Azərbaycanın Enerji Strategiyası: Milli İnkişafın və Qlobal Tərəfdaşlığın Uğur Modeli

Bakı:

23 °C

76 %

8 m/s

Əlaqə

AZ RU EN

Ana səhifə / YAP xəbərləri / Azərbaycanın Enerji Strategiyası: Milli İnkişafın və Qlobal Tərəfdaşlığın Uğur Modeli

Azərbaycanın Enerji Strategiyası: Milli İnkişafın və Qlobal Tərəfdaşlığın Uğur Modeli

02.06.2026 [14:46]

Prezident İlham Əliyevin 2026-cı il iyunun 1-də Bakı Enerji Həftəsinin rəsmi açılış mərasimində etdiyi çıxış Azərbaycanın enerji siyasətinin uğurlarını, beynəlxalq enerji bazarındakı rolunu və gələcək inkişaf perspektivlərini əhatə edən mühüm proqram xarakterli çıxış kimi diqqət çəkdi. Dövlət başçısı qeyd etdi ki, artıq ənənəvi xarakter almış Bakı Enerji Həftəsi yalnız Azərbaycan üçün deyil, bütövlükdə dünya enerji sektoru üçün mühüm platformaya çevrilib. Vaxtilə Xəzər Neft və Qaz Sərgisi adı ilə fəaliyyətə başlayan bu tədbir illər keçdikcə genişlənərək beynəlxalq enerji əməkdaşlığının əsas mərkəzlərindən biri olub. Bu gün dünyanın müxtəlif ölkələrindən dövlət rəsmiləri, enerji şirkətlərinin rəhbərləri, investorlar və ekspertlər Bakıda bir araya gələrək enerji təhlükəsizliyi, yaşıl enerji və yeni əməkdaşlıq imkanlarını müzakirə edirlər.

Çıxışda vurğulanan əsas məqamlardan biri Azərbaycanın müasir enerji tarixinin başlanğıc mərhələsi ilə bağlı oldu. Prezident İlham Əliyev qeyd etdi ki, 1994-cü ildə “Əsrin müqaviləsi”nin imzalanması və sonrakı illərdə həyata keçirilən layihələr ölkənin iqtisadi inkişafının əsasını qoyub. Həmin dövrdə Azərbaycan mürəkkəb siyasi və iqtisadi şəraitdə idi. Dövlət müstəqilliyini yeni bərpa etmiş ölkə ciddi maliyyə çətinlikləri, işğal problemi və sosial böhranla üzləşmişdi. Lakin uzaqgörən enerji strategiyası sayəsində bu çətinliklərin öhdəsindən gəlmək mümkün oldu. Xarici sərmayələrin cəlb edilməsi və enerji sektorunun inkişafı ölkənin gələcək inkişafına güclü təkan verdi.

Prezident çıxışında Azərbaycanın enerji gəlirlərindən səmərəli istifadə etdiyini xüsusi vurğuladı. Neft və qaz satışından əldə olunan vəsaitlər ölkənin sosial və iqtisadi inkişafına yönəldilib. Müasir yolların, məktəblərin, xəstəxanaların tikilməsi, infrastrukturun yenilənməsi, regionların inkişafı və insanların rifahının yüksəldilməsi bu siyasətin nəticəsidir. Azərbaycanın əldə etdiyi uğurlar təbii sərvətlərin düzgün idarə olunmasının bariz nümunəsi kimi qiymətləndirilir. Dövlət başçısı bildirdi ki, ölkələr malik olduqları sərvətlərə görə deyil, həmin sərvətlərdən necə istifadə etdiklərinə görə qiymətləndirilməlidirlər.

Çıxış zamanı enerji təhlükəsizliyi məsələlərinə də geniş yer ayrıldı. Prezident qeyd etdi ki, hazırda dünyada enerji təhlükəsizliyi qlobal sabitliyin əsas şərtlərindən biridir. Azərbaycan uzun illər ərzində həyata keçirdiyi layihələrlə Avropanın və digər regionların enerji təhlükəsizliyinə mühüm töhfə verib. Xəzər dənizindən Avropaya uzanan enerji dəhlizləri bu baxımdan strateji əhəmiyyət daşıyır. Azərbaycanın təşəbbüsü və tərəfdaş ölkələrin dəstəyi ilə reallaşdırılan layihələr enerji resurslarının etibarlı və təhlükəsiz şəkildə dünya bazarlarına çatdırılmasını təmin edir.

Bu gün Azərbaycan enerji siyasətində yeni mərhələyə qədəm qoyub. Neft və qaz layihələri ilə yanaşı, yaşıl enerji sektoruna da böyük sərmayələr yatırılır. Günəş, külək və hidroenerji layihələri ölkənin enerji balansının şaxələndirilməsinə xidmət edir. Qarabağ və Şərqi Zəngəzur bölgələrində həyata keçirilən layihələr Azərbaycanın yaşıl enerji strategiyasının mühüm hissəsidir. Bütün bunlar göstərir ki, ölkəmiz həm ənənəvi enerji sahəsində, həm də bərpaolunan enerji istiqamətində qlobal miqyasda etibarlı və məsuliyyətli tərəfdaş kimi çıxış edir.

Rövşən Qasımov,

YAP Gədəbəy rayon təşkilatının məsləhətçisi

Paylaş:

Baxılıb: 226 dəfə