58-ci Münhen Təhlükəsizlik Konfransı işə başladı

Bakı:

27 °C

42 %

3 m/s

Əlaqə

AZ RU EN

Ana səhifə / Xəbər lenti / 58-ci Münhen Təhlükəsizlik Konfransı işə başladı

58-ci Münhen Təhlükəsizlik Konfransı işə başladı

19.02.2022 [00:02]

Əsas prioritet Rusiya - Ukrayna problemidir

Pərviz SADAYOĞLU

Avro-Atlantik təhlükəsizlik məsələləri üzrə ən böyük forum hesab edilən Münhen Təhlükəsizlik Konfransı dünən öz işinə başlayıb. Almaniyanın Münhen şəhərində keçirilən və sayca 58-ci toplantı olan tədbir ənənəvi formatda keçirilir. Ötən il pandemiya səbəbindən konfrans onlayn formatda keçirilib. Bu il “omikron gərginliyi” dalğasına baxmayaraq, təşkilatçılar təhlükəsizlik sahəsində siyasətçilərin şəxsi görüşlərinə “böyük ehtiyac” olduğunu deyərək, adi rejimə qayıtmaq qərarına gəliblər. Konfrans epidemiya əleyhinə sərt tədbirlərə riayət olunmaqla fevralın 18-dən 20-dək keçiriləcək. İştirakçıların adi sayının 2000-dən çox olması əvəzinə, indi 600-dən çox olmasına icazə verilmir. Tədbirdə iştirak etmək üçün qeyd edilən 600 nəfərdən çox siyasətçi, iqtisadçı və elm adamı Almaniyaya gəlib. 2 günlük konfransda 35 ölkənin dövlət və hökumət başçıları da iştirak edəcək. Ukrayna ətrafında yaranmış vəziyyət konfransın əsas müzakirə mövzuları arasında yer alır. Bununla yanaşı, dünyada sülhün və təhlükəsizliyin təminatına təhdid sayılan bir sıra problemlər də konfrans iştirakçıları tərəfindən müzakirə oluna bilər.

Tədbirdə ən önəmli hadisələrdən biri Rusiyanın iştirakdan imtina etməsidir. Kremlin siyasi “rəqibi” statusunda çıxış edən qütb isə budəfəki konfransda daha geniş heyətlə təmsil olunur. Konfransın sədri Volfqanq İşinqer Rusiya prezidenti Putini də videokonfrans vasitəsilə dünya liderləri ilə danışaraq öz mövqeyini bildirməyə dəvət etsə də, onun bu çağırışı cavabsız qalıb.

Məsələ ilə bağlı fikirlərini bölüşən politoloq Qabil Hüseynli bildirib ki, 20 ildən artıqdır ki, keçirilən Münhen Təhlükəsizlik Konfransı bu istiqamətdə keçirilən tədbirlər içində ən məşhurudur. Bu konfrans Avropa, eləcə də qlobal miqyasda təhlükəsizlik tədbirlərini nəzərdən keçirir. Konfransda bir sıra dövlətlərin başçılarının, siyasətçilərin aktual problemlərin həlli ilə bağlı mülahizələri dinlənilir, yekun sənədlər qəbul edilir: “Konfrans bütövlükdə “təhlükəsiz dünya” ideyasının reallaşdırılmasına əhəmiyyətli töhfələr verir. Budəfəki konfransın gedişi olduqca böyük maraq kəsb edir. Çünki konfrans Rusiya-Ukrayna münasibətlərinin çox gərgin bir fazaya qədəm qoyduğu dövrə təsadüf edir. Sözsüz ki, Şərqi Ukraynada baş verənlər, eləcə də Rusiyanın post-sovet məkanındakı davranışları burada geniş müzakirə ediləcək. 2009-cu ildən tədbirlərə qatılan Rusiya dövləti bu dəfə konfransda iştirakdan imtina edib. Səbəb kimi isə ABŞ və Avropanın NATO-ya daxil olan ölkələrinin Rusiyanın təhlükəsizliyi üçün problemlər yaratması göstərilir. Bu mənada, rəsmi Moskva Münhen Təhlükəsizlik Konfransında iştirakı zəruri hesab etmir. Amma əsl səbəb aydındır”.

Q.Hüseynlinin fikrincə, Kreml rəhbərliyi konfransda əsasən Ukrayna - Rusiya münasibətlərinin, regionda baş verənlərin müzakirə ediləcəyini bilir. Konfransın gedişində isə Rusiya Prezidenti Vladimir Putinə bəzi siyasi təzyiqlər də ola bilər. “Fikrimcə, Putin üçün həmin konfransda səsləndiriləcək sualları cavablandırmaq çətin olacaq. Rusiya lideri ən azı Avropa ölkələrinin böyük təpkisi ilə qarşılaşacağını bilir və bu səbəbdən də konfransa qatılmır. Düşünürəm ki, 58-ci konfrans tarixi qərarlarla yadda qalacaq. Konfransın keçirildiyi şərait bunu deməyə əsas verir. Son dövrlərdə açıq şəkildə dünyanın təhlükəsizlik problemlərinin, xüsusilə, siyasi gərginliyin, hətta nüvə silahından istifadə təhlükəsinin artması müşahidə olunur. Müxtəlif qütblü dövlətlər arasındakı münasibətlər hətta hərbi müstəviyə qədər irəliləyib”, - deyən Q.Hüseynli əlavə edib ki, konfransdan bu cür aktual problemlərlə bağlı yekun qərarlar gözlənilir. O, bildirib ki, Ukrayna məsələsi ilə yanaşı, dünyanın “sağalmayan yarası” sayılan Yaxın şərq problemi də konfransda müzakirə oluna bilər.

Paylaş:

Baxılıb: 976 dəfə