Nyu-Yorkdakı Türk Evində...

Bakı:

21 °C

78 %

5 m/s

Əlaqə

AZ RU EN

Ana səhifə / Xəbər lenti / Nyu-Yorkdakı Türk Evində...

Nyu-Yorkdakı Türk Evində...

19.09.2023 [11:09]

Hansı məsələlər müzakirə olundu?

Nardar BAYRAMLI

BMT-nin 78-ci Baş Assambleyasında iştirak etmək üçün Nyu-Yorkda səfərdə olan Türkiyə Prezidenti Rəcəb Tayyib Ərdoğan bir sıra görüşlər keçirib.

Türkiyə ilə Gürcüstan arasında ticarət dövriyyəsi 5 milyard dollara çata bilər

Səfər çərçivəsində Türkiyə Prezidenti Gürcüstanın Baş naziri İrakli Qaribaşvili ilə görüşüb. Söhbət zamanı Prezident Rəcəb Tayyib Ərdoğan əsrin fəlakətindən sonra Gürcüstanın Türkiyəyə verdiyi dəstəyə görə bir daha təşəkkür edib və iki ölkə arasında ticarət həcminin 3 milyard dollardan 5 milyard dollara qədər yüksələ biləcəyini deyib.

Orta dəhlizin həyata keçirilməsinin əhəmiyyətindən danışan Türkiyə Prezidenti Bakı-Tbilisi-Qars dəmir yolunun tez bir zamanda daha işlək vəziyyətə gətirilməsinin gözlənildiyini bildirib. Prezident Ərdoğan, həmçinin Gürcüstandakı FETÖ məktəblərinin bağlanmasının və aktivlərinin dondurulmasının önəmini vurğulayıb və Gürcüstan rəhbərliyinin bununla bağlı atdığı addımları təqdir edib.

Ərdoğandan İlon Maska təklif

Türkiyə Prezidenti Rəcəb Tayyib Ərdoğan Nyu-Yorkda “Tesla” kompaniyasının sahibi İlon Maskla da görüşüb. Prezident Rəcəb Tayyib Ərdoğan Tesla və SpaceX şirkətlərinin qurucusu İlon Maskı Nyu-Yorkdakı Türk Evində qəbul edib. Görüş zamanı Prezident sahibkarı “Tesla” elektromobili istehsal edən yeddinci zavodu Türkiyədə açmağa çağırıb. Türkiyə lideri Ankaranın kosmik proqramı çərçivəsində ölkəsinin SpaceX ilə əməkdaşlığının potensial inkişafını vurğulayıb və İlon Maskı sentyabrın sonunda İzmir şəhərində keçiriləcək texnologiya sərgisində iştiraka dəvət edib.

Rəcəb Tayyib Ərdoğanın İlon Maskı Türkiyənin rəqəmsallaşma konsepsiyası və süni intellekt sahəsində milli strategiya haqqında məlumatlandırdığı da bildirilir. Bu, Türkiyə Prezidenti ilə amerikalı sahibkar arasında ilk görüş deyil. Ötən ilin sonlarında onlar Qətərdə dünya çempionatının final matçı zamanı da görüşmüşdülər.

Ahıska türklərinə Türkiyə vətəndaşlığı verilir

Bundan əlavə, Prezident Ərdoğan Türk Evində Ahıska türklərini qəbul edib. Ərdoğan buradakı çıxışında qəbulun keçirildiyi binanın adından da göründüyü kimi bütün türklərin evi olduğunu bildirib. Türk Evinin qapısının Ahıska türklərinin üzünə hər zaman açıq olduğunu deyən R.T.Ərdoğan, Ahıska türklərinin sürgün yolu ilə dünyanın 9 fərqli ölkəsinə yayıldığını, illərlə çətin şəraitdə yaşadıqlarını, lakin bütün çətinliklərə baxmayaraq, kimliklərini qoruyub saxlamağı, mədəni irslərini gələcək nəsillərə ötürməyi bacardıqlarını bildirib: “Harada olurlarsa olsunlar, Ahıska türklərinin ürəkləri həmişə Türkiyə ilə döyünüb. Türkiyə olaraq hər cür çətinliklərə dözərək yazdığınız uğur hekayələri ilə qürur duyuruq. Yeni və daha böyük uğurlar əlavə etmək üçün üzərimizə düşəni etməyə qərarlıyıq. Biz bu anlayışla Ahıska türklərinin vəziyyətini yaxından izləyirik”.

Prezident Ərdoğan Ahıska türklərinin sülh və rifahını öz vətəndaşlarından ayrı görmədiklərini ifadə edərək, bu sözləri deyib: “Onların illərdir həsrətində olduqları Türkiyə vətəndaşlığını almaları üçün lazımi addımları atırıq və bu prosesi sürətləndiririk. 2022-ci ildən Daxili İşlər Nazirliyimizin dəstəyi və səfirliklərimizin, konsulluqlarımızın töhfələri ilə 820 soydaşımız Türkiyə vətəndaşlığını qəbul edib. İnşallah bir az sonra sizi təmsil edən qardaşlarımıza Türkiyə Cümhuriyyəti vəsiqələri veriləcək. Bunu təqdim edib bu sevinci birlikdə yaşayacağıq. Prosedurları davam edən 578 soydaşımız üçün işlərimizi tez bir zamanda yekunlaşdıracağıq”. Prezident Ərdoğan görüş zamanı bəzi Ahıska türklərinə Türkiyə vətəndaşlığı vəsiqələrini də təqdim edib.

Paylaş:

Baxılıb: 634 dəfə