Çin nümayəndə heyəti Yeni Azərbaycan Partiyasının üzvü Mübariz Abdullayevin qonağı olub

Bakı:

25 °C

83 %

5 m/s

Əlaqə

AZ RU EN

Ana səhifə / YAP xəbərləri / Çin nümayəndə heyəti Yeni Azərbaycan Partiyasının üzvü Mübariz Abdullayevin qonağı olub

Çin nümayəndə heyəti Yeni Azərbaycan Partiyasının üzvü Mübariz Abdullayevin qonağı olub

24.07.2019 [09:35]

İyulun 23-də ölkəmizdə səfərdə olan Çin Kommunist Partiyası Mərkəzi Komitəsinin Beynəlxalq əlaqələr şöbəsinin müdiri Sun Taonun rəhbərlik etdiyi nümayəndə heyəti Yeni Azərbaycan Partiyasının (YAP) üzvü Mübariz Abdullayevin ailəsinin qonağı olub.
Sadə bir Azərbaycan vətəndaşının ailəsi və sosial həyatı ilə tanışlıq xarakteri daşıyan bu görüşdə əvvəlcə qonağı salamlayan Mübariz Abdullayev Çin xalqına dərin hörmətini dilə gətirərək hələ gənc yaşlarından bu ölkənin və xalqın adət-ənənələri ilə maraqlandığını deyib. O, Çində xalq təbabətinin geniş inkişaf etdiyini xatırladıb və indiyə qədər böyük həvəslə oxuduğu Çin dilindən tərcümə olunan “Ağıl mücrüsü” kitabından sitat gətirərək oradakı dərin fəlsəfədən yararlandığını deyib.
Azərbaycanın da Çin dövləti kimi çox böyük tarixə malik olduğunu qeyd edən Çin nümayəndə heyətinin rəhbəri Sun Tao isə öz növbəsində xalqlarımız arasında tarixi əlaqələrdən, ümumi Şərq mədəniyyətinin çalarlarını özündə əks etdirən adət-ənənələrdən, Böyük İpək yolunun yenidən bərpa olunmasından bəhs edib.
Sun Tao Azərbaycan Respublikası ilə Çin Xalq Respublikası arasında bütün sahələrdə inkişaf etməkdə olan münasibətlərin, hər iki ölkə rəhbərliyinin bu istiqamətdə həyata keçirdiyi siyasətin xalqlarımızın mənafeyinə uyğun olduğunu xüsusilə diqqətə çatdırıb. Eyni zamanda, S.Tao hər iki dövlət və hakim partiyalar arasında münasibətlərin inkişaf etməsindən məmnunluğunu dilə gətirib.
YAP-a üzv olması barədə qonağın sualına cavab olaraq M.Abdullayev bildirib ki, övladları da partiya üzvüdür, xalqımızın Ümummilli Lideri Heydər Əliyevə olan məhəbbət onu və ailəsini bu partiyaya gətirib. Qonaq isə öz növbəsində M.Abdullayevin və ailəsinin partiyaya belə sədaqətini yüksək qiymətləndirdiyini söyləyib.
YAP Nəsimi rayon təşkilatının sədri, Milli Məclisin deputatı Məlahət İbrahimqızı isə YAP-ın hər bir üzvünün Çin nümayəndə heyətini evində qəbul etməyə hazır olduğunu dilə gətirərək Mübariz Abdullayevin mənzilində çay süfrəsi arxasında keçirilən bu görüşün qonaqlarda da xoş təəssürat yaratdığını qeyd edib.
Daha sonra Çin nümayəndə heyətinin rəhbəri Sun Tao M.Abdullayevin ailə üzvləri ilə tanış olub, M.Abdullayevin Çin xalqına və dövlətinə böyük marağını nəzərə alaraq özü və 1 nəfər ailə üzvünün Çinə səfərini təşkil edəcəyini bildirib. Sonda M.Abdullayev və Sun Tao bir-birlərinə hədiyyə veriblər. Eyni zamanda, YAP Nəsimi rayon təşkilatı tərəfindən də qonaqlara hədiyyələr təqdim olunub.
Qeyd edək ki, görüşdə Çin Xalq Respublikasının ölkəmizdə yeni təyin olunmuş fövqəladə və səlahiyyətli səfiri xanım Qo Min, Azərbaycanın Çin Xalq Respublikasında fövqəladə və səlahiyyətli səfiri Əkrəm Zeynallı, YAP Beynəlxalq əlaqələr şöbəsinin müdiri, Milli Məclisin deputatı Sevinc Fətəliyeva və Çin nümayəndə heyətinin üzvləri də iştirak ediblər.
Qaşqay ZİYƏDDİNOĞLU

Paylaş:

Baxılıb: 1136 dəfə