Akademik Zərifə Əliyeva – Elm, Humanizm və Fədakarlığın Zirvəsi

Bakı:

12 °C

82 %

2 m/s

Əlaqə

AZ RU EN

Ana səhifə / YAP xəbərləri / Akademik Zərifə Əliyeva – Elm, Humanizm və Fədakarlığın Zirvəsi

Akademik Zərifə Əliyeva – Elm, Humanizm və Fədakarlığın Zirvəsi

15.04.2026 [12:34]

Azərbaycan tibb elminin inkişaf tarixində silinməz iz qoymuş görkəmli alim, akademik Zərifə Əliyeva yalnız peşəkar fəaliyyəti ilə deyil, həm də yüksək insani keyfiyyətləri ilə xalqın dərin hörmətini qazanmış nadir şəxsiyyətlərdən biridir. Hər il 15 aprel tarixində onun əziz xatirəsi ehtiramla yad olunur. Bu gün böyük bir alimin həyat və fəaliyyətinə nəzər salmaqla yanaşı, onun timsalında elmə, insanlığa və vətənə sədaqətin necə ali dəyər olduğunu bir daha anlayırıq.

Zərifə Əliyeva oftalmologiya sahəsində qazandığı nailiyyətlərlə Azərbaycan tibb elmini yeni mərhələyə yüksəltmişdir. Onun elmi araşdırmaları əsasən göz xəstəliklərinin öyrənilməsi, onların profilaktikası və müalicə üsullarının təkmilləşdirilməsi istiqamətində olmuşdur. Xüsusilə istehsalat mühitində çalışan insanların görmə problemləri ilə bağlı apardığı tədqiqatlar bu sahədə mühüm yeniliklərə yol açmışdır. O, kimya, metallurgiya və digər sənaye sahələrində çalışan işçilərdə rast gəlinən peşə xəstəliklərinin səbəblərini araşdırmış, bu problemlərin qarşısının alınması üçün praktiki əhəmiyyətli tövsiyələr vermişdir.

Akademikin elmi fəaliyyəti yalnız nəzəri tədqiqatlarla məhdudlaşmamış, o, əldə etdiyi nəticələri birbaşa praktik təbabətdə tətbiq etməyi bacarmışdır. Bu baxımdan onun fəaliyyəti elm ilə praktikanın vəhdətinin parlaq nümunəsi hesab olunur. Yazdığı elmi əsərlər, monoqrafiyalar və dərs vəsaitləri bu gün də öz aktuallığını qoruyur və gənc tibb işçiləri üçün dəyərli mənbə kimi istifadə olunur.

Zərifə Əliyeva həm də görkəmli pedaqoq kimi tanınmışdır. O, uzun illər ərzində gənc kadrların hazırlanmasına böyük əmək sərf etmiş, onların elmi dünyagörüşünün formalaşmasına mühüm təsir göstərmişdir. Tələbələrinə yalnız elmi biliklər deyil, eyni zamanda həkim etikası, insanlara sevgi və məsuliyyət hissi aşılamışdır. Onun yetirmələri bu gün müxtəlif sahələrdə uğurla fəaliyyət göstərərək müəllimlərinin yolunu layiqincə davam etdirirlər.

Onun həyat fəlsəfəsinin əsasını insanlara xidmət təşkil edirdi. Zərifə xanım üçün həkimlik sadəcə bir peşə deyil, müqəddəs bir missiya idi. O, hər bir xəstəyə xüsusi diqqət və qayğı ilə yanaşır, onların sağalması üçün bütün bilik və bacarığını səfərbər edirdi. Xəstələrinə göstərdiyi səmimi münasibət və mənəvi dəstək onun ən böyük insani keyfiyyətlərindən biri idi. Bu səbəbdən də o, yalnız alim kimi deyil, həm də böyük ürək sahibi insan kimi yadda qalmışdır.

Zərifə Əliyeva həm də yüksək mənəvi dəyərlərə malik bir ailə başçısı olmuşdur. Onun həyatı Azərbaycan qadınının zəngin mənəvi dünyasını, sədaqətini və gücünü özündə əks etdirirdi. O, ailə dəyərlərini hər zaman uca tutmuş, həm cəmiyyətdə, həm də ailədə nümunəvi mövqe sərgiləmişdir.

Bu gün akademik Zərifə Əliyevanın zəngin elmi və mənəvi irsi Azərbaycan cəmiyyətində böyük hörmətlə anılır. Onun adı tibb elmində yeniliklərin, humanizmin və fədakarlığın simvoluna çevrilmişdir. Müasir dövrdə səhiyyə sahəsində əldə olunan uğurların təməlində məhz belə görkəmli alimlərin zəhməti dayanır.

15 aprel – akademik Zərifə Əliyevanın anım günü bizə bir daha xatırladır ki, elmə və insanlığa xidmət edən şəxsiyyətlər heç vaxt unudulmur. Onların həyat yolu gələcək nəsillər üçün bir örnək, bir məktəb rolunu oynayır. Zərifə Əliyevanın adı Azərbaycan tarixində əbədi yaşayacaq, onun qoyduğu elmi və mənəvi irs daim yolumuza işıq salacaqdır.

Bu əlamətdar gündə böyük alimin xatirəsini dərin ehtiramla yad edir, onun həyat və fəaliyyətindən ilham alaraq gələcək nəsillərin də bu yolda inamla addımlayacağına əminliyimizi ifadə edirik.

Rauf Nəcəfəov

YAP Sədərək rayon təşkilatının məsləhətçi

Paylaş:

Baxılıb: 328 dəfə