Şuşaya qayıdırıq

Bakı:

18 °C

77 %

3 m/s

Əlaqə

AZ RU EN

Ana səhifə / Xəbər lenti / Şuşaya qayıdırıq

Şuşaya qayıdırıq

13.10.2022 [10:18]

Gələn ilin sonunda Şuşada 2500 insan yaşayacaq

Vətən müharibəsində əldə etdiyimiz parlaq Qələbədən dərhal sonra işğaldan azad edilmiş ərazilərdə yüksək səviyyəli abadlıq-bərpa-quruculuq işlərinə başlanıldı. Prezident İlham Əliyevin müvafiq tapşırıqlarına uyğun olaraq, tarixi torpaqlarımızda vətəndaşlar üçün bütün şəraitin yaradılması istiqamətində ardıcıl, sürətli işlər həyata keçirilməkdədir. Görülən işlərin uğurlu nəticəsi olaraq bu gün Böyük Qayıdış prosesinin çox yaxın zamanda başa çatacağını əminliklə söyləyə bilərik. İşğaldan azad edilmiş ərazilərdə həyata keçirilən layihələr barədə mütəmadi olaraq məlumatlar verilir. Ötən həftə keçirilən Milli Şəhərsalma Forumunda da Prezidentin Şuşa rayonunda xüsusi nümayəndəsi Aydın Kərimov bu barədə danışıb. A.Kərimov bildirib ki, Şuşada gələn ilin sonundan 2 500 insan yaşayacaq: “Əhalinin qayıdışına hazır olmalıyıq. Gələn ildən biz sosial və turizm sektorunda məşğulluq üçün çalışacağıq. Şuşanın iqtisadi cəhətdən xüsusi profili var. Şuşada əsas məqsədimiz turizmdir”.

Bu arada qeyd edək ki, Şuşa şəhərində inşa olunacaq yaşayış kompleksinin daha 15 binasının tikintisinə, abadlaşdırılmasına və əlavə texniki qurğuların inşasına dair Şuşa Şəhəri Dövlət Qoruğu İdarəsinin elan etdiyi açıq tenderin qalibi müəyyən edilib.

Şuşa Şəhəri Dövlət Qoruğu İdarəsindən verilən məlumata görə, ümumilikdə 9 şirkətin təqdim etdiyi təklifləri tender komissiyasının üzvləri qiymətləndirib və komissiyanın qərarı ilə “ARCHİCO” MMC qalib elan olunub. Tender şərtlərinə görə, şirkət avtodayanacaqla birgə, 3-5 mərtəbə olmaqla 15 yaşayış binası tikəcək, həmçinin tikinti başa çatdıqdan sonra binaların 24 aylıq istismarına zəmanət verəcək.

Şuşa şəhərinin Baş planına uyğun olaraq ümumilikdə 23 binadan ibarət yaşayış massivinin inşası həyata keçirilir. Binalar müasir görüntülü və yerli hava şəraitinin tələblərinə uyğun olaraq tikilməkdədir.

“44 günlük Vətən müharibəmiz zəfərlə başa çatdıqdan sonra işğaldan azad olunmuş rayonların müvafiq icra orqanlarına bu istiqamətdə lazımi tapşırıqlar verilib. O cümlədən, Şuşa İcra Hakimiyyətində artıq 2 ilə yaxın bir müddətdir ki, əhalinin yenidən siyahıya alınması, ailə tərkibinin, ünvanın və digər məlumatların dəqiqləşdirilməsi istiqamətlərində işlər görülür”.

Bu fikirləri “Yeni Azərbaycan” qəzetinə açıqlamasında Milli Məclisin deputatı Elman Məmmədov səsləndirib.

Müharibə dövründən sonra Prezident İlham Əliyevin birbaşa rəhbərliyi altında Şuşada çox uğurlu bərpa-quruculuq, tikinti işlərinin getdiyini deyən E.Məmmədov qeyd edib ki, əhalinin köçürülməsi istiqamətində bütün tədbirlər yüksək səviyyədə icra olunur: “Yol məsələsi, əsas olan təhlükəsizlik məsələsi, yaşayış üçün lazım olan digər bütün infrastrukturun yaradılması həyata keçirilir. Eyni zamanda, köçürüləcək əhalinin işlə təmin olunması üçün bütün tədbirlər nəzərdən keçirilir. Həmin vətəndaşların əmək qabiliyyətli olub-olmamaları, onların işlə təmin olunması üçün lazımi iş yerlərinin yaradılması, açılması məsələləri araşdırılır. Eyni zamanda, köçürüləcək ailələrdə məktəbyaşlı, baxçayaşlı uşaqların hesabatının aparılması, onlar üçün məktəb və baxça təminatlarının yaradılması üçün də tədbirlər görülür”.

“Bununla da, gələn il gözəl Şuşamıza bu qayda ilə, təbii ki, ciddi nəzarət altında vətəndaşların köçürülməsi prosesi həyata keçiriləcək”, - deyə E.Məmmədov fikirlərinə yekun vurub.

Nicat PAŞA

Paylaş:

Baxılıb: 647 dəfə