Ulu Öndər Heydər Əliyevin siyasi irsi yalnız keçmişin deyil, həm də gələcəyin yol xəritəsidir

Bakı:

24 °C

88 %

2 m/s

AZ RU EN

Ana səhifə / YAP xəbərləri / Ulu Öndər Heydər Əliyevin siyasi irsi yalnız keçmişin deyil, həm də gələcəyin yol xəritəsidir

Ulu Öndər Heydər Əliyevin siyasi irsi yalnız keçmişin deyil, həm də gələcəyin yol xəritəsidir

06.05.2026 [16:09]

Orxan Əhmədov,

YAP Gəncə şəhər təşkilatının sədr müavini

Azərbaycan xalqı müasir dövlətimizin qurucusu, Ümummilli Lider Heydər Əliyevin anadan olmasının 103-cü ildönümünü qeyd edir. Bu əlamətdar tarix yalnız böyük bir şəxsiyyətin xatirəsinin yad edilməsi deyil, eyni zamanda onun zəngin siyasi irsinin və dövlətçilik fəlsəfəsinin yenidən dəyərləndirilməsi baxımından mühüm əhəmiyyət kəsb edir.

Müasir Azərbaycan dövlətinin qurucusu və memarı kimi tarixdə əbədi iz qoyan Heydər Əliyev Azərbaycan tarixində dövlətçilik ənənələrinin müasir dövrdə bərpasında və möhkəmləndirilməsində müstəsna rol oynamışdır. Onun siyasi fəaliyyəti yalnız konkret dövrlərlə məhdudlaşmır, bütövlükdə Azərbaycanın müstəqil inkişaf konsepsiyasının formalaşmasını əhatə edir.

XX əsrin sonlarında Azərbaycanın üzləşdiyi ağır siyasi və iqtisadi böhran şəraitində hakimiyyətə qayıdan Ümummilli Lider ölkəni parçalanmaq təhlükəsindən xilas etmiş, sabitliyin və inkişafın əsasını qoymuşdur. Bu baxımdan onun fəaliyyəti yalnız liderlik nümunəsi deyil, həm də milli xilaskarlıq missiyası kimi qiymətləndirilir.

1993-cü ildə xalqın tələbi ilə yenidən hakimiyyətə gələn Heydər Əliyev dövlət müstəqilliyinin qorunmasını prioritet vəzifə kimi müəyyənləşdirdi. Onun həyata keçirdiyi uzaqgörən siyasət nəticəsində ölkədə siyasi sabitlik bərqərar oldu, dövlət institutları möhkəmləndirildi və hüquqi dövlət quruculuğu istiqamətində mühüm addımlar atıldı. Ulu Öndərin rəhbərliyi ilə qəbul edilmiş Azərbaycan Respublikasının Konstitusiyası müasir Azərbaycanın hüquqi əsaslarını formalaşdırdı və demokratik inkişafın təməlini qoydu.

Dahi rəhbər Heydər Əliyevin iqtisadi siyasətinin əsas istiqamətlərindən biri Azərbaycanın zəngin təbii resurslarından səmərəli istifadə etmək idi. Bu strategiyanın ən parlaq nümunəsi 1994-cü ildə imzalanmış Əsrin müqaviləsi olmuşdur. Bu müqavilə Azərbaycanın dünya iqtisadi sisteminə inteqrasiyasını sürətləndirmiş, ölkəyə iri həcmli xarici investisiyaların cəlb olunmasına şərait yaratmışdır. Enerji siyasəti sonrakı illərdə Azərbaycanın iqtisadi inkişafının əsas dayaqlarından birinə çevrildi.

Ümummilli Liderin formalaşdırdığı xarici siyasət kursu balanslaşdırılmış və milli maraqlara əsaslanan yanaşma ilə seçilirdi. Heydər Əliyev Azərbaycanın beynəlxalq aləmdə etibarlı tərəfdaş kimi tanınmasına nail olmuşdur. Dahi rəhbərin təşəbbüsü ilə Azərbaycan bir çox beynəlxalq təşkilatlarla əməkdaşlığını genişləndirmiş, regional və qlobal layihələrdə fəal iştirak etməyə başlamışdır. Bu siyasət ölkənin beynəlxalq nüfuzunun artmasına mühüm töhfə vermişdir.

Müstəqil Azərbaycanın qurucusu Heydər Əliyevin ən mühüm irslərindən biri də azərbaycançılıq ideologiyasının formalaşdırılmasıdır. Bu ideologiya milli birliyin möhkəmləndirilməsi, dilin, mədəniyyətin və milli dəyərlərin qorunması istiqamətində mühüm rol oynamışdır. Dahi rəhbər Ulu öndər milli-mənəvi dəyərlərin qorunmasını dövlət siyasətinin əsas istiqamətlərindən biri kimi müəyyən etmiş, bu sahədə ardıcıl tədbirlər həyata keçirmişdir.

Bu gün Qalib ölkəmizin Qalib Lideri İlham Əliyev tərəfindən uğurla davam etdirilən siyasi kurs Ulu Öndər Heydər Əliyevin müəyyənləşdirdiyi inkişaf strategiyasına əsaslanır. Azərbaycanın əldə etdiyi nailiyyətlər – iqtisadi inkişaf, beynəlxalq nüfuzun artması və regional lider mövqeyi – bu siyasi xəttin uğurlu nəticələridir. Ulu Öndər Heydər Əliyevin siyasi irsi yalnız keçmişin deyil, həm də gələcəyin yol xəritəsidir. Azərbaycan xalqı bu irsə sadiq qalaraq dövlətçilik ənənələrini daha da inkişaf etdirmək və ölkəni yeni uğurlara aparmaq əzmindədir.

Paylaş:

Baxılıb: 410 dəfə