Dünya Azərbaycanlılarının həmrəyliyi daimidir, əbədidir

Bakı:

17 °C

77 %

2 m/s

Əlaqə

AZ RU EN

Ana səhifə / YAP xəbərləri / Dünya Azərbaycanlılarının həmrəyliyi daimidir, əbədidir

Dünya Azərbaycanlılarının həmrəyliyi daimidir, əbədidir

28.12.2022 [13:22]

Azərbaycana, el-obaya məhəbbət, milli birlik milli-mənəvi dəyərlərimizə hörmət, Vətənə bağlılıq hisslərini özündə təcəssüm etdirən Dünya Azərbaycanlılarının Həmrəyliyi Günü dünyanın harasında yaşamasından asılı olmayaraq hər bir soydaşımız üçün ən mühüm bayramdır. Əsası Azərbaycan xalqınının Ümummilli Lideri Heydər Əliyev tərəfindən 1989-cu il dekabrın axırlarında Naxçıvanda sərhədlərin (SSRİ-İran sərhədləri) dağılması zamanı qoyulan Dünya Azərbaycanlılarının Həmrəyliyi Günü bütün azərbaycanlılar üçün əzizdir. Ulu Öndərin siyasi hakimiyyətinin Naxçıvan mərhələsində milli mənlik, milli kimlik tariximizdə atdığı cəsarətli addımlar içərisində Dünya Azərbaycanlılarının Həmrəyliyi Gününün təsis edilməsinin əhəmiyyətli yeri var.

Bu fikirləri açıqlamasında YAP Gəncə şəhər təşkilatının sədri Ramil Orucov bildirib. O, qeyd edib ki, hər zaman müstəqil Azərbaycan dövlətinin əsas ideyasının azərbaycançılıq olduğunu qətiyyətlə müdafiə edən Ulu Öndər Heydər Əliyev Azərbaycançılığı milli ideologiyaya çevirməklə cəmiyyətimizdə həmrəyliyə nail olmağı bacardı. Məhz dahi şəxsiyyətin millətindən, dinindən, dilindən asılı olmayaraq kökləri ilə Azərbaycana bağlı olan, özünü azərbaycanlı sayan hər kəsi vahid ideya ətrafında birləşdirdi, milli həmrəyliyimizlə bağlı düzgün konsepsiya yaratdı.

Dünya azərbaycanlıları üçün sarsılmaz ideoloji bünövrə yaradan, dünyanın harasında yaşamasından asılı olmayaraq ümummilli mənafeyimizə xidmət edəcək mənəvi öhdəlikləri dəqiq müəyyənləşdirən Ulu Öndər həmvətənlərimizi daim milli ideya ətrafında birləşməyə, təşkilatlanmağa çağırırdı. "Siz düşünməyin ki, Azərbaycan bizim üçün nə edib, düşünün ki, biz Azərbaycan üçün nə etmişik. Onda Azərbaycan da irəli gedər, Azərbaycan diasporu da inkişaf edər"- deyə Ulu Öndər qeyd edirdi.

"Harada doğulmağın fərqi yoxdur, əsas odur ki, sən azərbaycanlısan, Azərbaycan dilinin, mədəniyyətinin daşıyıcısısan". Azərbaycanlı olması ilə ömür boyu fəxr etmiş, hər zaman bunu iftixarla söyləmiş milli qürur mənbəyimiz olan Ulu Öndər Heydər Əliyevin bu sözləri hər bir azərbaycanlının milli birliyə, vahid ideya ətrafında birləşməsinə çağırış idi.

Ramil Orucov onu da vurğulayıb ki, dünya azərbaycanlıları parlaq Zəfərimizdən sonra 2022-ci il aprelin 22-23-də V qurultaylarını Qarabağda, mədəniyyət paytaxtımızda, Şuşada keçirdilər. 65 ölkədən 400-dən çox diaspor nümayəndəsi və qonağın iştirak etdiyi böyük rəmzi məna daşıyan Zəfər qurultayında dünya azərbaycanlıları bir daha öz sarsılmaz və əbədi həmrəyliklərini dünyaya bəyan etdilər.

Dahi şəxsiyyət Heydər Əliyevin uğurlu təməlini qoyduğu azərbaycançılıq ideyası, milli birlik və bərabərliyimiz ölkə Prezidenti cənab İlham Əliyevin dəqiq müəyyənləşdirdiyi strategiya üzrə inkişaf edib. Milli həmrəyliyimizin nümayişini 44 günlük Vətən müharibəsində əyani şəkildə gördük. Azərbaycanın Zəfəri ilə bitən, milli həmrəyliyimizin təntənəsinə çevrilən Vətən müharibəsində dünya azərbaycanlıları bir amal ətrafında tarixin heç bir dönəmində olmadığı kimi birləşdi, həmrəy oldu. Xüsusilə də soydaşlarımız beynəlxalq aləmə səsimizi çatdırmaq üçün informasiya müharibəsində mühüm xidmət göstərdilər. Azərbaycan xalqının milli birliyi sayəsində işğalçı Ermənistan məğlubiyyətə uğradı, işğal altında qalan torpaqlarımız azad edildi, ölkə Prezidentimiz, Ali Baş Komandan cənab İlham Əliyevin çevik, praqmatik siyasəti sayəsində mənfur düşmən kapitulyasiya bəyanatına imza atmağa məcbur edildi.

44 günlük Vətən müharibəsində milli həmrəyliyimizi dünyaya yüksək səviyyədə nümayiş etdirən soydaşlarımızın hər il Azərbaycan xalqının birlik şüarının simvolik gününü dekabrın 31-i Dünya Azərbaycanlılarının Həmrəylik Gününü böyük həvəs və coşqu ilə qeyd etmələri ildən-ilə daha geniş vüsət alır.

“...Qoy çaylarımız qurumasın! Qoy ağaclarımız kəsilməsin! Qoy çırağımız sönməsin!..” 2001-ci il noyabrın 9-da Dünya Azərbaycanlılarının I Qurultayında Ulu Öndər Heydər Əliyevin yer üzündəki bütün azərbaycanlılara ünvanlandığı bu xoş arzular, diləklər, ölkəmizin, xalqımızın xoş məramı, saf niyyəti, əmin- amanlıq istəyi bu gün də öz aktuallığını qoruyur.

“Milli maraqlar uğrunda həmrəy olan soydaşlarımızın, Azərbaycanı özünə tarixi Vətən bilən hər bir şəxsin həmrəylik nümayiş etdirməsi olduqca qürurvericidir” – deyə YAP Gəncə şəhərinin sədri Ramil Orucov qeyd edib.

Paylaş:

Baxılıb: 427 dəfə