Heydər Əliyev Fondunun Rusiyadakı nümayəndəliyi uşaqlara bayram sevinci yaşadıb

Bakı:

26 °C

78 %

7 m/s

Əlaqə

AZ RU EN

Ana səhifə / Xəbər lenti / Heydər Əliyev Fondunun Rusiyadakı nümayəndəliyi uşaqlara bayram sevinci yaşadıb

Heydər Əliyev Fondunun Rusiyadakı nümayəndəliyi uşaqlara bayram sevinci yaşadıb

15.12.2022 [22:28]

Heydər Əliyev Fondunun Rusiya Federasiyasındakı nümayəndəliyinin əməkdaşları Fondun vitse-prezidenti Leyla Əliyevanın təşəbbüsü ilə Yeni il ərəfəsində “Bizim ev” Ailə Tərbiyəsinə Dəstək Mərkəzində olub, valideyn himayəsindən məhrum uşaqlar üçün bayram tədbiri təşkil ediblər.

AZƏRTAC xəbər verir ki, uşaqlar üçün Moskva Kukla Teatrının ifasında “Al çiçək” tamaşası nümayiş etdirilib.

Fondun Rusiya nümayəndəliyinin humanitar proqramlar üzrə rəhbəri Tamilla Əhmədova bayramın təşkilindən danışaraq deyib: “Bu gün yenidən “Bizim ev” Ailə Tərbiyəsinə Dəstək Mərkəzində qonaq olmağımıza və Yeni il ərəfəsində müəssisənin yetirmələrini təbrik etməyimizə şadıq. Bugünkü uşaqlar – sabah ölkələrin, planetin, bütün bəşəriyyətin taleyini həll edəcək insanlardır. Bu gün uşaq, sabah - xalqdırlar. Bugünkü dünya böyüklərə məxsusdur və biz onlara dinc, xoşbəxt məmləkət miras qoymalıyıq. Uşaqlar planetimizin sabahıdır”.

O qeyd edib ki, uşaqların problemi Heydər Əliyev Fondunun diqqətindən heç vaxt kənarda qalmır, bu, Azərbaycanın Birinci vitse-prezidenti Mehriban Əliyevanın rəhbərlik etdiyi Fondun fəaliyyətinin əsas istiqamətlərindən biridir. “Fondun vitse-prezidenti və Rusiya nümayəndəliyinin rəhbəri Leyla Əliyeva uşaqlara kömək edən, onların həyatını daha parlaq və xoşbəxt etmək iqtidarında olan hər bir layihəni bütün ölkələrdə həmişə dəstəkləyir”, - deyən T.Əhmədova xatırladıb ki, “Bizim ev” Ailə Tərbiyəsinə Dəstək Mərkəzindən olan uşaqlar Fondun dəvətilə Bakıya səfər edib, həmyaşıdları ilə görüşüb, şən vaxt keçiriblər. “Sevindirici haldır ki, ölkələrimizin və xalqlarımızın uşaqları dövlət və cəmiyyətin etibarlı müdafiəsi altında, bir-birinə qarşılıqlı hörmət ab-havasında böyüyür. Dostluqda ən möhkəm və ən səmimi münasibətlər məhz uşaqlıqda yaranır. Bu gün uşaq dostluğu, sabah isə xalqlar arasında dostluq”, - deyə T.Əhmədova sözünə yekun vurub.

“Bizim ev” Ailə Tərbiyəsinə Dəstək Mərkəzinin direktoru Vadim Menşov Heydər Əliyev Fonduna və şəxsən Fondun vitse-prezidenti Leyla Əliyevaya diqqət və qayğıya görə təşəkkür edib. O deyib: “Heydər Əliyev Fondunun əməkdaşları artıq bizim ailəmizin üzvləridir. Bizim birgə proqramlarımız, layihələrimiz var, uşaqların işə düzəlməsi ilə birgə məşğul oluruq, “Bizim ev”in yetirmələrinə kömək göstəririk. Fonda və şəxsən Leyla xanıma uşaqlarımıza göstərdiyi qayğıya görə “Çox sağ ol” deyirik”.

Tədbirin sonunda Heydər Əliyev Fondunun Rusiyadakı nümayəndəliyinin əməkdaşları uşaqlara Yeni il hədiyyələri paylayıblar.

Paylaş:

Baxılıb: 526 dəfə