Diplomatiyamızın uğuru

Bakı:

19 °C

82 %

0 m/s

Əlaqə

AZ RU EN

Ana səhifə / Xəbər lenti / Diplomatiyamızın uğuru

Diplomatiyamızın uğuru

08.09.2023 [12:22]

Yeganə BAYRAMOVA

Bu günlərdə Qərbi Azərbaycan İcması (QAİ) UNESCO ilə predmetli dialoq çərçivəsində konkret mövzuları təşkilat rəhbərliyinə təqdim etmişdi. QAİ mədəni irsin qorunması sahəsində icmalara müvafiq rol tanıyan beynəlxalq konvensiyalara uyğun olaraq potensialın gücləndirilməsi sahəsində UNESCO-nun praktiki yardımlarını xahiş edib. UNESCO icmaya cavab məktubu göndərib.

Beynəlxalq təşkilat mədəni irsin qorunması sahəsində icmanın çağırışına uyğun olaraq müvafiq addımlar atacağını bildirib. Bir sözlə UNESCO potensialın gücləndirilməsi sahəsində dəstək göstərmək barədə QAİ-nin xahişinə müsbət cavab verib.

İcma Ermənistandakı Azərbaycan mədəni irsinin qorunması ilə bağlı imkanlarının artırılması, mədəni abidələrin reyestrinin aparılması, onların vəziyyətinin qiymətləndirilməsi və bərpasında UNESCO ilə əməkdaşlıq edəcək.

Əməkdaşlıqla bağlı Yeniazerbaycan.com-a açıqlama verən Qərbi Azərbaycan İcmasının sədri, Milli Məclisin deputatı Əziz Ələkbərli bildirib ki, BMT-nin ixtisaslaşmış təşkilatı olan UNESCO dünyanın ən böyük təşkilatlarından biridir. Onun sözlərinə görə, UNESCO təhsil, elm və mədəniyyət məsələləri sahəsində dünya dövlətlərinin əməkdaşlığını, xüsusilə xalqların mədəni irsinin qorunması, təbliği və inkişafını təmin etməli olan bir qurumdur: “Lakin təəssüf ki, bir çox beynəlxalq təşkilatlar kimi, bu təşkilat da bəzən ona təsir imkanları böyük olan güclərin təsiri altına düşərək məsələlərə ikili standartlarla yanaşır. Bu isə, hər şeydən əvvəl, UNESCO-nun özünün beynəlxalq nüfuzuna xələl gətirir.

30 il ərzində biz dəfələrlə bunun şahidi olduq. Nəinki 30 ildə, hətta postmüharibə dövründə Azərbaycan xalqının, dövlətinin, Azərbaycan Prezidentinin dəfələrlə müraciət etməsinə baxmayaraq, UNESCO susmağa üstünlük verdi. UNESCO bilə-bilə ki, işğalçı Ermənistan işğal etdiyi Azərbaycan ərazilərində daşı daş üstə qoymayıb, Azərbaycan xalqının bu ərazilərdəki bütün maddi və mənəvi dəyərlərini məhv edib, susdu, özünü görməməzliyə vurdu. 44 günlük müharibədən sonra işğaldan azad etdiyimiz ərazilərimizdə erməni vandallığını dünyaya göstərmək fürsəti əldə etdik. Lakin təəssüf ki, bu dəfə də UNESCO susdu, dünya susdu.

Qərbi Azərbaycan İcması yaranan ilk gündən biz son 200 ildə tarixi torpaqlarımızda Azərbaycan mədəni irsinə qarşı erməni vandallığını diqqət mərkəzində saxladıq, dünyaya car çəkdik, həmin mədəni irsin Azərbaycan mütəxəssisləri ilə birgə monitorinqinin keçirilməsi barədə UNESCO-ya müraciət etdik. Bizim bu tələbimiz BMT-nin rəsmi sənədi kimi, dünya dövlətləri arasında yayıldı”.

Ə.Ələkbərlinin sözlərinə görə, nəhayət, UNESCO-nun Qərbi Azərbaycan İcmasının çağırışına müsbət cavab verməsi sevindiricidir, Azərbaycan diplomatiyasının uğurudur: “İcma ümid edir ki, UNESCO bu dəfə öz vədinə əməl edəcək, Ermənistandakı Azərbaycan mədəni irsinin qorunması sahəsində Qərbi Azərbaycan İcması ilə əməkdaşlıq çərçivəsində əməli addımlar atacaqdır. Bizim UNESCO-dan əsas üç istəyimiz var: müasir metodologiya əsasında Qərbi Azərbaycanda xalqımıza məxsus mədəni abidələrin reyestrinin aparılması, onların vəziyyətinin qiymətləndirilməsi və bərpası üçün lazım olan addımların müəyyənləşdirilməsi. Biz, Qərbi Azərbaycan İcması olaraq, hər üç istiqamət üzrə UNESCO ilə əməkdaşlıq etməyə hazırıq”.

Paylaş:

Baxılıb: 1077 dəfə