Strateji tərəfdaşlıqdan sarsılmaz inamadək

Bakı:

10 °C

87 %

2 m/s

Əlaqə

AZ RU EN

Ana səhifə / YAP xəbərləri / Strateji tərəfdaşlıqdan sarsılmaz inamadək

Strateji tərəfdaşlıqdan sarsılmaz inamadək

19.02.2026 [22:38]

Prezident İlham Əliyevin fevralın 15-də Serbiya Respublikasına gerçəkləşən səfəri Bakı və Belqrad arasındakı münasibətlərin artıq sadəcə diplomatik deyil, həm də dərin şəxsi etimada əsaslanan qardaşlıq səviyyəsində olduğunu növbəti dəfə sübut etdi. Dövlət başçısının səfər çərçivəsində səsləndirdiyi "Bizim təmaslarımız uzun illərdir ki, davam edir. Biz bir-birimizi yaxından tanıyırıq, səmimi söhbətlər aparırıq və dostluq münasibətlərimiz var" fikirləri iki ölkə arasındakı əlaqələrin mahiyyətini ən dürüst şəkildə ifadə edir. Bu bəyanat həm keçmişin ortaq dəyərlərinə, həm də gələcəyin böyük layihələrinə baxışın rəmzidir. Azərbaycan və Serbiya müasir beynəlxalq münasibətlər sistemində bir-birinin ərazi bütövlüyünü və suverenliyini qeyd-şərtsiz dəstəkləyən iki nadir müttəfiqdir. Bu dəstək sadəcə bəyanatlarla məhdudlaşmır, beynəlxalq platformalarda və praktiki müstəvidə də özünü büruzə verir. Prezident İlham Əliyev və Serbiya Prezidenti Aleksandr Vuçiç arasındakı dialoq təkcə iki ölkə rəhbərinin deyil, həm də iki xalqın bir-birinə olan rəğbətinin təzahürüdür. Ölkə rəhbərlərinin səmimi söhbətləri və bir-birini yaxından tanıması qərarların qəbulu zamanı bürokratik maneələri aradan qaldırır, əməkdaşlığı daha çevik və səmərəli edir. Səfər zamanı diqqət çəkən ən mühüm məqamlardan biri iqtisadi və enerji əməkdaşlığı məsələləridir. Azərbaycan bu gün Avropanın enerji təhlükəsizliyində həlledici rol oynayır və Serbiya bu zəncirin ən önəmli həlqələrindən birinə çevrilməkdədir. Qaz interkonnektorlarının inşası və Azərbaycan qazının Serbiya bazarına, oradan isə digər Balkan ölkələrinə ötürülməsi regionun iqtisadi mənzərəsini dəyişir. Lakin bu əməkdaşlıq təkcə təbii resursların alqı-satqısı deyil, həm də qarşılıqlı investisiyalar, hərbi-texniki tərəfdaşlıq və nəqliyyat-logistika sahəsindəki ortaq fəaliyyətlərlə zənginləşir. Mədəniyyət və humanitar sahədəki bağlar da bu siyasi iradənin üzərində ucalır. Azərbaycan və Serbiya xalqları bir-birinin mədəniyyətinə və tarixinə böyük hörmətlə yanaşırlar. Belqradda və Bakıda ucaldılan abidələr, həyata keçirilən birgə layihələr bu mənəvi körpünün sarsılmazlığından xəbər verir. Prezident İlham Əliyevin bu səfəri həm də bir daha göstərdi ki, Azərbaycan öz xarici siyasətində etibarlı tərəfdaş prinsiplərinə sadiqdir. Sözün imzadan daha güclü olduğu bu münasibətlər modeli müasir dünya üçün nümunəvi bir dostluq nümunəsidir. Fevralın 15-də verilən bəyanatlar Azərbaycan-Serbiya əlaqələrində yeni bir səhifə açmaqla yanaşı, mövcud strateji tərəfdaşlığı sarsılmaz bir qalaya çevirdi. Prezidentin vurğuladığı səmimiyyət və illərə söykənən təmaslar yaxın gələcəkdə hər iki xalqın rifahına xidmət edəcək yeni-yeni uğurların müjdəçisidir.

Nicat Quliyev

YAP Laçın rayon təşkilatının məsləhətçisi

Paylaş:

Baxılıb: 306 dəfə