Azərbaycan–Gürcüstan münasibətləri yeni mərhələdə

Bakı:

11 °C

87 %

8 m/s

Əlaqə

AZ RU EN

Ana səhifə / YAP xəbərləri / Azərbaycan–Gürcüstan münasibətləri yeni mərhələdə

Azərbaycan–Gürcüstan münasibətləri yeni mərhələdə

08.04.2026 [11:11]

2026-cı il aprelin 6-da Azərbaycan Respublikasının Prezidenti İlham Əliyev Gürcüstana rəsmi səfəri çərçivəsində mətbuata mühüm bəyanatla çıxış edib. Bu bəyanat təkcə iki ölkə arasında münasibətlərin hazırkı vəziyyətini deyil, həm də gələcək perspektivlərini aydın şəkildə ortaya qoyur. Prezidentin çıxışı Azərbaycan–Gürcüstan əlaqələrinin möhkəm təmələ əsaslandığını və strateji tərəfdaşlıq səviyyəsində inkişaf etdiyini bir daha təsdiqlədi. Prezident İlham Əliyev çıxışında xüsusi vurğuladı ki, Azərbaycan və Gürcüstan beynəlxalq platformalarda daim bir-birinin yanında olub və bu ənənə bu gün də uğurla davam edir. Bu qarşılıqlı dəstək iki ölkə arasında formalaşmış etimad mühitinin bariz nümunəsidir. Müxtəlif beynəlxalq təşkilatlarda – o cümlədən BMT, ATƏT və digər qurumlarda hər iki dövlətin bir-birinin suverenliyinə, ərazi bütövlüyünə verdiyi dəstək regionda sabitliyin qorunmasına xidmət edir. Bu yanaşma, eyni zamanda, beynəlxalq hüququn norma və prinsiplərinə hörmətin göstəricisidir. Azərbaycan və Gürcüstanın bu məsələdə nümayiş etdirdiyi həmrəylik digər ölkələr üçün də nümunə ola bilər. Prezidentin qeyd etdiyi kimi, belə qarşılıqlı dəstək münasibətlərin strateji xarakter daşıdığını göstərir və bu əlaqələrin daha da dərinləşməsi üçün mühüm zəmin yaradır. Bununla yanaşı, iki ölkə arasında siyasi dialoq da yüksək səviyyədə davam edir. Müntəzəm səfərlər, keçirilən görüşlər və imzalanan sənədlər əməkdaşlığın daha da genişlənməsinə töhfə verir. Prezidentin bəyanatı bir daha sübut etdi ki, Azərbaycan–Gürcüstan münasibətləri yalnız regional deyil, beynəlxalq əhəmiyyət kəsb edən əməkdaşlıq modelidir.

Azərbaycan və Gürcüstan arasında münasibətlər tarixi köklərə əsaslanır və bu əlaqələr bu gün strateji tərəfdaşlıq səviyyəsinə yüksəlib. Prezident İlham Əliyevin bəyanatında qeyd olunduğu kimi, iki ölkə arasında əməkdaşlıq demək olar ki, bütün sahələri əhatə edir – siyasi, iqtisadi, enerji, nəqliyyat və humanitar istiqamətlər üzrə uğurlu nəticələr əldə olunub. Xüsusilə enerji sahəsində həyata keçirilən birgə layihələr regionun enerji təhlükəsizliyində mühüm rol oynayır. Azərbaycan qazının Gürcüstan üzərindən Avropaya nəqli, iri enerji layihələrinin reallaşdırılması iki ölkənin iqtisadi gücünü artırmaqla yanaşı, onların beynəlxalq mövqelərini də möhkəmləndirir. Nəqliyyat sahəsində də əməkdaşlıq diqqətəlayiqdir. Orta Dəhliz çərçivəsində həyata keçirilən layihələr Azərbaycan və Gürcüstanı mühüm tranzit mərkəzlərinə çevirir. Bu isə regionda iqtisadi inteqrasiyanı gücləndirir və yeni imkanlar yaradır.Humanitar sahədə əlaqələr də xüsusi əhəmiyyət daşıyır. Xalqlar arasında dostluq münasibətləri, mədəni və təhsil sahəsində əməkdaşlıq əlaqələrin daha da möhkəmlənməsinə xidmət edir. Gürcüstanda yaşayan azərbaycanlılar və Azərbaycanda yaşayan gürcülər bu dostluğun canlı körpüsü kimi çıxış edirlər. Prezident İlham Əliyevin Gürcüstana səfəri zamanı verdiyi bəyanat bir daha göstərdi ki, Azərbaycan–Gürcüstan münasibətləri yalnız bu günün deyil, gələcəyin də uğurlu əməkdaşlıq modelidir. Qarşılıqlı hörmət, etimad və dəstəyə əsaslanan bu əlaqələr regionda sabitliyin və inkişafın əsas dayaqlarından biri kimi çıxış edir. Bütün bunlar göstərir ki, Azərbaycan və Gürcüstan arasında münasibətlər dinamik inkişaf edir və yeni mərhələyə qədəm qoyur. Qarşılıqlı dəstək, ortaq maraqlar və strateji baxış bu əməkdaşlığı daha da gücləndirəcək və regionun gələcək inkişafında mühüm rol oynayacaq.

Lalə Məmmədova

YAP Samux rayon təşkilatının əməkdaşı

Paylaş:

Baxılıb: 351 dəfə