Ulu Öndər Heydər Əliyevin siyasi iradəsi və fədakarlığı sayəsində Azərbaycan öz dövlətçiliyini qoruya bildi

Bakı:

24 °C

58 %

7 m/s

AZ RU EN

Ana səhifə / YAP xəbərləri / Ulu Öndər Heydər Əliyevin siyasi iradəsi və fədakarlığı sayəsində Azərbaycan öz dövlətçiliyini qoruya bildi

Ulu Öndər Heydər Əliyevin siyasi iradəsi və fədakarlığı sayəsində Azərbaycan öz dövlətçiliyini qoruya bildi

25.05.2026 [09:35]

Azərbaycan xalqının müstəqillik yolu mürəkkəb və şərəfli bir tarixə malikdir. XIX əsrin sonu və XX əsrin əvvəllərində xalqımızın qabaqcıl ziyalılarının, mütəfəkkirlərinin yaydığı milli oyanış və azadlıq duyğuları 1918-ci il mayın 28-də müsəlman Şərqində ilk demokratik, parlamentli respublika olan Azərbaycan Xalq Cümhuriyyətinin (AXC) yaranması ilə nəticələndi. Cəmi 23 ay fəaliyyət göstərməsinə baxmayaraq, Cümhuriyyət dövlət quruculuğu, iqtisadiyyat, təhsil, ordu quruculuğu və beynəlxalq səviyyədə tanınma sahələrində çox böyük işlər gördü.

1920-ci ildə bolşevik işğalı nəticəsində müstəqilliyimiz 71 illik fasiləyə məruz qalsa da, xalqımız azadlıq əzmini itirmədi. 1991-ci il oktyabrın 18-də qəbul edilmiş "Azərbaycan Respublikasının Dövlət Müstəqilliyi haqqında Konstitusiya Aktı" ilə dövlətimiz yenidən müstəqilliyini bərpa etdi və özünü 1918-1920-ci illərdəki AXC-nin varisi elan etdi. Lakin yeni bərpa edilmiş müstəqilliyin ilk illəri ölkəmiz üçün ən çətin və böhranlı sınaq dövrünə çevrildi.

SSRİ-nin dağılmasından sonra tarixi torpaqlarımıza göz dikən Ermənistanın Azərbaycana qarşı ərazi iddiaları və hərbi təcavüzü gücləndi. Bununla yanaşı, ölkə daxilindəki siyasi sabitliyin olmaması, hakimiyyət uğrunda ayrı-ayrı qruplar arasında gedən mübarizə, xaos, hərc-mərclik və dərin iqtisadi böhran gənc dövlətimizin mövcudluğunu böyük təhlükə altına qoymuşdu. Azərbaycan vətəndaş müharibəsinin astanasında idi və anarxiya mühitindən istifadə edən düşmən torpaqlarımızın 20 faizini işğal etmişdi.

Məhz belə bir ölüm-dirim savaşında, xalqın və hakim dairələrin təkidli dəvəti ilə Ulu Öndər Heydər Əliyev 1993-cü il iyunun 9-da Bakıya qayıtdı. Dahi şəxsiyyətin yenidən hakimiyyətə qayıdışı ölkənin ictimai-siyasi, sosial, iqtisadi və hərbi həyatında köklü bir dönüş yaratdı. Ulu Öndər Heydər Əliyevin siyasi iradəsi, qətiyyəti və fədakarlığı sayəsində Azərbaycan parçalanmaqdan xilas oldu və öz dövlətçiliyini qoruya bildi. Onun rəhbərliyi ilə milli mənafeləri qorumağa qadir nizami silahlı qüvvələrin yaradılması prosesi sürətləndi və 1994-cü ildə cəbhədə atəşkəs əldə olundu.

Siyasi və hərbi sabitliyin bərpası ilə yanaşı, Heydər Əliyev müstəqil Azərbaycanın iqtisadi yüksəlişini təmin edən "neft strategiyası"nı irəli sürdü. 1994-cü ilin sentyabrında imzalanan "Əsrin müqaviləsi" ölkəmizə irihəcmli investisiyaların cəlb edilməsində, beynəlxalq güclərin diqqətinin Azərbaycana yönəlməsində və ən əsası, müstəqilliyimizin qarantına çevrilməkdə həlledici rol oynadı.

Bu gün Ulu Öndərin müəyyən etdiyi müstəqil və güclü dövlət siyasəti Prezident İlham Əliyev tərəfindən uğurla davam etdirilir. Bu siyasətin zirvəsi isə 2020-ci ildə baş vermiş 44 günlük Vətən müharibəsində xalqımızın, dövlətimizin və Müzəffər Ordumuzun "bir yumruq" kimi birləşərək qazandığı tarixi Zəfər oldu. Azərbaycan Xalq Cümhuriyyətinin yadigarı olan üçrəngli bayrağımızın bu gün işğaldan azad edilmiş müqəddəs Şuşamızda və digər ərazilərdə dalğalanması Prezident İlham Əliyevin gələcək nəsillərə unudulmaz dövlətçilik əmanətidir.

Bütün bu tarixi nailiyyətlər sübut edir ki, Ümummilli Lider Heydər Əliyevin dediyi kimi: “Müstəqilliyimiz əbədidir, daimidir, dönməzdir”.

Gülnar Bəşirova – Azərbaycan Respublikası Elm və Təhsil Nazirliyinin

Maliyyə şöbəsinin maliyyə sektorunun aparıcı məsləhətçisi,

YAP Nərimanov rayon Təşkilatının fəal üzvü

Paylaş:

Baxılıb: 211 dəfə