“Gərgin humanitar vəziyyət” iddiaları əsassızdır!

Bakı:

19 °C

82 %

0 m/s

Əlaqə

AZ RU EN

Ana səhifə / Xəbər lenti / “Gərgin humanitar vəziyyət” iddiaları əsassızdır!

“Gərgin humanitar vəziyyət” iddiaları əsassızdır!

02.09.2023 [10:30]

XİN Millerə cavab verdi

ABŞ Qarabağda humanitar vəziyyətin “pisləşməsindən” narahatdır. Bununla bağlı ABŞ Dövlət Departamentinin sözçüsü Metyu Miller avqustun 31-də qərəzli açıqlama verib: “Biz layiqli dolanışıq üçün zəruri olan ərzaq, dərman və digər malların blokadası nəticəsində Qarabağda humanitar vəziyyətin pisləşməsindən dərin narahatıq”.

Miller qeyd edib ki, Birləşmiş Ştatlar son bir neçə həftə ərzində Qarabağ əhalisinə humanitar yardımın çatması üçün tərəflərlə ardıcıl işləyib: “Biz humanitar, kommersiya və sərnişin daşımaları üçün Laçın dəhlizinin dərhal açılmasına çağırışımızı təkrar edirik”.

Mətbuat katibi daha sonra əlavə edib: “Bundan başqa, Bakıdan olan rəsmilər və Stepanakertdən (Xankəndi) olan nümayəndələr təxirə salınmadan Qarabağın kişi, qadın və uşaqları üçün vacib ərzaq ehtiyatlarının, o cümlədən əlavə təchizat marşrutlarının daşınması yollarını razılaşdırmaq üçün görüşməli və bütün həll edilməmiş məsələlər üzrə müzakirələri yenidən açmalıdırlar. Əsas humanitar yardım heç vaxt siyasi ziddiyətlərin girovu olmamalıdır”.

“Blokada” iddiaları qəbuledilməzdir...

Azərbaycan Xarici İşlər Nazirliyi (XİN) M.Millerin qərəzli bəyanatını şərh edib. XİN-nin mətbuat katibi Ayxan Hacızadə bildirib ki, Azərbaycan ABŞ Dövlət Departamentinin bölgədəki vəziyyətlə bağlı bəyanatını qeydə alır: “İlk növbədə, Azərbaycan tərəfinin erməni əsilli sakinlərin təlabatlarının ödənilməsi istiqamətində təklifləri olduqca qərəzlidir. O cümlədən Ağdam-Xankəndi yolundan istifadə ilə paralel olaraq, Laçın yolundan hərəkətin intensivləşməsi təklifini irəli sürməsi, eləcə də gündəlik əsasda onlarla erməni sakinin Laçın sərhəd-buraxılış məntəqəsindən hər iki istiqamətdə keçməsi fonunda bölgədə “blokada” olması iddiaları qəbuledilməzdir”.

Əsassız iddia...

A.Hacızadənin sözlərinə görə, erməni sakinlərin bəzi nümayəndələri Azərbaycan ərazilərində yerləşən Rusiya sülhməramlı kontingenti vasitəsilə Azərbaycan Qızıl Aypara Cəmiyyəti tərəfindən Ağdam-Xankəndi istiqamətinə göndərilib: “Hazırda Xankəndiyə keçidi gözləyən yük maşınlarına mane olmaq istiqamətində səyləri və yolu bağlaması şəraitində bölgədə “gərgin humanitar vəziyyət” mövcudluğu iddialarını əsassız edir.

Azərbaycanın Qarabağ bölgəsində məskunlaşan erməni sakinlərin reinteqrasiyası, Qarabağ bölgəsinə humanitar yüklərin müxtəlif marşrutlarla çatdırılması, həmçinin Azərbaycanın xüsusi nümayəndəsi ilə yerli erməni sakinlərin nümayəndələri arasında görüşün təşkili ilə bağlı Azərbaycanın erməni sakinləri dəfələrlə görüşə dəvət etməsi göz öndüdədir. Bu istiqamətdə görüşlərin təşkili ilə bağlı əldə olunmuş razılıqlardan Ermənistan tərəfinin öz qondarma rejimi vasitəsilə qeyri-qanuni şərtlər və müxtəlif bəhanələr irəli sürməklə boyun qaçırması ABŞ tərəfinə yaxşı məlumdur.

Azərbaycan tərəfinin bu istiqamətdə təkliflərinin davamlı olaraq rədd edilməsi isə vəziyyətin heç də humanitar deyil, əksinə siyasi xarakter daşıdığını bir daha nümayiş etdirir”.

A.Hacızadə həmçinin qeyd edib: “Azərbaycan Respublikası dövlətlərin suverenliyinə və ərazi bütövlüyünə hörmət əsasında bölgədə sülh, təhlükəsizlik və sabitliyin bərqərar olmasında, erməni sakinlərin ölkəmizin qanunvericiliyi çərçivəsində reinteqrasiyasında qərarlıdır”.

Yeganə BAYRAMOVA

Paylaş:

Baxılıb: 807 dəfə