İnsan qardaşlığına xidmət edən liderlik

Bakı:

24 °C

71 %

3 m/s

Əlaqə

AZ RU EN

Ana səhifə / YAP xəbərləri / İnsan qardaşlığına xidmət edən liderlik

İnsan qardaşlığına xidmət edən liderlik

06.02.2026 [20:33]

Ölkəmizin xarici siyasət kursunun əsas prioritet istiqamətlərindən birini məhz ərəb dövlətləri ilə əməkdaşlıq əlaqələrinin möhkəmləndirilməsi təşkil edir. Bu gün müasir dövlət kimi inkişaf edən Azərbaycan öz siyasətində, həmçinin tarixi köklərə istinad edir və ənənələrə, milli-mənəvi dəyərlərə yüksək bağlılıq sərgiləyir. Ölkəmizin ərəb dövlətlərilə münasibətlərinin dərinləşməsinə münbit zəmin yaradan əsas faktorlardan biri məhz tarixi bağlılıq amilidir.

Azərbaycanla ərəb ölkələri arasındakı əlaqələr müxtəlif beynəlxalq platformalarda o cümlədən, BMT və İslam Əməkdaşlıq Təşkilatı çərçivəsində də inkişaf etdirilib. Ərəb ölkələri hər zaman Azərbaycanın ərazi bütövlüyünə və suverenliyinə dəstək ifadə edib.

Fevralın 4-də Birləşmiş Ərəb Əmirliklərinin paytaxtı Əbu-Dabidə Prezident İlham Əliyevə “Zayed İnsan Qardaşlığı Mükafatı”nın təqdim olunması müasir beynəlxalq münasibətlər sistemində Azərbaycanın tutduğu mövqeyin və ölkə rəhbərliyinin həyata keçirdiyi humanist siyasətin yüksək qiymətləndirilməsidir.Bu mükafat təkcə bir dövlət başçısına verilən fəxri mükafat deyil, zeyni zamanda sülhə, tolerantlığa və insan həmrəyliyinə əsaslanan bir siyasi xəttin beynəlxalq səviyyədə tanınmasının göstəricisidir.Bu mükafat Prezident İlham Əliyevin regional və qlobal miqyasda sülhün təşviqi istiqamətində atdığın addımların beynəlxalq ictimaiyyət tərəfindən dəyərləndirilməsidir. Xüsusilə münaqişədən çıxmış bir ölkə kimi Azərbaycanın revanşizmə deyil, ədalətli və davamlı sülhə üstünlük verməsi dövlət başçısının siyasi uzaqgörənliyinin bariz nümunəsidir. Ermənistanla münasibətlərdə səsləndirilən praqmatik sülh mesajları da ümumi humanist yanaşmanın tərkib hissəsidir.

Prezident İlham Əliyevin “Zayed İnsan Qardaşlığı Mükafatı”nın təqdimolunma mərasimində səsləndirdiyi fikirlər Azərbaycanın son illərdə formalaşdırdığı siyasi xəttin və beynəlxalq nüfuzunun parlaq ifadəsi kimi dəyərləndirilməlidir. Dövlət başçısının mükafatı qəbul edərkən etdiyi çıxış Azərbaycanın qlobal siyasi diskursda yalnız regional aktor deyil, həm də dəyərlərə söykənən məsuliyyətli tərəfdaş kimi qəbul edildiyini təsdiqləyir.

Dövlət başçısının çıxışının mühüm siyasi xəttlərindən biri Azərbaycan və Ermənistan arasında sülh mövzusunun daha geniş regional kontekstdə təqdim olunmasıdır. Cənab Prezidentin: “Bu sülh təkcə iki ölkə üçün deyil, daha geniş region üçün də böyük əhəmiyyət kəsb edir. Biz 30 ildən artıq müddətdə müharibə şəraitində olmuşuq. İndi isə artıq altı aydır ki, sülh şəraitində yaşayırıq.”- deməsi ölkəmizin sülh prosesinə regional sabitlik və əməkdaşlıq məntiqi ilə yanaşdığını nümayiş etdirir. Dövlət başçısının “biz Ermənistanla sülh şəraitində yaşamağı öyrənirik” fikri isə regionda formalaşan yeni siyasi reallıqların və Azərbaycanın sülh konsepsiyasının aydın ifadəsidir. Bu ifadə əslində ölkəmizin sülhə yanaşmasının əsas fəlsəfəsini ortaya qoyur. Uzun illər davam edən münaqişədən sonra sülhün təmin olunması yalnız hüquqi sənədlərlə məhdudlaşa bilməz. Sülh - zaman, səbr, qarşılıqlı davranış dəyişikliyi tələb edən mürəkkəb bir prosesdir.

Prezident İlham Əliyevin Əbu-Dabidə səsləndirdiyi fikirlər Azərbaycanın sülhə yanaşmasını aydın şəkildə ifadə edir. Bu bəyanat həm də dünyaya ünvanlanıb ki, Azərbaycan sülh istəyən, regional sabitliyi düşünən, məsuliyyətli dövlətdir. Prezident İlham Əliyevə “Zayed İnsan Qardaşlığı Mükafatı”nın təqdim olunması Dövlət başçımızın insan qardaşlığına xidmət edən lider olmasını təsdiq edir. Bu bir daha göstərir ki, Azərbaycan yalnız regional güc deyil, eyni zamanda insan qardaşlığı və qarşılıqlı hörmət dəyərlərini təsdiq edən nüfuzlu beynəlxalq aktordur.

Gündüz Bayramov

YAP Samux rayon təşkilatının sədri

Paylaş:

Baxılıb: 789 dəfə