Regionda sülhün banisinə sonsuz etimad

Bakı:

11 °C

87 %

1 m/s

Əlaqə

AZ RU EN

Ana səhifə / YAP xəbərləri / Regionda sülhün banisinə sonsuz etimad

Regionda sülhün banisinə sonsuz etimad

09.02.2026 [10:32]

Cənubi Qafqaz tarix boyu mürəkkəb geosiyasi proseslərin, ziddiyyətlərin və qarşıdurmaların mərkəzində dayanmış bir region olub. Lakin son illər bu coğrafiyada yeni reallıqlar formalaşıb. Bu reallıqların əsas memarı kimi çıxış edən Cənab Prezident İlham Əliyev həm siyasi iradəsi, həm də prinsipial mövqeyi ilə regionda sülhün və sabitliyin əsas təminatçısına çevrilib. Onun həyata keçirdiyi məqsədyönlü siyasət Azərbaycanı təkcə hərbi və iqtisadi baxımdan deyil, diplomatik müstəvidə də güclü aktora çevirib.

Ermənistanla münasibətlərin normallaşdırılması istiqamətində irəli sürülən beş baza prinsipi, sərhədlərin delimitasiya və demarkasiyası təşəbbüsləri, kommunikasiyaların açılması ilə bağlı çağırışlar göstərdi ki, Azərbaycanın məqsədi qarşıdurmanı davam etdirmək deyil, regionda dayanıqlı təhlükəsizlik arxitekturası qurmaqdır. Bu siyasətin mərkəzində milli maraqların qorunması ilə yanaşı, regional əməkdaşlıq mühitinin formalaşdırılması dayanır. Cənab Prezident İlham Əliyev dəfələrlə bəyan edib ki, Cənubi Qafqaz münaqişə meydanı deyil, əməkdaşlıq platformasına çevrilməlidir. Məhz bu strateji baxış Azərbaycanın beynəlxalq nüfuzunu daha da möhkəmləndirib və ölkəmizi etibarlı tərəfdaş kimi tanıdıb.

Cənab Prezident İlham Əliyevin beynəlxalq aləmdə qazandığı yüksək etimadın göstəricilərindən biri də ona təqdim olunan nüfuzlu mükafatlardır. Xüsusilə Birləşmiş Ərəb Əmirliklərinin Şeyx Zayed Fondu tərəfindən təqdim edilən “Zayed İnsan Qardaşlığı Mükafatı” Cənab Prezident İlham Əliyevin multikulturalizm, tolerantlıq və sivilizasiyalararası dialoq sahəsindəki fəaliyyətinə verilən yüksək qiymətdir. Bu mükafat təkcə bir ölkənin liderinə deyil, onun rəhbərlik etdiyi dövlətin yürütdüyü humanist və sülhpərvər siyasətə verilən beynəlxalq dəyərdir. Azərbaycan müxtəlif dinlərin və mədəniyyətlərin dinc, yanaşı yaşadığı məkan kimi dünyada nümunə göstərilir və bu modelin qorunub inkişaf etdirilməsi məhz dövlət başçımızın ardıcıl siyasəti nəticəsində mümkün olub. Bu fəaliyyət yalnız milli çərçivədə deyil, qlobal miqyasda da sülh və qarşılıqlı etimad mühitinin möhkəmlənməsinə xidmət edir.

“Regionda sülhün banisi” ifadəsi artıq siyasi ritorika deyil, formalaşmış reallığın təsviridir. Çünki sülh yalnız müharibəni dayandırmaq deyil, yeni inkişaf mərhələsinin əsasını qoymaqdır. Qarabağ və Şərqi Zəngəzurda həyata keçirilən genişmiqyaslı bərpa-quruculuq işləri, “ağıllı şəhər” və “ağıllı kənd” layihələri, keçmiş məcburi köçkünlərin doğma torpaqlarına qayıdışı regionda davamlı sabitliyin praktik təcəssümüdür.

Azərbaycan cəmiyyətində Cənab Prezident İlham Əliyevə olan sonsuz etimad da məhz bu ardıcıl və qətiyyətli siyasətin nəticəsidir. Xalqımız liderinə onun sözünün əməli ilə üst-üstə düşdüyü üçün inanır. Dövlət başçımızın hər çıxışı, hər təşəbbüsü milli maraqlara söykənir və uzunmüddətli strateji hədəflərə hesablanır.

Bu gün Azərbaycan regionda təşəbbüs irəli sürən, gündəmi müəyyən edən və prosesləri yönləndirən dövlətdir. Bu mövqenin arxasında güclü siyasi iradə, uzaqgörən strategiya və xalqa söykənən liderlik dayanır. Cənab Prezident İlham Əliyevin rəhbərliyi ilə qurulan yeni reallıq Cənubi Qafqazı qarşıdurma məkanından əməkdaşlıq və inkişaf platformasına çevirir.

Regionda sülhün banisi kimi tanınan Cənab Prezident İlham Əliyevə göstərilən beynəlxalq etimad və təqdim olunan “Zayed İnsan Qardaşlığı Mükafatı” Azərbaycanın artan nüfuzunun bariz göstəricisidir. Bu etimadın əsasında isə bir prinsip dayanır: güclü dövlət, prinsipial siyasət və Xalq-Lider birliyi. Məhz bu birlik regionun gələcəyini müəyyənləşdirən əsas amildir.

David Həsənov

YAP Naxçıvan şəhər təşkilatının əməkdaşı

Paylaş:

Baxılıb: 448 dəfə