Azərbaycan–Serbiya münasibətləri strateji tərəfdaşlıq mərhələsində

Bakı:

18 °C

63 %

1 m/s

Əlaqə

AZ RU EN

Ana səhifə / YAP xəbərləri / Azərbaycan–Serbiya münasibətləri strateji tərəfdaşlıq mərhələsində

Azərbaycan–Serbiya münasibətləri strateji tərəfdaşlıq mərhələsində

18.02.2026 [19:11]

Azərbaycan Respublikasının xarici siyasəti çoxşaxəli və balanslaşdırılmış kursa əsaslanır. Ölkəmiz həm regional, həm də qlobal miqyasda etibarlı tərəfdaş kimi tanınır, beynəlxalq hüququn norma və prinsiplərinə söykənən əməkdaşlıq modelini təşviq edir. Avropa, Asiya və digər region ölkələri ilə qarşılıqlı faydalı əlaqələrin qurulması Azərbaycanın xarici siyasət prioritetlərində mühüm yer tutur. Bu kontekstdə Balkan regionunun aparıcı dövlətlərindən biri olan Serbiya ilə münasibətlər xüsusi əhəmiyyət kəsb edir. Azərbaycan ilə Serbiya arasında əlaqələr qarşılıqlı hörmətə, suverenlik və ərazi bütövlüyünə dəstəyə əsaslanır və son illərdə strateji tərəfdaşlıq səviyyəsinə yüksəlib.

Cari ilin fevralın 15-də Azərbaycan Respublikasının Prezidenti cənab İlham Əliyevin Serbiyaya rəsmi səfəri bu əməkdaşlığın növbəti mühüm mərhələsi kimi qiymətləndirilir. Səfər çərçivəsində Prezident İlham Əliyevin Serbiya Prezidenti Aleksandar Vuçiç ilə görüşü keçirilib, nümayəndə heyətlərinin iştirakı ilə geniş tərkibdə müzakirələr aparılıb və mətbuata bəyanatlar verilib.

Dövlətimizin Başçısı bəyanatında Azərbaycan ilə Serbiya arasında münasibətlərin yüksək səviyyədə olduğunu vurğulayıb. Qeyd edilib ki, iki ölkə arasında siyasi dialoq intensiv xarakter daşıyır, qarşılıqlı səfərlər və təmaslar əməkdaşlığın dərinləşməsinə xidmət edir. Dövlət başçısı bildirib ki, Azərbaycan və Serbiya beynəlxalq təşkilatlar çərçivəsində bir-birini dəstəkləyir və prinsipial məsələlərdə həmrəylik nümayiş etdirirlər.

Enerji sahəsində əməkdaşlıq xüsusi diqqət mərkəzində olub. Prezident İlham Əliyev Azərbaycanın Avropanın enerji təhlükəsizliyinə verdiyi töhfədən bəhs edərək ölkəmizin etibarlı enerji tərəfdaşı kimi mövqeyini vurğulayıb. Serbiya ilə enerji sahəsində əməkdaşlığın genişləndirilməsi, xüsusilə təbii qaz təchizatı və enerji infrastrukturunun inkişafı istiqamətində atılan addımların əhəmiyyəti qeyd edilib.

İqtisadi əməkdaşlıq məsələləri də geniş müzakirə olunub. Ticarət dövriyyəsinin artırılması, qarşılıqlı investisiyaların təşviqi, nəqliyyat, logistika, kənd təsərrüfatı və sənaye sahələrində birgə layihələrin həyata keçirilməsi perspektivləri diqqətə çatdırılıb. Cənab Prezident İlham Əliyev vurğulayıb ki, hər iki ölkədə biznes mühiti əlverişlidir və qarşılıqlı sərmayələr münasibətlərin iqtisadi əsaslarını daha da gücləndirə bilər.

Humanitar sahədə əməkdaşlıq da bəyanatda öz əksini tapıb. Təhsil, mədəniyyət və idman sahələrində əlaqələrin genişləndirilməsi, xalqlar arasında dostluq münasibətlərinin möhkəmləndirilməsi vacib istiqamətlər kimi dəyərləndirilib. Qeyd olunub ki, Azərbaycan və Serbiya xalqları arasında mövcud olan qarşılıqlı simpatiya və etimad dövlətlərarası münasibətlərin davamlı inkişafına zəmin yaradır.

Bəyanatda regional və beynəlxalq məsələlər ətrafında da fikir mübadiləsi aparıldığı bildirilib. Prezident İlham Əliyev Azərbaycanın regionda sülh və sabitliyin tərəfdarı olduğunu vurğulayıb, beynəlxalq hüquqa əsaslanan münasibətlərin əhəmiyyətini qeyd edib. Bu səfər bir daha göstərdi ki, Azərbaycan–Serbiya münasibətləri strateji tərəfdaşlıq səviyyəsində inkişaf edir və gələcəkdə daha geniş əməkdaşlıq imkanları mövcuddur.

Rövşən Əhmədov

YAP Ağcabədi rayon təşkilatının sədri

Paylaş:

Baxılıb: 440 dəfə