28 May-Demokratiya və Azadlıq Yolunda Böyük Addım

Bakı:

25 °C

83 %

2 m/s

Əlaqə

AZ RU EN

Ana səhifə / YAP xəbərləri / 28 May-Demokratiya və Azadlıq Yolunda Böyük Addım

28 May-Demokratiya və Azadlıq Yolunda Böyük Addım

25.05.2026 [23:34]

28 May tarixi Azərbaycan xalqının tarixində xüsusi yer tutur. 1918-ci il mayın 28-də Azərbaycan Xalq Cümhuriyyətinin elan edilməsi tarixdə yalnız Azərbaycanın deyil, bütün Şərqin ilk demokratik, hüquqi və dünyəvi parlament respublikasının yaranması kimi tarixə düşmüşdür. 28 May tarixi xalqımızın müstəqillik arzularının inkişafı və milli dövlətçilik prinsiplərinin formalaşması fonunda mühüm əhəmiyyət kəsb edir.

XX əsrin əvvəllərində dünyada və regionda baş verən siyasi hadisələr, Rusiya imperiyasının zəifləməsi xalqlara öz müqəddəratını təyin etmək imkanı yaratmışdı. Məhz belə bir mürəkkəb siyasi irəliləyiş zamanı Azərbaycan ziyalıları və xadimləri xalqın taleyini öz üzərlərinə götürərək müstəqil dövlət qurmaq üçün toplaşdılar. 1918-ci il mayın 28-də Tiflisdə qəbul edilən İstiqlal Bəyannaməsi ilə Azərbaycan Xalq Cümhuriyyəti rəsmən elan edildi. Bu sənəd xalqın azadlıq, bərabərlik və müstəqillik ideallarını özündə əks etdirirdi.

Azərbaycan Xalq Cümhuriyyəti qısa müddətdə mühüm dövlət quruculuğu işləri həyata keçirdi. Parlament yaradıldı, dövlət atributları qəbul edildi, milli ordu formalaşdırıldı və təhsil sahəsində mühüm addımlar atıldı. Ən mühüm məqamlardan biri də demokratik prinsiplərin əsaslandırılması idi. Azərbaycan Xalq Cümhuriyyəti bütün vətəndaşlara milli və dini mənsubiyyətindən asılı olmayaraq yüksək dərəcədə hüquqlar verdi. Qadınların seçki hüququnun qorunması baxımından Azərbaycan bir çox Avropa dövlətlərini qabaqlamışdı. Bu fakt Azərbaycan Xalq Cümhuriyyətinin nə qədər müasir və qabaqcıl dövlət olduğunu göstərirdi.

Cümhuriyyət dövründə elm və təhsilə xüsusi diqqət ayrılmışdı. 1919-cu ildə Bakı Dövlət Universiteti yaradılmışdır. Xarici idarələrə nəzarət etmək üçün xüsusi əməliyyatlar həyata keçirilmişdi. Bütün bunlar cəmi 23 ay mövcud olmuş bir dövlət üçün böyük nailiyyət hesab olunur.

1920-ci ildə Azərbaycan Xalq Cümhuriyyəti süqut etsə də, onun ideyaları xalqın yaddaşında yaşamağa davam etdi. 1991-ci ildə Azərbaycan yenidən müstəqilliyini bərpa etdi. Bu gün müasir Azərbaycan dövləti də demokratik və milli dövlətçilik ənənələrini davam etdirir.

İlham Əliyev 28 May – Müstəqillik Günü və Azərbaycan Xalq Cümhuriyyətinin elan edilməsi haqqında çıxışlarında bildirib ki: müstəqil Azərbaycan dövləti özünü Azərbaycan Xalq Cümhuriyyətinin siyasi və mənəvi varisi hesab edir.

İlham Əliyev çıxışlarında qeyd edirdi ki: “Bu gün müstəqil Azərbaycan Respublikası Azərbaycan Xalq Cümhuriyyətinin varisidir və onun bütün demokratik ənənələrini yaşadır və müasir Azərbaycanın nailiyyətlərində, inkişafında məhz cümhuriyyət ideyaları və milli dövlətçilik prinsipləri dayanır”.

28 May – Müstəqillik Günü Azərbaycan xalqının azadlıq iradəsinin, dövlətçilik düşüncəsinin, milli birliyinin və dövlətçilik əzminin simvoludur. Azərbaycan Xalq Cümhuriyyəti Şərqdə ilk demokratik respublika olaraq tarixdə silinməz iz qoymuş və gələcək nəsillər üçün böyük bir miras yaratmışdır.

Nicat Əsədli

YAP Ordubad rayon təşkilatında məsləhətçi

Paylaş:

Baxılıb: 369 dəfə