Tariximizə qanla yazılmış qəhrəmanlıq səhifəsi

Bakı:

16 °C

94 %

3 m/s

Əlaqə

AZ RU EN

Ana səhifə / YAP xəbərləri / Tariximizə qanla yazılmış qəhrəmanlıq səhifəsi

Tariximizə qanla yazılmış qəhrəmanlıq səhifəsi

19.01.2026 [13:55]

1990-cı ilin 20 Yanvarı Azərbaycan xalqının yaddaşına ən faciəli, eyni zamanda ən şərəfli günlərdən biri kimi həkk olunmuşdur. Həmin gecə Sovet imperiyası öz varlığını qorumaq məqsədilə dinc Azərbaycan əhalisinə qarşı misli görünməmiş hərbi cinayət törətmiş, yüzlərlə günahsız insanı qətlə yetirmiş, minlərlə insanı yaralamışdır. Bu qanlı hadisə Azərbaycan xalqının azadlıq iradəsini sındıra bilməmiş, əksinə, milli azadlıq mübarizəsini daha da gücləndirmişdir.

20 Yanvar faciəsinə ilk prinsipial siyasi və hüquqi qiyməti verən şəxs ümummilli Liderimiz Heydər Əliyev olmuşdur. O, 1990-cı il yanvarın 21-də Moskvada, Azərbaycanın daimi nümayəndəliyində keçirdiyi brifinqdə Sovet rəhbərliyinin Bakıda törətdiyi bu qanlı cinayəti qətiyyətlə pisləmiş, dinc əhaliyə qarşı güc tətbiqini insanlığa qarşı cinayət adlandırmışdır. Ulu öndər Heydər Əliyev SSRİ rəhbərliyini bu faciəyə görə məsuliyyət daşımağa çağırmış və Azərbaycan xalqının haqq səsini bütün dünyaya çatdırmışdır. Bu cəsarətli mövqe həmin dövrdə böyük siyasi risklərə baxmayaraq, xalqın milli maraqlarının müdafiəsinin parlaq nümunəsi olmuşdur.

Ulu Öndər Heydər Əliyevin hakimiyyətə qayıdışından sonra 20 Yanvar hadisələrinə rəsmi siyasi və hüquqi qiymət verilmişdir. 1994-cü ildə Azərbaycan Respublikasının Milli Məclisinin qəbul etdiyi qərarla 20 Yanvar faciəsi Sovet imperiyasının Azərbaycana qarşı həyata keçirdiyi hərbi təcavüz və ağır cinayət kimi qiymətləndirilmişdir. Bu qərar tarixi ədalətin bərpası və şəhidlərin xatirəsinə ehtiram baxımından mühüm əhəmiyyət daşımışdır.

Azərbaycanın azadlığı və müstəqilliyi uğrunda şəhid olmuş 20 Yanvar qəhrəmanlarının xatirəsi bu gün dövlət səviyyəsində əbədiləşdirilmişdir. Bakı şəhərində yerləşən Şəhidlər Xiyabanı xalqımızın müqəddəs ziyarətgahına çevrilmiş, burada dəfn olunan şəhidlərin xatirəsi daim ehtiramla yad edilir. Hər il 20 Yanvar tarixində ölkə rəhbərliyi, ictimaiyyət nümayəndələri və minlərlə insan Şəhidlər Xiyabanını ziyarət edərək şəhidlərin ruhu qarşısında baş əyirlər. Eyni zamanda, ölkənin müxtəlif bölgələrində 20 Yanvar şəhidlərinin xatirəsinə ucaldılmış abidələr, adlarına verilmiş küçə və meydanlar, keçirilən anım tədbirləri onların qəhrəmanlığının unudulmadığını göstərir.

Prezident İlham Əliyev 20 Yanvar faciəsini Azərbaycan xalqının qəhrəmanlıq və şərəf salnaməsi kimi qiymətləndirmişdir. Dövlət başçısı 20 Yanvar şəhidlərinin Azərbaycanın müstəqilliyi və suverenliyi uğrunda canlarından keçmiş qəhrəmanlar olduğunu və onların fədakarlığının xalqımızın yaddaşında əbədi yaşayacağını vurğulamışdır. Prezident İlham Əliyev bildirmişdir ki, bu faciə Azərbaycan xalqının azadlıq əzmini sındıra bilməmiş, əksinə, müstəqil və güclü dövlət quruculuğunu sürətləndirmişdir. 20 Yanvar hadisələrində sağlamlığını itirən əlillərin sosial müdafiəsi, pensiya təminatı hər zaman Azərbaycan Prezidenti İlham Əliyevin diqqətindədir.

Nəticə etibarilə, 20 Yanvar faciəsi yalnız matəm günü deyil, həm də milli qürur və qəhrəmanlıq tariximizin mühüm mərhələsidir. Azərbaycan xalqı bu faciədən güc

alaraq öz müstəqilliyinə qovuşmuş, şəhidlərin müqəddəs xatirəsini daim uca tutmuşdur. 20 Yanvar şəhidləri xalqımızın yaddaşında əbədi yaşayacaq, onların azadlıq uğrunda göstərdikləri fədakarlıq gələcək nəsillər üçün əsl vətənpərvərlik nümunəsi olacaqdır.

Sahib Şükürov

YAP Göyçay rayon təşkilatının sədri

Paylaş:

Baxılıb: 209 dəfə