Azərbaycan–Avropa İttifaqı münasibətlərində strateji tərəfdaşlığın yeni mərhələsi

Bakı:

17 °C

67 %

3 m/s

Əlaqə

AZ RU EN

Ana səhifə / YAP xəbərləri / Azərbaycan–Avropa İttifaqı münasibətlərində strateji tərəfdaşlığın yeni mərhələsi

Azərbaycan–Avropa İttifaqı münasibətlərində strateji tərəfdaşlığın yeni mərhələsi

13.03.2026 [15:02]

2026-cı il martın 11-də Azərbaycan Respublikasının Prezidenti İlham Əliyev ilə Avropa İttifaqı Şurasının Prezidenti Antonio Costa arasında keçirilən görüş və səfər çərçivəsində verilən bəyanat Azərbaycan ilə Avropa İttifaqı arasındakı münasibətlərin inkişafında mühüm siyasi hadisə kimi qiymətləndirilir. Bu səfər ölkəmizin beynəlxalq arenada artan nüfuzunun, həyata keçirilən müstəqil və praqmatik xarici siyasətin, eləcə də Avropa ilə qarşılıqlı faydalı əməkdaşlıq modelinin növbəti bariz göstəricisi oldu.

Prezident İlham Əliyevin rəhbərliyi ilə həyata keçirilən ardıcıl və məqsədyönlü siyasət nəticəsində Azərbaycan regionun siyasi, iqtisadi və enerji xəritəsində mühüm aktora çevrilib. Dövlət başçısının çıxışında da vurğulandığı kimi, Azərbaycan ilə Avropa İttifaqı arasında münasibətlər qarşılıqlı hörmətə, etibarlı tərəfdaşlığa və ortaq maraqlara əsaslanır. Bu gün Azərbaycan Avropa məkanında etibarlı tərəfdaş kimi qəbul olunur və bir çox mühüm layihələrdə strateji rol oynayır.

Bəyanatda enerji sahəsində əməkdaşlıq xüsusi vurğulandı. Prezident İlham Əliyev qeyd etdi ki, Azərbaycan Avropanın enerji təhlükəsizliyinin təmin edilməsində mühüm rol oynayır və ölkəmizin təbii qazı artıq Avropanın bir sıra dövlətlərinin enerji balansında mühüm yer tutur. Bu fakt Azərbaycanın etibarlı enerji tərəfdaşı kimi beynəlxalq mövqeyini daha da gücləndirir və ölkəmizin həyata keçirdiyi böyük enerji layihələrinin uğurlu nəticəsini nümayiş etdirir.

Görüş zamanı nəqliyyat, ticarət, rəqəmsal inkişaf və təhlükəsizlik sahələrində əməkdaşlığın genişləndirilməsi məsələləri də diqqət mərkəzində oldu. Azərbaycanın təşəbbüsü və iştirakı ilə həyata keçirilən beynəlxalq nəqliyyat və logistika layihələri Avropa ilə Asiya arasında əlaqələrin güclənməsinə mühüm töhfə verir. Bu baxımdan ölkəmiz regionda iqtisadi və geosiyasi baxımdan strateji körpü rolunu oynayır.

Eyni zamanda, Cənubi Qafqaz regionunda davamlı sülh və sabitliyin təmin olunması məsələsi də müzakirə edildi. Prezident İlham Əliyev regionda sülh gündəliyinin irəli aparılması istiqamətində Azərbaycanın prinsipial mövqeyini bir daha diqqətə çatdırdı və sabitliyin regionun inkişafı üçün əsas şərt olduğunu vurğuladı.

Ümumilikdə, Avropa İttifaqı Şurasının Prezidenti Antonio Koştanın Azərbaycana səfəri və Prezident İlham Əliyevin verdiyi bəyanat ölkəmizin beynəlxalq mövqeyinin daha da möhkəmləndiyini göstərir. Bu səfər Azərbaycan ilə Avropa İttifaqı arasında strateji tərəfdaşlığın genişlənməsinə, qarşılıqlı faydalı əməkdaşlığın dərinləşməsinə və regionda sabitliyin möhkəmlənməsinə xidmət edən mühüm siyasi hadisə kimi tarixə düşür.

Ziya Paşayev
YAP İmişli rayon təşkilatı Aparatının məsləhətçisi

Paylaş:

Baxılıb: 214 dəfə