Dünyada sülhün və təhlükəsizliyin möhkəmlənməsində Azərbaycan təcrübəsi

Bakı:

26 °C

57 %

12 m/s

Əlaqə

AZ RU EN

Ana səhifə / YAP xəbərləri / Dünyada sülhün və təhlükəsizliyin möhkəmlənməsində Azərbaycan təcrübəsi

Dünyada sülhün və təhlükəsizliyin möhkəmlənməsində Azərbaycan təcrübəsi

13.03.2026 [15:01]

Eldar Əsədov

YAP Tərtər rayon təşkilatının sədri

Müasir beynəlxalq münasibətlər sistemi sürətli və mürəkkəb transformasiya dövrünü yaşayır. Qlobal güc balansının dəyişməsi, regional münaqişələrin davam etməsi, iqtisadi və enerji təhlükəsizliyi ilə bağlı risklərin artması dövlətlər arasında əməkdaşlıq mexanizmlərinin yenidən nəzərdən keçirilməsini zəruri edir. Məhz belə bir şəraitdə 12 mart 2026-cı ildə Bakı şəhərində keçirilən XIII Qlobal Bakı Forumu çərçivəsində Azərbaycan Prezidenti İlham Əliyev “Keçid dövründə olan dünyada fikir ayrılıqlarının aradan qaldırılması” mövzusunda geniş məzmunlu çıxış edib. Dövlət başçısının nitqi qlobal siyasi gündəmin aktual problemlərinə toxunmaqla yanaşı, beynəlxalq əməkdaşlığın gücləndirilməsi istiqamətində mühüm mesajlarla yadda qalıb.

Möhtərəm Prezidentimiz İlham Əliyev cənabları çıxışında vurğulayıb ki, hazırda dünya yeni geosiyasi mərhələyə qədəm qoyur və bu mərhələ həm risklər, həm də yeni imkanlarla müşayiət olunur. Onun sözlərinə görə, dövlətlər arasında etimadın azalması, beynəlxalq hüququn selektiv tətbiqi və ikili standartların mövcudluğu qlobal sabitliyə ciddi təhdid yaradır. Bu baxımdan beynəlxalq münasibətlərdə suverenliyə, ərazi bütövlüyünə və qarşılıqlı hörmət prinsipinə əsaslanan yanaşmanın vacibliyi xüsusi qeyd edilib.

Cənab Prezident bildirib ki, fikir ayrılıqları müasir dünyanın qaçılmaz reallığıdır. Lakin bu ayrılıqların qarşıdurmaya çevrilməməsi üçün dialoq və çoxtərəfli əməkdaşlıq əsas vasitə kimi çıxış etməlidir. Prezident Azərbaycanın müxtəlif beynəlxalq platformalarda sülh və əməkdaşlıq təşəbbüsləri ilə çıxış etdiyini, regionda sabitliyin möhkəmləndirilməsinə və iqtisadi inteqrasiyanın genişləndirilməsinə töhfə verdiyini diqqətə çatdırıb.

Çıxışda qlobal enerji təhlükəsizliyi məsələlərinə də geniş yer ayrılıb. Prezident qeyd edib ki, enerji resurslarının şaxələndirilməsi və alternativ enerji mənbələrinin inkişafı müasir dövrdə iqtisadi dayanıqlığın əsas şərtlərindən biridir. Azərbaycanın həyata keçirdiyi beynəlxalq enerji və nəqliyyat layihələrinin regionlararası əməkdaşlığı gücləndirdiyi, Avrasiya məkanında yeni iqtisadi imkanlar yaratdığı vurğulanıb.

Humanitar sahədə əməkdaşlıq və multikultural dəyərlərin qorunması da Prezident İlham Əliyevin çıxışının mühüm istiqamətlərindən biri olub. O bildirib ki, dünyada ideoloji qarşıdurmaların artdığı bir dövrdə tolerantlıq, mədəniyyətlərarası dialoq və humanitar təşəbbüslər sabitliyin təmin olunmasında mühüm rol oynayır. Azərbaycanın multikulturalizm sahəsində topladığı təcrübə və müxtəlif xalqların sülh şəraitində birgə yaşayış modeli qlobal miqyasda nümunə kimi təqdim edilib.

ÇŞıxışının sonunda İlham Əliyev cənabları Qlobal Bakı Forumunun beynəlxalq dialoq üçün mühüm platforma olduğunu vurğulayıb. O qeyd edib ki, belə forumlar vasitəsilə dünya liderləri və ekspertlər aktual problemləri açıq müzakirə edir, ortaq yanaşmalar formalaşdırır və gələcək əməkdaşlıq istiqamətlərini müəyyənləşdirirlər. Prezident optimist notlarla çıxışını yekunlaşdıraraq bildirib ki, qarşılıqlı hörmətə və etimada əsaslanan əməkdaşlıq sayəsində qlobal fikir ayrılıqlarını aradan qaldırmaq mümkündür.

Paylaş:

Baxılıb: 456 dəfə