182 ölkədən 45 mindən artıq nümayəndənin iştirakı - Bakının növbəti qlobal mərkəzə çevrilməsi

Bakı:

28 °C

50 %

4 m/s

AZ RU EN

Ana səhifə / YAP xəbərləri / 182 ölkədən 45 mindən artıq nümayəndənin iştirakı - Bakının növbəti qlobal mərkəzə çevrilməsi

182 ölkədən 45 mindən artıq nümayəndənin iştirakı - Bakının növbəti qlobal mərkəzə çevrilməsi

22.05.2026 [14:51]

Müasir beynəlxalq münasibətlər sistemində qlobal dialoqların, humanitar, mədəni və strateji tədbirlərin mərkəzi kimi çıxış edən Azərbaycan Respublikası, dünya miqyasında özünəməxsus nüfuzunu qoruyub saxlamaqdadır. Son illərdə ölkəmizin yüksək təşkilatçılıq bacarığı ilə reallaşdırdığı irimiqyaslı layihələr, beynəlxalq birliyin diqqətini növbəti dəfə paytaxt Bakıya yönəltmişdir. Bu müstəvidə reallaşan Ümumdünya Şəhərsalma Forumunun Bakı sessiyası, bəşəriyyətin gələcək inkişaf trayektoriyasını, modern urbanizasiya və dayanıqlı şəhər mühiti çağırışlarını dünya miqyasına daşıyan mühüm bir tarixi hadisəyə çevrilmişdir.

Tədbirin rəsmi açılış mərasimində dövlət başçısı tərəfindən bəyan edilən rəsmi statistika, bu forumun nə dərəcədə nəhəng və mötəbər bir miqyasa malik olduğunu əyani şəkildə sübut edir. Dünyanın 182 ölkəsindən 45 mindən artıq qeydiyyata alınmış nümayəndənin, o cümlədən beynəlxalq səviyyəli ekspertlərin, dövlət rəsmilərinin və diplomatların bu tədbirə qatılması, Azərbaycana olan qlobal etimadın ən bariz göstəricisidir. Bakı, qlobal miqyaslı beyin mərkəzlərini bir araya gətirməklə müasir dünyanın yeni inkişaf və tərəqqi xəritəsini formalaşdırır.

Forumun əsas hərəkətverici qüvvəsi olan beynəlxalq memarlar, mühəndislər və şəhərsalma mütəxəssisləri Bakı platformasında müasir ekoloji çağırışlara cavab verən innovativ layihələri müzakirə edirlər. Xüsusilə, Azərbaycanın işğaldan azad edilmiş torpaqlarında – Qarabağ və Şərqi Zəngəzur iqtisadi rayonlarında qısa müddətdə tətbiq etdiyi Smart City (Ağıllı şəhər) və Smart Village (Ağıllı kənd) konsepsiyaları dünya elmi-praktik yaradıcılığı üçün unikal bir təcrübə və canlı laboratoriya rolunu oynayır. Beynəlxalq mütəxəssislər ölkəmizin bərpa və yenidənqurma modelini yüksək qiymətləndirərək, bu təcrübənin qlobal miqyasda tətbiqinin əhəmiyyətini vurğulayırlar.

Bakı şəhəri bu gün sadəcə zəngin tarixi və modern memarlığı birləşdirən bir paytaxt deyil, o, həm de bəşəriyyəti narahat edən qlobal problemlərin həll yollarının tapıldığı, geosiyasi və intellektual mərkəzdir. Eyni vaxtda 182 ölkənin təmsilçiliyini və logistik idarəolunmasını təmin etmək hər bir dövlətə nəsib olmayan böyük bir diplomatik uğurdur. Bu forum Bakının dayanıqlı inkişaf, yaşıl enerji və innovativ şəhər arxitekturası sahəsində dünya miqyaslı bir istinad nöqtəsinə, yəni planetin növbəti qlobal mərkəzinə çevrilməsini qətiləşdirmişdir.

Tədbirin əhatə dairəsi təkcə rəsmi iclaslarla məhdudlaşmır, həm də gənc nəslin, tədqiqatçıların və təhsil ictimaiyyətinin qlobal trendlərə inteqrasiyasına yol açır. Forum müddətində keçirilən panellər, rəqəmsal texnologiyaların şəhər idarəçiliyinə inteqrasiyası və ekoloji dayanıqlılıq mövzuları gələcək elmi araşdırmalar üçün zəngin material təqdim edir. Bu baxımdan, forum həm də böyük bir maarifçilik missiyasını yerinə yetirir, müasir dərsliklərin və təhsil proqramlarının qlobal standartlara uyğunlaşdırılması üçün intellektual baza formalaşdırır.

Yekun olaraq qeyd etmək lazımdır ki, 182 ölkədən 45 mindən artıq nümayəndənin iştirakı ilə keçirilən bu möhtəşəm forum Azərbaycanın dövlət nüfuzunu beynəlxalq arenada zirvəyə daşıyır. Memar və mühəndislərin Bakı platformasındakı həmrəyliyi gələcəyin ekoloji cəhətdən təmiz, təhlükəsiz və rəqəmsal şəhərlərinin qurulmasına mühüm töhfələr verəcəkdir. Azərbaycan bu tarixi nailiyyətlə həm özünün intellektual, təşkilati və rəqəmsal gücünü nümayiş etdirdi, həm də gələcək nəsillər üçün daha yaşanıqlı bir dünya qurmaq hədəfinə doğru silinməz bir imza atdı.

Turanə Atakişiyeva

YAP Naxçıvan şəhər təşkilatının fəal üzvü

Paylaş:

Baxılıb: 511 dəfə