Azərbaycan–Serbiya Strateji Tərəfdaşlığı: Qarşılıqlı Etimad və Gələcəyə Hesablanmış Siyasət

Bakı:

23 °C

50 %

2 m/s

AZ RU EN

Ana səhifə / YAP xəbərləri / Azərbaycan–Serbiya Strateji Tərəfdaşlığı: Qarşılıqlı Etimad və Gələcəyə Hesablanmış Siyasət

Azərbaycan–Serbiya Strateji Tərəfdaşlığı: Qarşılıqlı Etimad və Gələcəyə Hesablanmış Siyasət

20.02.2026 [12:46]

Fevralın 15-də Belqradda Azərbaycan Respublikasının Prezidenti İlham Əliyevin rəsmi qarşılanma mərasimi və Azərbaycan–Serbiya Strateji Tərəfdaşlıq Şurasının ilk iclası iki ölkə arasında münasibətlərin keyfiyyətcə yeni mərhələyə qədəm qoyduğunu bir daha nümayiş etdirdi. Dövlət başçılarının iştirakı ilə keçirilən görüşlər, imzalanan qərarlar və mətbuata verilən bəyanatlar təsdiq etdi ki, Azərbaycan Serbiya münasibətləri artıq möhkəm siyasi iradəyə və konkret iqtisadi məzmuna söykənən strateji xəttdir.

Rəsmi qarşılanma mərasimində göstərilən ali ehtiram, dövlət himnlərinin səsləndirilməsi, fəxri qarovul dəstəsinin düzülməsi və nümayəndə heyətlərinin təqdim olunması iki dost ölkə arasında mövcud olan yüksək münasibətlərin rəmzi ifadəsi idi. Lakin bu səfərin əsas mahiyyəti protokol çərçivəsindən kənara çıxaraq konkret əməkdaşlıq gündəliyinin formalaşdırılması ilə bağlıdır.

Strateji Tərəfdaşlıq Şurasının ilk iclası göstərdi ki, Azərbaycan və Serbiya münasibətləri sistemli və institusional əsaslara söykənir. Bu format yalnız siyasi dialoq platforması deyil, eyni zamanda, hökumətlərarası koordinasiyanın, birgə layihələrin və konkret icra mexanizmlərinin müəyyənləşdirildiyi mühüm mexanizmdir. Dövlət başçıları tərəfindən imzalanan qərar əməkdaşlığın uzunmüddətli və davamlı xarakter daşıdığını təsdiqlədi.

İkitərəfli münasibətlərin əsas istiqamətlərindən biri energetika sahəsidir. Azərbaycan qazının Serbiyaya ixracı artıq reallıqdır və bu, Balkan regionunda enerji təhlükəsizliyinin möhkəmlənməsinə töhfə verir. Bununla yanaşı, qazla işləyən 500 meqavatlıq elektrik stansiyasının inşası barədə razılaşma əməkdaşlığın yeni mərhələsidir. Bu layihə yalnız enerji istehsalı baxımından deyil, həm də investisiya, texnologiya transferi və sənaye əməkdaşlığı baxımından strateji əhəmiyyət daşıyır. Azərbaycanın Avropanın enerji təhlükəsizliyində artan rolu Serbiya ilə tərəfdaşlıq çərçivəsində daha da genişlənir.

Dövlət başçılarının çıxışlarında xüsusi vurğulanan məsələlərdən biri qarşılıqlı siyasi dəstəkdir. Azərbaycan və Serbiya beynəlxalq təşkilatlar çərçivəsində bir-birinin ərazi bütövlüyünü və suverenliyini qətiyyətlə dəstəkləyir. Bu prinsipial mövqe iki ölkə arasında etimadın və strateji yaxınlığın əsas dayaqlarından biridir. Müasir beynəlxalq münasibətlər sistemində suverenlik və milli maraqların qorunması məsələsində həmrəylik xüsusi əhəmiyyət kəsb edir.

İqtisadi əməkdaşlıq da sürətlə inkişaf edir. Xidmətlər və ticarət dövriyyəsində artım, investisiya imkanlarının genişlənməsi və birgə biznes təşəbbüsləri münasibətlərin praktik məzmununu gücləndirir. Bakı–Belqrad birbaşa aviareyslərinin açılması humanitar əlaqələrin, turizmin və biznes təmaslarının genişlənməsinə əlavə stimul verəcək. Bu addım iki xalq arasında qarşılıqlı əlaqələrin intensivləşməsinə xidmət edir.

Azərbaycan Respublikasının Prezidenti İlham Əliyevin vurğuladığı kimi, tərəflər əldə olunan razılaşmaların qısa müddətdə icrasını təmin etməlidirlər. Bu yanaşma iqtidarın prinsipial mövqeyini əks etdirir: strateji tərəfdaşlıq yalnız bəyanatlarla deyil, konkret nəticələrlə ölçülməlidir. Hökumət üzvlərinin geniş tərkibdə iştirakı da göstərir ki, əməkdaşlıq çoxşaxəli xarakter daşıyır və sistemli şəkildə inkişaf etdirilir.

Azərbaycan Serbiya münasibətləri bu gün regional sabitlik, enerji təhlükəsizliyi və iqtisadi əməkdaşlıq baxımından mühüm modelə çevrilir. Bu model qarşılıqlı hörmətə, suverenliyə dəstəyə və real layihələrə əsaslanır. İqtidarın həyata keçirdiyi balanslı və milli maraqlara söykənən xarici siyasət nəticəsində Azərbaycan beynəlxalq müstəvidə etibarlı tərəfdaş kimi mövqeyini daha da möhkəmləndirir.

Belqrad səfəri bir daha təsdiqlədi ki, Azərbaycan–Serbiya strateji tərəfdaşlığı gələcəyə hesablanmış, uzunmüddətli və qarşılıqlı faydaya əsaslanan əməkdaşlıqdır. Bu xətt ölkəmizin beynəlxalq nüfuzunun artmasına və milli maraqlarının qorunmasına xidmət edir.

Abbas Pənahov

Yeni Azərbaycan Partiyası Nəsimi rayon təşkilatının Sədr müavini

Paylaş:

Baxılıb: 597 dəfə