Azərbaycan yaşıl enerjiyə keçid prosesinin aktiv fazasındadır

Bakı:

24 °C

45 %

1 m/s

Əlaqə

AZ RU EN

Ana səhifə / YAP xəbərləri / Azərbaycan yaşıl enerjiyə keçid prosesinin aktiv fazasındadır

Azərbaycan yaşıl enerjiyə keçid prosesinin aktiv fazasındadır

05.03.2024 [12:42]

Cənub Qaz Dəhlizi Məşvərət Şurası çərçivəsində nazirlərin 10-cu və Yaşıl Enerji Məşvərət Şurası çərçivəsində nazirlərin 2-ci iclaslarında çıxışı zamanı Prezident İlham Əliyev diqqətə çatdırdı ki, Cənub Qaz Dəhlizi artıq 3 ildir ki, fəaliyyətdədir. Bu layihə həqiqətən də uğur hekayəsidir və Avrasiyada ən böyük infrastruktur layihələrindən biridir. Uzunluğu 3500 kilometr olan inteqrasiya edilmiş boru kəməri sistemi olan bu layihə enerji təhlükəsizliyi və əməkdaşlıq layihəsidir. Cənub Qaz Dəhlizinin keçdiyi marşrut boyunca yerləşən bütün ölkələr arasında əməkdaşlıq olmasa, bu layihənin həyata keçirilməsi mümkün olmazdı.

Ölkə başçısı çıxışında qeyd etdi ki, neft və təbii qaz ehtiyatları ilə zəngin olan ölkələrə münasibətdə ədalətli olmalıyıq. Bu ölkələrin günahı deyil ki, onlarda neft və qaz var. Onlar buna görə günahlandırılmamalı və onlara qarşı ayrı-seçkilik olmamalıdır. Qazıntı yanacağına malik olan ölkələrin fəaliyyəti onların ətraf mühitin müdafiəsi, yaşıl enerjiyə keçid məsələlərini necə həll etdikləri baxımından qiymətləndirilməlidir. Yalnız ədalətli təhlildən sonra bu ölkələr barədə mühakimə yürütmək olar. Əks təqdirdə, neft və qaz istehsal edən ölkələr və bu resurslara malik olmayan ölkələr arasında sanki ayırıcı xətlər görəcəyik.

Layihələrin maliyyələşməsindən bəhs edərkən Prezident İlham Əliyev qeyd etdi ki, Cənub Qaz Dəhlizinin genişlənməsinin və təbii qaza aid istənilən digər layihənin maliyyələşməsi elə bir şəkildə aparılmalıdır ki, əsas hədəflərə mane olmasın. Avropada Azərbaycan qazına böyük tələbat var idi və olmaqda qalır. Azərbaycana bir çox ölkələr müraciət etmişdir və artıq altı ölkə ölkəmizdən təbii qazı alır. Eyni zamanda, əlavə bir neçə ölkə ilə danışıqlar aparılır. Ölkə başçısı diqqətə çatdırdı ki, qaza tələbat var, resurslarımız və müvafiq infrastrukturumuz da var. Avropa maliyyə institutlarının maliyyələşməsi real yanaşmaya əsaslanmalıdır və ümumi hal almış qazıntı yanacağına qarşı meyillərin kölgəsi altına düşməməlidir.

Cənub Qaz Dəhlizi Məşvərət Şurası çərçivəsində nazirlərin 10-cu və Yaşıl Enerji Məşvərət Şurası çərçivəsində nazirlərin 2-ci iclaslarında çıxışı zamanı Prezident İlham Əliyev onu da vurğuladı ki, Azərbaycan yaşıl enerjiyə keçid prosesinin aktiv fazasındadır. Lakin, heç kim bu faktı dana bilməz ki, ən azından yaxın gələcəkdə qazıntı yanacağı olmadan dünya inkişaf edə bilməz.

Çıxışında Prezident İlham Əliyev COP29-un ölkəmizdə keçiriləcəyinə diqqət çəkərək mühüm məqamlara da münasibət bildirdi. Ölkə başçısı qeyd etdi ki, Azərbaycana COP29-a sahiblik edən ölkə olmaq şərəfi nəsib olmuşdur. Keçən ilin dekabrında qərar qəbul olunan kimi ölkəmiz dərhal, yalnız bir səbəbdən müxtəlif QHT-lər və media təşkilatlarının hücumuna məruz qaldıq. Hücum edərək dedilər ki, necə ola bilər qazıntı yanacağı ilə zəngin olan bir ölkə COP-a ev sahibliyi edə bilər. İqlim dəyişmələri ilə bağlı olan qlobal tədbirə ev sahibliyi etmək istəyinin olması faktı Azərbaycan dövlətinin iradəsini nümayiş etdirir. Buna görə ölkəmizə hücum edilməməlidir, əksinə Azərbaycanın bu təşəbbüsü təqdir edilməlidir. Əvvəlki illərdə Azərbaycana qarşı çoxlu hücumlar olmuşdur, Azərbaycan buna adət edib və özünü müdafiə edə bilir. COP29-un Azərbaycanda təşkil edilməsi qərarı, yekdil qərar beynəlxalq birliyin ölkəmizə hörmətinin əlamətidir. Ölkəmizin tədbirə ev sahibliyi etmək, bu işə töhfə vermək istəyi Azərbaycanın yaşıl gündəliyini nümayiş etdirir.

Əlişah Rəcəbov

YAP Ağdaş rayon təşkilatının sədri

Paylaş:

Baxılıb: 583 dəfə