Ölkəmizdə nə qədər kitab çap edilir?

Bakı:

26 °C

54 %

5 m/s

Əlaqə

AZ RU EN

Ana səhifə / Xəbər lenti / Ölkəmizdə nə qədər kitab çap edilir?

Ölkəmizdə nə qədər kitab çap edilir?

26.07.2023 [14:22]

Kağızın baha olması nəşriyyatçıları narahat edir

Son bir ildə nəşr olunan kitabların sayına görə ABŞ, Çin və Böyük Britaniyanın ilk üçlükdə yer aldığı siyahıda Azərbaycan 85-ci yerdə qərarlaşır. Bu gün oxucular kitabın, nəşriyyatçılar isə kağızların qiymətinin bahalığından şikayət edirlər.

Bəs nəşriyyat sahibləri nə deyirlər?

Bu dəfə kitab naşirlərinin ürək sözlərini eşidəcəyik. Yeniazerbaycan.com olaraq nəşriyyat evləri ilə əlaqə saxladıq, il ərzində ölkədə nə qədər kitab çap etdiklərini və hansı çətinliklərlə üzləşdiklərini soruşduq.

İlk ünvanımız “Qanun” nəşriyyatı oldu. 1995-ci ildən müstəqil nəşriyyat kimi fəaliyyət göstərən nəşriyyat evinin direktor müavini Ənvər İsmayılovla danışdıq: “Ötən 6 ay ərzində 219 560 nüsxə kitab nəşr edilib. Kitablar əsasən Azərbaycan dilində nəşr olunur, lakin rus və ingilis dillərində nəşrlərimiz də var. Bu gün klassik Azərbaycan və müasir Avropa ədəbiyyatına tələbat çoxdur. Öz hesabımıza rus və ingilis dillərindən başqa fars, ərəb, alman və fransız dillərində olan kitabları tərcümə edərək nəşr edirik. Redaktə və tərcümə işində bəzən müəyyən səhvlər qeydə alınsa da, kitabın kağızı və çapı ilə bağlı heç vaxt narazılıq olmayıb. Bizdə həm onlayn, həm də kitab mağazalarında satış mövcuddur. Hazırda yay fəsli ilə əlaqədar satışda azalma müşahidə olunsa da, ötən ilin eyni dövrü ilə müqayisədə qənaətbəxşdir”.

Nəşriyyat və poliqrafiya fəaliyyəti ƏDV-dən azad olsa da...

“Qədim Qala” Nəşriyyatının icraçı direktoru Şöhlət İxtiyaroğlu isə deyir ki, keyfiyyətli iş böyük vəsait tələb edir. Kitabın tərcüməsi, redaktəsi və korrektəsi çox böyük məbləğlər hesabına başa gəlir. Kitabların baha olmasına aydınlıq gətirən İxtiyaroğlu bildirib : “Oxucular haqlıdır. Ötən illərlə müqayisədə kitabların qiymətlərində artım var. Çox təəssüf ki, qiymətlərin stabilliyini özümüz tənzimləyə bilmirik. Azərbaycanda nəşriyyat və poliqrafiya fəaliyyəti ƏDV-dən azad olunsa da, kağızların qiymətində bahalaşma oldu. Əfsuslar olsun ki, bu kitabların qiymətində üzünü büruzə verdi. Bundan başqa, bizim nəşriyyat da daxil olmaqla bir sıra nəşriyyat evlərinin mətbəəsi yoxdur”.

Onun sözlərinə görə, nəşriyyat son 6 ay ərzində 20 adda kitab çap edib. Buraya əsasən psixoloji və fərdi inkişaf kitabları daxildir: “Biz həmişə keyfiyyətə üstünlük vermişik. Məqsədimiz kitabı oxucuya çatdırmaqdır, qiymətlərin bahalaşmasında maraqlı deyilik. Onlayn kitab satışı zamanı şəhər və regionlara kitab çatdırılmasını pulsuz həyata keçirmişik. Kitabların əlçatanlığını təmin etmək üçün müxtəlif kampaniyalar və endirimlər təşkil etmişik. Məsələn, bu yaxınlarda nəşriyyatımızın 12 illiyi münasibətilə kitabların qiymətinə 30 faizə qədər endirim olacaq”.

“Mücrü” Nəşriyyatı MMC ilə də həmsöhbət olduq. Nəşriyyatın nümayəndəsi Müşfiq Xanın sözlərinə görə, kitab çapı zamanı üzləşdikləri çətinlik alıcılıq qabiliyyətinin aşağı olmasıdır: “Nəşriyyatımız rəsmi olaraq 24 dekabr 2019-cu ildə dövlət qeydiyyatından keçib. Bu müddət ərzində həm yerli, həm də dünya ədəbiyyatının nəşri ilə məşğul olub: “Bu il ərzində nəşriyyat evində 140 adda kitab nəşr edilib. Buraya bədii ədəbiyyatla yanaşı, uşaq ədəbiyyatı, metodik və akademik nəşrlər daxildir. Düşündük ki, ƏDV-dən azad edildikdən sonra nəşriyyat sahəsində canlanma olacaq, əfsuslar olsun ki, belə olmadı. Kağızların qiymətinin bahalılığı kitabların tirajının az olmasına təsir etdi. Kitab çapının biznes sahəsi kimi populyarlaşmağı üçün işlər görülməlidir. Əksər nəşriyyat evləri kitabları çap edir, amma sabah satılıb-satılmayacağı barədə tərəddüd yaşayır. Bu, böyük bir sual işarəsidir...”

MÜŞFİQƏ

Paylaş:

Baxılıb: 592 dəfə