Milli qürur və davamlı inkişafın təzahürü

Bakı:

25 °C

83 %

2 m/s

Əlaqə

AZ RU EN

Ana səhifə / YAP xəbərləri / Milli qürur və davamlı inkişafın təzahürü

Milli qürur və davamlı inkişafın təzahürü

05.05.2026 [16:56]

İlqar İlyasov

Yeni Azərbaycan Partiyası Laçın rayon təşkilatının sədri

Azərbaycanın idman salnaməsi növbəti parlaq səhifələrindən birini yazaraq bütün dünyaya xalqımızın əzmkar və qalib ruhunu bir daha nümayiş etdirdi. Albaniyanın paytaxtı Tirana şəhərində keçirilən Avropa çempionatında güləşçilərimizin komanda hesabında qazandığı möhtəşəm çempionluq ölkə ictimaiyyəti tərəfindən böyük sevinc və coşğu ilə qarşılandı. Prezident İlham Əliyevin bu böyük qələbə münasibətilə milli komandamızın üzvlərini qəbul etməsi dövlətin idmana və idmançıya verdiyi yüksək qiymətin, eləcə də şəxsi diqqətin ən bariz nümunəsidir. Dövlət başçısı milli komandamızı Tiranada qazanılmış bu böyük qələbə münasibətilə səmimi qəlbdən təbrik edərək bildirdi ki, bu uğur Azərbaycan idmanının beynəlxalq arenada nə qədər güclü mövqeyə malik olduğunun sübutudur.

Bu zəfər, əlbəttə ki, bütün xalqımızı ürəkdən sevindirir və bir daha əyani şəkildə göstərir ki, Azərbaycanda güləş ənənələri uğurla davam və inkişaf etdirilir. Güləş bizim milli idman növümüzdür və bu sahədə əldə olunan hər bir nailiyyət genetik kodumuzda daşıdığımız pəhləvanlıq ruhunun canlanmasıdır. Beynəlxalq yarışlarda, mötəbər arenalarda bizim bayrağımız ən yüksək zirvəyə qaldırılanda və dövlət himnimiz səslənəndə hər bir Azərbaycan vətəndaşı, dünya azərbaycanlıları sonsuz qürur hissi keçirir, böyük sevinclə bu tarixi anları paylaşır. Bayrağımızın dalğalanması sadəcə bir idman uğuru deyil, həm də dövlətimizin qüdrətinin və suverenliyinin rəmzi olaraq qəlbləri riqqətə gətirir.

Azərbaycan idmanının ümumi inkişaf mənzərəsinə nəzər saldıqda hər şeyin göz qabağında olduğunu, sistemli və ardıcıl islahatların bəhrə verdiyini görürük. Ölkəmizdə idman infrastrukturu müasirləşib, ən ucqar rayonlarda belə olimpiya idman kompleksləri fəaliyyət göstərir ki, bu da gənc nəslin fiziki sağlamlığının təmin olunmasında mühüm rol oynayır. Xüsusilə ölkəmizdə mütəmadi olaraq keçirilən nüfuzlu beynəlxalq idman yarışları müxtəlif idman növlərini populyarlaşdırır, uşaq və yeniyetmələrin bu sahəyə axınını stimullaşdırır. Bu dinamika gələcək qələbələrin təməlini qoyur. Dövlət başçısı qadın güləşinə də toxunaraq xüsusi inamını ifadə etdi. Əminliklə vurğulandı ki, gələcəkdə də bizim qızlarımız ən yüksək pillələrə qalxacaq, qızıl medallar qazanacaqlar. Bu məsələdə heç bir şübhənin olmaması ölkədə idmanın bütün qollarına bərabər və effektiv dəstəyin göstərilməsindən irəli gəlir.

İdmançılarımız təkcə fiziki gücləri ilə deyil, həm də yüksək mənəvi keyfiyyətləri ilə fərqlənirlər. Tanınmış idmançılar daim cəmiyyətin, xüsusilə də böyüməkdə olan gənc nəslin diqqət mərkəzindədirlər. Onların hər bir hərəkəti, davranışı minlərlə gənc üçün nümunə təşkil edir. Məhz buna görə də idmançılarımızın həm mübarizə meydanında, rəqiblərinə qarşı mübarizədə, həm də ondan kənarda, gündəlik həyatda özlərini necə ləyaqətli apardıqlarını xüsusi vurğulamaq lazımdır. Onlar Azərbaycanın ləyaqətli vətəndaşları və mənəvi dəyərlərimizin daşıyıcısı kimi cəmiyyətdə hörmət qazanırlar. Bu etik davranış və nizam-intizam çempionluq qədər dəyərlidir. Tiranadakı qələbə bir daha sübut etdi ki, Azərbaycan pəhləvanları həm fiziki, həm də mənəvi baxımdan zirvədədirlər və bu zəfər yolu hələ çox yeni uğurlara qapı açacaqdır.

Paylaş:

Baxılıb: 394 dəfə