Türk dünyasının təhlükəsizliyi və birliyi: ortaq gələcəyə gedən yol

Bakı:

24 °C

88 %

0 m/s

Əlaqə

AZ RU EN

Ana səhifə / YAP xəbərləri / Türk dünyasının təhlükəsizliyi və birliyi: ortaq gələcəyə gedən yol

Türk dünyasının təhlükəsizliyi və birliyi: ortaq gələcəyə gedən yol

22.09.2026 [19:37]

Müasir dünyanın siyasi mənzərəsi sürətlə dəyişir. Beynəlxalq münasibətlər sistemində yeni reallıqların formalaşdığı, təhlükəsizlik çağırışlarının sərhəd tanımadığı bir dövrdə dövlətlər üçün ən böyük güc yalnız malik olduqları resurslarda deyil, həm də bir-birinə söykənmək, qarşılıqlı etimad və həmrəylik nümayiş etdirmək bacarığındadır. Bu baxımdan Türk Dövlətləri Təşkilatının (TDT) inkişaf edən əməkdaşlıq modeli xüsusi əhəmiyyət daşıyır. Sentyabrın 17-də Azərbaycan Respublikasının Prezidenti, Müzəffər Ali Baş Komandan cənab İlham Əliyevin Türk Dövlətləri Təşkilatına üzv ölkələrin təhlükəsizlik üzrə rəhbər şəxslərini qəbul edərkən səsləndirdiyi fikirlər Türk dünyasının qarşısında dayanan vəzifələri bir daha aydın şəkildə ortaya qoydu. Dövlətimizin başçısının çıxışı göstərdi ki, TDT artıq yalnız ortaq tarix, dil və mədəniyyət üzərində qurulan əməkdaşlıq platforması deyil, eyni zamanda beynəlxalq təhlükəsizlik, nəqliyyat, enerji, iqtisadiyyat və humanitar əlaqələr baxımından mühüm potensiala malik təşkilatdır. Azərbaycanın bu prosesdəki rolu isə xüsusi diqqətə layiqdir. Prezident İlham Əliyevin qeyd etdiyi kimi, ölkəmiz Avropa ilə Asiyanın qovşağında yerləşərək həm Mərkəzi Asiya dövlətləri, həm də Türkiyə ilə sıx qarşılıqlı əlaqələr qurur. Ərazimizdən keçən mühüm enerji və nəqliyyat dəhlizləri Azərbaycanın yalnız milli deyil, regional və beynəlxalq təhlükəsizlik məsələlərində də mühüm rol oynadığını göstərir. Enerji və nəqliyyat təhlükəsizliyinin artıq ümumi təhlükəsizliyin ayrılmaz hissəsinə çevrildiyi bir şəraitdə bu imkanların əhəmiyyəti daha da artır. Bu gün Türk dünyasının qarşısında dayanan əsas məsələlərdən biri də təhlükəsizlik sahəsində əməkdaşlığın daha da dərinləşdirilməsidir. Dövlətimizin başçısının vurğuladığı kimi, təhlükəsizlik qurumları arasında məlumat və təcrübə mübadiləsinin gücləndirilməsi, mümkün təhdidlərin əvvəlcədən müəyyənləşdirilməsi və onların qarşısının alınması istiqamətində əlaqələndirilmiş fəaliyyət böyük əhəmiyyət daşıyır. Çünki sabitlik olmadan nə iqtisadi inkişaf, nə investisiya, nə texnologiya, nə də sosial rifah davamlı ola bilər. Azərbaycanın öz tarixində bu həqiqətin nə qədər böyük əhəmiyyət daşıdığını yaxşı bilirik. Ulu Öndər Heydər Əliyevin uzaqgörən siyasəti ilə əsası qoyulan dövlətçilik xətti bu gün Prezident İlham Əliyev tərəfindən yeni çağırışlara uyğun şəkildə uğurla davam etdirilir. Məhz güclü dövlət, milli həmrəylik və xalq-iqtidar birliyi Azərbaycanın həm regional, həm də beynəlxalq müstəvidə mövqelərini möhkəmləndirən əsas amillərdəndir.
Prezident İlham Əliyevin çıxışında diqqət çəkən mühüm məqamlardan biri də Türk dünyasını birləşdirən mənəvi bağların xüsusi vurğulanmasıdır. Ortaq tarix, dil, mədəniyyət və etnik köklər yalnız keçmişimizi xatırladan dəyərlər deyil, həm də gələcəyimizi birlikdə qurmaq üçün möhkəm təməldir. Dövlətimizin başçısının “Türk dünyası bizim ailəmizdir” fikri bu münasibətlərin mahiyyətini çox aydın ifadə edir. Bu ailənin gələcəyi isə gənclərdən keçir. Prezident İlham Əliyev çıxışında gənc nəslin vətənpərvərlik, milli prinsiplərə və mənəvi dəyərlərə sədaqət ruhunda yetişdirilməsinin vacibliyini xüsusi qeyd etdi. TDT çərçivəsində gənclər təşkilatlarının qarşılıqlı əlaqələrinin genişləndirilməsi, forumların, konfransların və müxtəlif tədbirlərin keçirilməsi xalqlarımızın gənc nümayəndələrinin bir-birini daha yaxından tanımasına, ortaq dəyərləri yaşatmasına mühüm töhfə verə bilər. Əslində, Türk dünyasının gələcək gücü yalnız iqtisadi və siyasi imkanlarla ölçülmür. Bu güc həm də insanların qəlbində yaşayan qardaşlıq duyğusundan, ortaq dəyərlərə sədaqətdən və gələcəyə eyni inamla baxmaqdan qaynaqlanır. Bu gün Bakıda keçirilən hər bir belə tədbir həmin mənəvi bağların daha da möhkəmləndiyini nümayiş etdirir. Azərbaycanın təşəbbüsü ilə TDT çərçivəsində qeyri-rəsmi Zirvə görüşlərinin keçirilməsinə başlanılması da dövlət başçımızın təşkilatın fəaliyyətinin daha çevik və səmərəli qurulmasına verdiyi önəmin göstəricisidir. Prezident İlham Əliyevin vurğuladığı kimi, dövlət başçılarının daha sıx təmasda olması ümumi maraqların və ortaq planların həyata keçirilməsinə yeni imkanlar yaradır. Bu gün qarşımızda duran hədəf aydındır: Türk Dövlətləri Təşkilatının potensialından maksimum istifadə etmək, onun beynəlxalq arenadakı rolunu daha da gücləndirmək və təşkilatı dünyanın aparıcı beynəlxalq institutlarından birinə çevirmək. Bu, sadəcə siyasi məqsəd deyil, eyni zamanda ortaq tarixə və gələcəyə sahib xalqlar qarşısında duran tarixi məsuliyyətdir. Azərbaycan bu yolda öz sözünü deməyə davam edir. Prezident İlham Əliyevin rəhbərliyi ilə ölkəmizin həyata keçirdiyi ardıcıl və məqsədyönlü siyasət Türk dünyasının birliyinin möhkəmləndirilməsinə, regionda sülhün və təhlükəsizliyin təmin olunmasına mühüm töhfələr verir. İnanırıq ki, bu gün əsası daha möhkəm təməllər üzərində qoyulan Türk dünyasının birliyi gələcək nəsillərə daha güclü, daha təhlükəsiz və daha həmrəy bir coğrafiya miras qoyacaq. Çünki tarix bizi birləşdirib, ortaq dəyərlər bizi yaxınlaşdırıb, gələcəyə dair ümumi məqsədlər isə bizi eyni istiqamətdə addımlamağa çağırır.

Səfa Ağayev
YAP İmişli rayon təşkilatının sədri

Paylaş:

Baxılıb: 85 dəfə