Dünya Azərbaycanlılarının Həmrəyliyi Gününün tarixi və milli ideoloji missiyası

Bakı:

24 °C

52 %

6 m/s

Əlaqə

AZ RU EN

Ana səhifə / YAP xəbərləri / Dünya Azərbaycanlılarının Həmrəyliyi Gününün tarixi və milli ideoloji missiyası

Dünya Azərbaycanlılarının Həmrəyliyi Gününün tarixi və milli ideoloji missiyası

26.12.2025 [16:12]

Bəzən millətlərin talelərində elə günlər olur ki, zamanın içindən çıxıb tarixin özünə çevrilir. 31 Dekabr – Dünya Azərbaycanlılarının Həmrəyliyi Günü məhz belə müqəddəs günlərdəndir. Bu günün bayram kimi qeyd edilməsi bir təsadüf, bir təqvim seçimi deyil. Millətin öz kimliyinə, öz varlığına, öz gücünə yazdığı bir şəhadətnamədir. Bu gün Azərbaycanın sərhədlərindən kənarda yaşayan milyonlarla soydaşımızın qəlbində yanan Vətən sevgisinin bayramıdır. Bu ideyanın yaranması isə özlüyündə böyük bir məktəbdir. O məktəbin müəllimi isə Ulu Öndər Heydər Əliyevdir. O, dünya azərbaycanlılarının həmrəyliyi anlayışını yalnız siyasi qərar kimi deyil, milli şüurun yenidən formalaşdırılması kimi ortaya qoydu. O illərdə sovet imperiyasının sərt ideoloji mühitində, qadağalar və məhdudiyyətlər arasında “Azərbaycan birliyi” kimi bir ideyanı irəli sürmək cəsarət tələb edirdi. Amma Heydər Əliyev bunu bacardı. Çünki o, millətin gələcəyini zamanın pərdələri arxasından görən nadir lider idi. Ulu Öndər deyirdi: “Harada yaşamasından asılı olmayaraq hər bir azərbaycanlının ürəyi Vətənlə döyünməlidir. Bu duyğu bizi bir millət edən ən böyük sərvətdir.” Bu düşüncə Dünya Azərbaycanlılarının Həmrəyliyi Gününün fəlsəfəsini müəyyənləşdirdi. 1997-ci ildə keçirilən Dünya Azərbaycanlılarının I Qurultayı isə bu ideyanı praktikaya çevirən tarixi hadisə oldu. İlk dəfə idi ki, dünyanın müxtəlif guşələrindən gəlmiş soydaşlarımız Bakıda bir araya gəlir və “Azərbaycançılıq” adlı böyük bir ideyanın siyasi gücə çevrilməsinin şahidi olurdu.

Tarixi ideyanın davamı isə cənab Prezident İlham Əliyevin siyasi iradəsi və qətiyyətli liderliyi ilə daha geniş miqyasda reallaşdı. XXI əsrdə həmrəylik ideyası təkcə mənəvi bağlılıq kimi deyil, dövlət gücünün strateji dayağı kimi dərk olunmağa başladı. Cənab Prezident İlham Əliyev bu dəyərin çağdaş mahiyyətini belə ifadə edib: “Azərbaycan gücləndikcə dünya azərbaycanlılarının birliyi də möhkəmlənir. Bizim birliyimiz Vətənə sevginin, milli kimliyə sədaqətin təcəssümüdür.” Diaspor siyasətinin inkişafı, xaricdə yaşayan azərbaycanlıların təşkilatlanması, onların hüquqlarının müdafiəsi, Azərbaycan həqiqətlərinin dünyaya çatdırılması artıq sistemli dövlət siyasətinə çevrilib. Xaricdə açılan Azərbaycan evləri, diaspor mərkəzləri, koordinasiya şuraları və mədəniyyət ocaqları milli-həmrəylik ideyasının rəsmi və institusional təcəssümüdür. Xüsusilə 44 günlük Vətən müharibəsi zamanı həmrəylik anlayışı özünün tarixi zirvəsinə qalxdı. Dünyanın hər yerindəki soydaşlarımız informasiya savaşının önündə dayanaraq, Azərbaycan ordusunun haqq işinə güclü dəstək verdilər. Bu, millətin birliyi idi. Bu, sözün ən təmiz mənasında həmrəylik idi. Cənab Prezident İlham Əliyev bu tarixi həmrəyliyi yüksək qiymətləndirmişdir: “Bizim qələbəmizin arxasında təkcə ordumuzun gücü yox, bütün xalqın birliyi dayanır.” 31 Dekabrın siyasi dəyəri isə vahid millətin qlobal mesajıdır. Bu günün ən mühüm siyasi mənası odur ki, Azərbaycan dövləti dünyanın hər yerində yaşayan 50 milyondan çox azərbaycanlının hamısının dövlətidir. Həmrəyliyin məhz 31 dekabrda qeyd olunmasının özü də mesajdır: Yeni ilə qədəm qoyarkən bütün azərbaycanlıların bir araya gəlməsi, taleyini, düşüncəsini, ruhunu eyni istiqamətə yönəltməsi kimi olduqca qiymətlidir. Bu bayram dünyanın dörd tərəfində yaşayan soydaşlarımıza deyir ki, siz tək deyilsiniz. Sizin yanınızda Azərbaycan dövləti var. Sizi birləşdirən tarix var, kök var, dil var, yaddaş var. Sizi birləşdirən Azərbaycan ideyası var. Bu ideya Ulu Öndər Heydər Əliyevin yaratdığı, cənab Prezident İlham Əliyevin isə yeni nəfəs verdiyi böyük mənəvi-siyasi sərvətdir. Diaspor hərəkatına gəldikdə deməliyəm ki, bu qlobal Azərbaycan varlığının əsas dayağıdır. Bu gün Azərbaycan diasporu dünyanın ən fəal, ən sürətlə inkişaf edən icmalarından biridir. Onlar mədəniyyətimizi qoruyur, dilimizi yaşadır, iş adamları birləşərək iqtisadi körpülər yaradır, alimlər, tələbələr, ziyalılar milli kimliyi hər yerdə təmsil edir. Diaspor təşkilatlarının fəaliyyəti Azərbaycanın beynəlxalq mövqeyinə əlavə güc qatır, informasiya savaşlarında sipərə çevrilir. Məhz buna görə həmrəylik yalnız bir günün bayramı deyil — bir millətin qlobal strategiyasıdır. Bu strategiyanın tarixi dayaq nöqtələri isə Ulu Öndər Heydər Əliyevin milli ideologiyası və cənab Prezident İlham Əliyevin müasir dövlətçilik modeli ilə müəyyənləşir. Beləliklə biz birliyik, biz Azərbaycana bağlılıqdan doğan gücük.

31 Dekabr – Dünya Azərbaycanlılarının Həmrəyliyi Günü bir daha sübut edir ki, Azərbaycan təkcə coğrafiya deyil — bir ruhdur, Azərbaycan təkcə sərhəd deyil — bir düstur, bir amal, bir dəyər sistemidir, Azərbaycan təkcə dövlət deyil — dünyanın hər tərəfində yaşayan milyonların qəlb çırpıntısıdır. Ulu Öndər Heydər Əliyevin yaratdığı, cənab Prezident İlham Əliyevin davam etdirdiyi bu ideya millətin həm bu günü, həm sabahı, həm də əbədi yoludur.

David İbramxəlilov,
YAP Qusar rayon təşkilatının sədri

Paylaş:

Baxılıb: 670 dəfə