Müstəqilliyimizi İtirilmək Təhlükəsindən Xilas Edən Tarixi Dönüş: 15 İYUN

Bakı:

25 °C

83 %

4 m/s

AZ RU EN

Ana səhifə / YAP xəbərləri / Müstəqilliyimizi İtirilmək Təhlükəsindən Xilas Edən Tarixi Dönüş: 15 İYUN – MİLLİ QURTULUŞ GÜNÜ

Müstəqilliyimizi İtirilmək Təhlükəsindən Xilas Edən Tarixi Dönüş: 15 İYUN – MİLLİ QURTULUŞ GÜNÜ

11.06.2026 [11:43]

Hər bir xalqın tarixində onun taleyini dəyişən, milli dövlətçiliyini yox olmaq təhlükəsindən xilas edən və gələcəyə aparan yolları işıqlandıran elə dönüş nöqtələri var ki, onlar zaman keçdikcə daha böyük dəyər qazanır. Azərbaycan xalqının çoxəsrlik dövlətçilik salnaməsində belə müstəsna və şərəfli tarixi mərhələnin başlanğıcı 15 İyun – Milli Qurtuluş Günüdür. Bu tarixi gün sadəcə təqvim silsiləsində bir bayram deyil, bütöv bir millətin uçurumun kənarından dönərək öz varlığını bərqərar etdiyi dövlətçilik rəmzidir.Görkəmli dövlət xadimi Heydər Əliyevin ifadəsi ilə desək, "Müstəqilliyin qorunub saxlanılması onun qazanılmasından qat-qat çətindir". 1991-ci ildə müstəqilliyini yenidən bərpa edən Azərbaycan, təəssüf ki, ilk illərdə çox ağır sınaqlarla üz-üzə qaldı. 1993-cü ilin yayına gəldikdə, ölkədəki vəziyyət artıq kritik həddə çatmışdı.Bir tərəfdən Ermənistanın hərbi təcavüzü nəticəsində torpaqlarımızın ard-arda işğal olunması, digər tərəfdən isə ölkə daxilindəki qanunsuz silahlı qruplaşmaların hakimiyyət davası respublikanı idarəolunmaz vəziyyətə salmışdı. Gəncədə baş qaldıran qiyam ölkəni vətəndaş müharibəsinin astanasına gətirmişdi. Eyni zamanda, bəzi qüvvələrin separatizm meyllərini alovlandırmaq cəhdləri Azərbaycanı parçalanmaq və dünya xəritəsindən silinmək təhlükəsi ilə qarşı-qarşıya qoymuşdu. Siyasi savadsızlıq, iqtisadi iflic və daxili xaos xalqı tamamilə ümidsizliyə sürükləmişdi.

Belə bir taleyüklü məqamda Azərbaycan xalqı öz gələcəyini yalnız zəngin dövlətçilik təcrübəsinə, sarsılmaz iradəyə və uzaqgörən fəhmə malik olan böyük rəhbər Heydər Əliyevin qayıdışında görürdü. Xalqın təkidli tələbi və ölkə rəhbərliyinin dəvəti ilə Bakıya gələn dahi şəxsiyyət böyük məsuliyyəti öz üzərinə götürdü.15 İyun 1993-cü ildə Heydər Əliyev Azərbaycan Respublikası Ali Sovetinin Sədri seçildi. Məhz bu hadisə ölkədəki qanunsuzluğa, anarxiyaya və geosiyasi rəqabətin yaratdığı xaosun üzərinə çəkilən qətiyyətli bir xətt oldu. Bu qayıdış xalqın sınmış inamını özünə qaytardı, dövlətlə millətin birliyini təmin etdi.

Bu gün zamanın ucalığından geriyə nəzər salarkən tam əminliklə və qürurla demək olar ki, Milli Qurtuluş Günü sadəcə bir xalqı xaosdan xilas edən təqvim günü deyil. Bu tarix, XXI əsrin qüdrətli, qalib və dünyada söz sahibi olan müasir Azərbaycanının ideoloji, siyasi və strateji təməl daşıdır. Əgər 1993-cü ilin o müqəddəs iyun günlərində xalqın iradəsi və Ulu Öndər Heydər Əliyevin qətiyyəti qalib gəlməsəydi, bu gün nə qlobal enerji layihələrindən, nə beynəlxalq arenada nüfuzlu tərəfdaş kimi tanınan müstəqil xarici siyasətdən, nə də ən əsası, bütöv bir Azərbaycandan danışmaq mümkün olardı. Məhz o dövrdə qazanılan daxili sabitlik və milli birlik mühiti, dövlətimizin iqtisadi və hərbi onurğa sütununu formalaşdırdı.

Bu tarixi qurtuluş fəlsəfəsinin məntiqi davamı olaraq, Azərbaycan illər sonra özünün ən parlaq tarixi zirvəsinə ucaldı. 15 İyunda əsası qoyulan güclü dövlət, sarsılmaz ordu və milli həmrəylik strategiyası xalqımızı rəşadətli Müzəffər Ali Baş Komandan İlham Əliyevin rəhbərliyi altında Şanlı Zəfərə yetirdi. Otuz illik torpaq həsrətinə son qoyulması, ərazi bütövlüyümüzün və suverenliyimizin tam bərpa edilməsi məhz Milli Qurtuluş Gününün yaratdığı möhkəm zəmindən qaynaqlanır.

Bu gün, keçmişimizin acı dərslərindən nəticə çıxararaq gələcəyə inamla baxmağın, müstəqilliyimizi göz bəbəyi kimi qorumağın rəmzidir. Azərbaycan xalqı hər il bu bayramı sadəcə bir tarixi hadisə kimi deyil, öz milli ləyaqətinin, sarsılmaz iradəsinin və əbədi müstəqillik eşqinin ən parlaq təntənəsi kimi qeyd edir.

Nicat Ələkbərov

YAP Şahbuz rayon təşkilatının sədr müavini

Paylaş:

Baxılıb: 453 dəfə