Zaman dəyərlidir, onu itirmə!

Bakı:

25 °C

56 %

9 m/s

Əlaqə

AZ RU EN

Ana səhifə / Xəbər lenti / Zaman dəyərlidir, onu itirmə!

Zaman dəyərlidir, onu itirmə!

03.06.2022 [10:44]

Pomodoro metodu

Deyirlər ki, kor üçün göy qurşağının rəngləri, kar üçün quşların səsi nədirsə, boşa sərf edilən zaman da insan üçün o deməkdir. İnsanların vaxtdan necə istifadə etməsi onların həyat keyfiyyətini müəyyən edir. Əksər insanlar vaxt itirdiklərinin fərqində belə deyillər. Cib telefonları və planşetlərlə oyunlar, sosial mediada daha çox vaxt keçirmək, söhbəti vaxtında bitirə bilməmək, lazımsız telefon zəngləri, çox uzun görüşlər, sistemsizlik, diqqəti cəmləyə bilməmək, qərarsızlıq, eyni anda çox şey etməyə çalışmaq, yox deyə bilməmək və s. hər biri insanların vaxtını oğurlayır.

Əslində, insanların əksəriyyətinin əsas problemi vaxt çatışmazlığı deyil, vaxtdan səmərəli istifadə etməyi bilməmələridir.

Bunun üçün ən səmərəli və populyar metod - pomodoro metodudur. Bəs pomodoro metodu nədir?

25 dəqiqədən bir istirahət edin

Pomodoro metodu vaxtdan səmərəli istifadə etmək üçün hazırlanmış zaman idarəetmə metodudur. Bu metod diqqətini cəmləşdirməkdə əziyyət çəkən insanlar üçün lazımlıdır. 1980-ci illərin sonunda Francesco Cirillo tərəfindən hazırlanıb. Pomodoro metodunun mexanizmi qısa fasilələrlə bir-birindən ayrılmış işlərdən ibarətdir.

Bu metod işlərinizi yüksək səviyyədə bitirməyə kömək edəcək. Qısa fasilələrlə diqqət həmişə təzə saxlanılır, maksimum fokuslanma təmin edilir və daha az zehni yorğunluq hiss olunur. Bu metod sayəsində səmərəli işləmək və məhsuldarlığı artırmaq mümkündür. Pomodoro metodunun tətbiqi çox sadədir. Sadəcə, bir saatdan başqa bir şey tələb etmir. Asanlıqla öyrənilir və tətbiq olunur. Səmərəliliyi əldə etmək üçün metoddan 7-20 gün davamlı olaraq istifadə etmək lazımdır. Tətbiq prosesi çox sadədir. Gün ərzində hər bir iş üçün qısa vaxt aralığı müəyyən olunur və dövri fasilələr verilir. Hər işləmə dövrü “Pomodoro” adlanır.

Əvvəlcə hədəfinizi müəyyənləşdirin.

Taymeri 25 dəqiqəyə qoyun və dəqiqə bitənə qədər işləyin. Həmin an başqa nəsə ilə məşğul olmayın. Əlavə etmək istədiyiniz işləri fasilə vaxtınıza qədər təxirə salın və başqalarının sizə mane olmasına imkan verməyin.

Psixoloqların fikrincə, saatın tıqqıltısı psixoloji olaraq insanın işə daha diqqətlə yanaşmasına kömək edir.

25 dəqiqədən sonra işin hansı hissəsində olursunuzsa olun, mütləq 5 dəqiqə fasilə edin.

Ən sonda Devid Allenin işi sona çatdırmaq (Getting Things Done) metodundan yararlana bilərsiniz. Belə ki, bütün işlərinizi bir bloknota və ya fayla qeyd edin. Sonra isə onları “Ev”, “İş”, “İstirahət”, “Alış-veriş” kimi bölümlərə ayırın. Bəndləri yerinə yetirdikcə bir-bir onu silin.

Vaxtınızı necə səmərəli istifadə etdiyinizi görmək üçün gördüyünüz işlərə nəzər yetirmək kifayətdir. Zamanın qədrini bilmək, hər anı düzgün dəyərləndirmək və şüurlu şəkildə idarə etmək həyatınıza məna qatacaq.

MİKAYIL

Paylaş:

Baxılıb: 720 dəfə