qars dəmir yolu, eləcə də Cənub Qaz Dəhlizi kimi strateji layihələr ölkəmizi Avrasiyanın əsas enerji və nəqliyyat qovşaqlarından birinə çevirdi. Trans-Anadolu və Trans-Adriatik qaz kəmərləri vasitəsilə Azərbaycan Avropanın enerji təhlükəsizliyinin təminatında etibarlı tərəfdaş statusunu daha da gücləndirdi.

Eyni zamanda, neft gəlirlərinin insan kapitalına yönəldilməsi siyasəti sosial sahədə mühüm nəticələr verdi. Minlərlə məktəbin inşası və əsaslı təmiri, müasir səhiyyə müəssisələrinin yaradılması, olimpiya idman komplekslərinin tikilməsi cəmiyyətin sosial rifahının yüksəldilməsinə xidmət etdi. Təhsil, səhiyyə və gənclər siyasəti dövlət strategiyasının əsas sütunlarından birinə çevrildi.

Azərbaycançılıq ideologiyası Prezident İlham Əliyevin siyasətinin mənəvi dayağı olaraq milli həmrəyliyi və ictimai birliyi daha da gücləndirdi. Azərbaycan tolerantlıq, multikulturalizm və mədəniyyətlərarası dialoq məkanı kimi beynəlxalq nüfuz qazandı, qlobal humanitar təşəbbüslərin fəal iştirakçısına çevrildi.

Prezident İlham Əliyevin uzaqgörən və prinsipial siyasətinin əsas məqsədi ölkəmizin hərtərəfli inkişafı ilə yanaşı, ərazi bütövlüyümüzün və suverenliyimizin tam təmin olunması idi. Uzun illər ərzində atılan bütün strateji addımlar Azərbaycanı tarixi Zəfərə doğru aparırdı. 2020-ci il sentyabrın 27-də başlayan və 44 gün davam edən Vətən müharibəsi Ali Baş Komandanın qətiyyəti, xalqın dəmir yumruq kimi birliyi və Azərbaycan Ordusunun gücü sayəsində möhtəşəm Qələbə ilə başa çatdı.

Bu Qələbə yalnız tarixi ədalətin bərpası deyil, həm də regionda yeni geosiyasi və geostrateji reallıqların formalaşması demək idi. Azərbaycan 2025-ci ildə artıq qalib dövlət, regionun aparıcı siyasi və iqtisadi gücü kimi çıxış edir. İşğaldan azad edilmiş ərazilərdə genişmiqyaslı bərpa və yenidənqurma işləri, “Böyük Qayıdış” proqramının ardıcıl icrası dövlət siyasətinin əsas prioritetlərindəndir.

Bu gün Prezident İlham Əliyevin rəhbərliyi ilə Azərbaycan yeni inkişaf mərhələsinə qədəm qoyur. Güclü dövlət, müasir iqtisadiyyat, sosial rifah və milli birlik üzərində qurulan bu strateji yol ölkəmizin gələcək nəsillər üçün daha qüdrətli, təhlükəsiz və firavan Azərbaycan kimi formalaşmasını təmin edir.

Fidan Hüseynova

YAP Quba rayon təşkilatının sədri

Paylaş:

Baxılıb: 614 dəfə