Ulu Öndər Heydər Əliyevin gənclər siyasəti – milli dövlət quruculuğunun ideoloji və institusional əsası

Bakı:

23 °C

58 %

3 m/s

AZ RU EN

Ana səhifə / YAP xəbərləri / Ulu Öndər Heydər Əliyevin gənclər siyasəti – milli dövlət quruculuğunun ideoloji və institusional əsası

Ulu Öndər Heydər Əliyevin gənclər siyasəti – milli dövlət quruculuğunun ideoloji və institusional əsası

02.02.2026 [19:15]

Ulu Öndər Heydər Əliyev gəncləri Azərbaycan dövlətçiliyinin gələcəyi kimi qiymətləndirirdi. Onun siyasi baxışlarında gənclər sadəcə yaş kateqoriyası deyil, milli iradənin, milli ruhun və müstəqil dövlətin əsas dayağı idi. Heydər Əliyev hesab edirdi ki, gənclər sağlam ideoloji düşüncəyə, güclü vətənpərvərlik hissinə və yüksək intellektual səviyyəyə malik olmalıdırlar. Məhz bu amillər müstəqil Azərbaycanın davamlı inkişafını təmin edə bilərdi.

1993-cü ildə xalqın tələbi ilə yenidən hakimiyyətə qayıdan Ulu Öndər ölkədə siyasi sabitliyi bərpa etdikdən sonra gənclər siyasətini dövlət siyasətinin əsas istiqamətlərindən birinə çevirdi. O dövrdə gənclərin problemləri sistemli şəkildə araşdırılmağa başlandı, onların təhsil, məşğulluq, sosial müdafiə və ictimai fəallıq imkanları genişləndirildi. Gənclərlə bağlı qərarlar təsadüfi deyil, uzunmüddətli strategiya əsasında qəbul edilirdi.

1994-cü ildə Gənclər və İdman Nazirliyinin yaradılması gənclər siyasətinin institusional əsaslarının formalaşdırılmasında mühüm mərhələ oldu. Bu addım gənclərlə işin mərkəzləşdirilmiş şəkildə aparılmasına imkan yaratdı. Nazirlik gənclərin problemlərinin dövlət səviyyəsində həllinə, onların potensialının üzə çıxarılmasına və cəmiyyətə inteqrasiyasına xidmət etdi.

1996-cı ildə keçirilən ilk Azərbaycan Gəncləri Forumu gənclərin ictimai-siyasi həyatda fəal iştirakının təşviqi baxımından mühüm hadisə oldu. Forumda gənclər öz fikirlərini, problemlərini və təkliflərini açıq şəkildə ifadə etdilər. Bu, demokratik dəyərlərin möhkəmlənməsinə və gənclərin dövlət idarəçiliyinə yaxınlaşmasına şərait yaratdı.

1997-ci ildə 2 Fevral – Azərbaycan Gəncləri Gününün təsis edilməsi Ulu Öndərin gənclərə verdiyi yüksək dəyərin bariz nümunəsi idi. Bu qərar gənclərin cəmiyyətdə rolunun rəsmi şəkildə tanınmasına xidmət etdi və MDB məkanında ilk belə təşəbbüs kimi tarixə düşdü. Gənclər bu bayram vasitəsilə dövlətin onlara olan diqqət və qayğısını daha aydın hiss etdilər.

Ulu Öndər Heydər Əliyev gənclərin vətənpərvər ruhda tərbiyəsini xüsusi önəmli hesab edirdi. O, müstəqilliyin qorunmasının və dövlətçiliyin möhkəmləndirilməsinin birbaşa gənclərin mövqeyindən asılı olduğunu dəfələrlə vurğulamışdır. Onun gənclərlə görüşləri, çıxışları və tövsiyələri bu gün də öz aktuallığını qoruyur və müasir Azərbaycan gəncliyi üçün mənəvi yol xəritəsi rolunu oynayır.

Rövşən Qasımov,

YAP Gədəbəy rayon təşkilatının məsləhətçisi

Paylaş:

Baxılıb: 397 dəfə