“ABŞ Azərbaycana münasibətdə özündən xoxan düzəltmək istəyir”

Bakı:

16 °C

94 %

2 m/s

Əlaqə

AZ RU EN

Ana səhifə / Xəbər lenti / “ABŞ Azərbaycana münasibətdə özündən xoxan düzəltmək istəyir”

“ABŞ Azərbaycana münasibətdə özündən xoxan düzəltmək istəyir”

15.09.2023 [14:52]

Qüdrət Həsənquliyev: “Amma anlamırlar ki, ərazi bütövlüyünün bərpası üçün xalqımız hər cür fədakarlığa hazırdır”

Dünyada bir çox qanlı savaşların başlaması, yaxud davam etməsi dünyanın super gücü kimi ABŞ-ın yürütdüyü riyakar və ikiüzlü siyasətinin nəticəsidir.

Bu sözləri xalqcebhesi.az saytına açıqlamasında ABŞ dövlət katibinin müavini Juri Kimin Senatın beynəlxalq əlaqələr komitəsində “Birləşmiş Ştatlar Azərbaycanın “Dağlıq Qarabağ xalqına” hər hansı hücumuna və hərbi addımlarına dözməyəcək” kimi uddialarına münasibət bildirən Bütöv Azərbaycan Xalq Cəbhəsi Partiyasının (BAXCP) sədri, millət vəkili Qüdrət Həsənquliyev deyib.

BAXCP sədri qeyd edib ki, Ermənistandan 250 min, Qarabağdan və ətraf rayonlardan 750 min müsəlman azərbaycanlının Ermənistanın etnik təmizlənmə siyasətinə məruz qalmasına, Azərbaycanın 20 % torpaqlarının işğalına və 30 il işğal altında qalmasına dözən, Qarabağdakı işğalçı rejimə maliyyə yardımı edən, Ermənistana güldən ağır söz deməyən, onu işğalçı dövlət kimi tanımayan ABŞ Azərbaycanın öz ərazisində dövlət suverenliyini bərpa edəcəyinə dözməyəcəyini deyir: “Bu gün dünyada ABŞ-a səmimi olaraq inanan və hörmət edən barmaqla sayılacaq qədər ölkə ola, ya olmaya. Sadəcə, ölkələr onun məkrli siyasətindən qorxub onunla hesablaşır və özlərini elə göstərirlər ki, sanki ona hörmət edirlər.

ABŞ yeni savaşı önləmək üçün deməkdən ki, Qarabağda yaşayan erməni sakinlər Azərbaycan cəmiyyətinə yenidən inteqrasiya olunmalı və Ermənistan da bu işə kömək etməlidir, görün nə deyir. 1992-ci ilin sonlarında, öz dövlətinin ərazilərini qorumaq istəyən böyük vətənpərvər və demokrat Elçibəyin prezidentliyi zamanı, Azərbaycan Ermənistanın işğalına məruz qalarkən, ABŞ Azərbaycana sanksiya tətbiq etməklə və öz tarixinin ən ləyaqətsiz səhifələrindən birini yazdı. Özünün sonradan dovşan kimi qaçdığı Əfqanıstanda hərbi əməliyyatları zamanı Azərbaycana ehtiyacı yarandı və həmin sanksiyaların tətbiqini hər il təxirə saldı. Kim indi bəyan edir ki, dövlət departamenti sanksiyaların tətbiqinin növbəti dəfə təxirə salınması üçün müraciət etməyib.

ABŞ Azərbaycana münasibətdə özündən xoxan düzəltmək istəyir, amma anlamırlar ki, ərazi bütövlüyünün bərpası üçün xalqımız hər cür fədakarlığa hazırdır. ABŞ rəsmiləri bu kimi açıqlamaları ilə özlərini ifşa edir, nifrət hədəfinə çevirirlər. Azərbaycan öz ərazilərində kimin nə deməsindən asılı olmayaraq dövlət suverenliyini bərpa edəcək.

ABŞ aldadıb nüvə silahını aldığı və məhv olma təhlükəsi ilə üz-üzə qoyduğu Ukraynaya ciddi yardım göstərmək haqqında düşünməlidir, yoxsa erməni diasporasının pullarına və dəstəyinə görə başqa işğalçı dövləti və seperatizmi dəstəkləməməlidir”.

Paylaş:

Baxılıb: 673 dəfə