Ümumdünya Quduzluq Xəstəliyi ilə mübarizə günüdür

Bakı:

20 °C

83 %

3 m/s

Əlaqə

AZ RU EN

Ana səhifə / Xəbər lenti / Ümumdünya Quduzluq Xəstəliyi ilə mübarizə günüdür

Ümumdünya Quduzluq Xəstəliyi ilə mübarizə günüdür

28.09.2023 [12:50]

M. Bayramlı

Bu ilin 8 ayı ərzində Azərbaycanda 29 334 nəfər heyvan dişləməsi, cırmaqlaması, tüpürcəkləməsinə məruz qalıb.

Bu barədə Səhiyyə Nazirliyinin Respublika Gigiyena və Epidemiologiya Mərkəzindən bildirilib.

Hadisələrdən 7 034-ü Bakıda baş verib.

Qeyd olunub ki, həmin şəxslərdən 13 554-ü (Bakı şəhəri üzrə 2389 nəfər ) məlum it, 9 411-i (Bakı şəhəri üzrə 2060 nəfər ) naməlum it, 5228-i (Bakı şəhəri üzrə 2307 nəfər ) pişik, 446-sı (Bakı şəhəri üzrə 150 nəfər ) siçovul, 695-i (Bakı şəhəri üzrə 128 nəfər ) isə digər heyvanlar tərəfindən zədələnməyə məruz qalanlardır.

Mərkəzdən həmçinin bildirilib ki, ölkə üzrə 2 quduzluq hadisəsi qeydə alınıb və hər iki hadisə ölümlə nəticələnib.

Səhiyyə Nazirliyi bu ürküdücü statistikanı Quduzluğa qarşı Mübarizə Günündə təqdim edib.

Qeyd edək ki, Ümumdünya Heyvan Sağlamlığı Təşkilatı (OIE) hər ilin sentyabrın 28-ni dünyada Quduzluğa qarşı Mübarizə Günü elan edib və 2030-cu ilə qədər sahibsiz itlər vasitəsilə xəstəliyə yoluxmanın qarşısının alınmasını məqsəd kimi qarşıya qoyub.

Quduzluq xəstəliyi barədə nələri bilirik?

Məlumdur ki, iİnsanlarda quduzluq xəstəliyi hidrofobiya - sudan qorxmaq, fotofobiya – işığa həssaslıq, psixonevroloji pozulmalar, udqunma aktının pozulması, yüksək hərarət və digər kliniki əlamətlərlə özünü büruzə verir. Quduzluq olduqca təhlükəli bir xəstəlikdir və müalicəsi olmazsa, vaxtında vaksin vurulmazsa, ölümlə nəticələnir.

Əksər hallarda ancaq itin hücumuna məruz qalanlar həkimə müraciət edir. Lakin bu sadəcə itlərdən keçən virus deyil. Xəstəliyə canavar, tülkü, hətta pişikdən də yoluxmaq mümkündür. Pişik cırmaqlaması nəticəsində də həkimə müraciət olunması tövsiyə edilir. Quduzluğun ilkin əlamətləri qripə bənzəyir. Bir neçə gündən sonra ağızın köpüklənməsi, yuxusuzluq, aqressiv davranışlar kimi əlamətlərlə müşahidə edilir.

Heyvan dişləməsi, cırmaqlaması və ya zədələnmiş dərinin yalanmasına məruz qaldıqda ilk olaraq yaranı və ya tamlığı pozulmuş dərini sabun, çoxlu təmiz su ilə yumaq lazımdır. Təcili olaraq həkimə (yaxşı olar infeksionistə) müraciət edilməlidir.

Xəstəlikdən qorunmaq üçün ev heyvanlarını quduzluğa qarşı peyvəndləməli, sahibsiz it və pişiklərlə birbaşa təmas qurulmamalıdır.

Sahibsiz heyvanların sayının artması və onlara zəruri qayğının göstərilməməsi, xüsusilə küçə it və pişiklərinin vaxtında sterilizasiya edilməməsi, habelə peyvəndlənməməsi bir çox ekoloji, sanitar və səhiyyə problemlərinin yaranması ilə nəticələnir. Elə bu səbəbdən də heyvanlar sterilizasiya, peyvəndləmə, baytar qayğısı, sahibləndirmə, sığınacaq və digər humanist rəftarla da əhatə olunmalıdır. Ona görə də heyvanın hücumuna məruz qalan şəxs mütləq vaxtında həkimə müraciət etməli və quduzluğa görə peyvənd olunmalıdır.

Paylaş:

Baxılıb: 705 dəfə