Ermənistanın üzərinə düşən məsuliyyət

Bakı:

17 °C

94 %

2 m/s

Əlaqə

AZ RU EN

Ana səhifə / Xəbər lenti / Ermənistanın üzərinə düşən məsuliyyət

Ermənistanın üzərinə düşən məsuliyyət

13.04.2023 [10:07]

XİN: Beynəlxalq ictimaiyyət bu təxribatları qınamalıdır

N.BAYRAMLI

Aprelin 11-də Ermənistan silahlı qüvvələrinin bölmələri Gorus rayonunun Dığ yaşayış məntəqəsi istiqamətində yerləşən mövqelərindən Azərbaycan Ordusunun Laçın rayonu istiqamətində yerləşən üzbəüz mövqelərini atıcı silahlardan intensiv atəşə tutub. Qarşı tərəfin törətdiyi təxribat nəticəsində Azərbaycan Ordusunun hərbi qulluqçuları şəhid olub və yaralanıb. Ermənistanın bu təxribatına Azərbaycanın Xarici İşlər Nazirliyi də münasibət bildirib. Nazirliyin Mətbuat xidməti idarəsinin yaydığı açıqlamada qeyd olunub ki, Ermənistanın bu kimi təxribatlarının beynəlxalq ictimaiyyət tərəfindən sülh sazişi üzrə danışıqlara ciddi çağırışlar fonunda baş verməsi Ermənistanın sülh prosesində maraqlı olmadığını göstərir. Ermənistanın bu kimi hərbi təxribatları, eyni zamanda, siyasi təhrikçi addımlarla və bəyanatlarla müşayiət olunur. Ermənistanın beynəlxalq hüququn norma və prinsiplərini tapdalayaraq Azərbaycana qarşı apardığı təxribatlar nəinki Azərbaycanın ərazi bütövlüyünü və suverenliyini pozur, eyni zamanda, regional sülh və təhlükəsizliyi ciddi şəkildə təhdid edir.

Deputat: Bəzi üçüncü dövlətlər Ermənistanı təxribata həvəsləndirir

Məsələ ilə bağlı Milli Məclisin deputatı Ramin Məmmədov bildirib ki, Ermənistanın sərhəddə törətdiyi növbəti təxribat regionda davamlı sülhün və sabitliyin yaradılmasında maraqlı olmadığını nümayiş etdirir. Təəssüf ki, Ermənistanın 44 günlük müharibənin nəticələrindən, müharibədən sonrakı dövrdə törətdiyi təxribatlar zamanı üzləşdiyi itkilərdən dərs çıxarmadığını görürük. Onun sözlərinə görə, Azərbaycan Ermənistanla münasibətlərin normallaşması, Qarabağ iqtisadi rayonunda yaşayan ermənilərin reinteqrasiyası ilə bağlı ardıcıl təşəbbüslərlə çıxış edir: “Burada maraqlı məqamlardan biri təxribatın məhz Azərbaycanın xoşməramlı təşəbbüsləri fonunda baş verməsidir. Digər məqam isə bəzi üçüncü dövlətlərin Ermənistanı təxribata həvəsləndirən, Azərbaycana qarşı yönəlmiş açıqlama və bəyanatlarıdır. Düşünürəm ki, baş verən təxribatın səbəblərini təhlil edərkən bu iki amili diqqətə almaq lazımdır”.

Millət vəkilinin fikrincə, Avropa İttifaqının Ermənistanın Azərbaycanla şərti sərhədində vəziyyətin monitorinqi məqsədilə missiya yerləşdirməsi faktını da diqqətdən kənarda qoymaq olmaz. Ermənistan tərəfi missiyanın fəaliyyətinin Azərbaycanı təxribatlara adekvat cavab verməkdən çəkindirəcəyini düşünərək belə bir addım atıb. Monitorinq missiyası müəyyən olunarkən diplomatik normalara riayət edilməyərək, Azərbaycanın rəyi soruşulmadı. Bu isə missiyanın məqsədinin səmimiliyinə ciddi şübhələr yaradır. Ermənistan isə vəziyyətdən istifadə edərək, sərhəddə gərginlik yaratmağa, yeni təxribatlar həyata keçirməyə çalışır.

Rəsmi İrəvan reallıqları düzgün qiymətləndirə bilmir

“Ermənistan ordusunun bütün təxribatlarına Silahlı Qüvvələrimiz indiyə qədər olduğu kimi, bundan sonra da layiqli cavab verəcək. Bu cür insidentlər sülh prosesini ləngitməklə bütövlükdə, Cənubi Qafqazda sabitliyə, nəticə etibarilə isə qlobal təhlükəsizliyə təhdid yaradır. İndi nəinki yaşadığımız region, ümumilikdə, dünya öz tarixinin həssas dövrlərindən birini yaşayır. Beynəlxalq təhlükəsizlik arxitekturası çox kövrəkdir. Beynəlxalq münasibətlərin xarakterində ciddi dəyişikliklər baş verir. Belə bir mürəkkəb vəziyyətdə lokal hesab olunan təxribatların belə, daha geniş coğrafiyada gərginlik yaratmaq ehtimalı var. Lakin istənilən halda, mövcud geosiyasi konfiqurasiya, iqtisadi, hərbi və digər amillər Ermənistanın əleyhinədir. Hesab edirəm ki, Ermənistan hökuməti həm tarixin dərslərindən nəticə çıxarmalı, həm də indiki reallıqları düzgün qiymətləndirməlidir. Rəsmi İrəvan Cənubi Qafqazda sülh, sabitlik və əməkdaşlıq mərhələsi başlamalı, 2020-ci ilin noyabrında imzalanmış üçtərəfli ?əyanatın şərtlərini yerinə yetirməlidir”,- deyə R.Məmmədov vurğulayıb.

Paylaş:

Baxılıb: 471 dəfə