“TEKNOFEST”in qalibləri: Astronavtika Konqresi dünyagörüşümüzün genişlənməsində vacib rol oynayacaq

Bakı:

25 °C

62 %

13 m/s

AZ RU EN

Ana səhifə / Xəbər lenti / “TEKNOFEST”in qalibləri: Astronavtika Konqresi dünyagörüşümüzün genişlənməsində vacib rol oynayacaq

“TEKNOFEST”in qalibləri: Astronavtika Konqresi dünyagörüşümüzün genişlənməsində vacib rol oynayacaq

04.10.2023 [16:10]

MÜŞFİQƏ

“Ankarada Qazi Universitetinin Mühəndislik fakültəsinin tələbələriyik. Biz “TEKNOFEST” Aerokosmik və Texnologiya Festivalının qalibləriyik. Həmin festival zamanı Bakıda 74-cü Bakı Beynəlxalq Astronavtika Konqresinin keçirilməsi ilə bağlı məlumat əldə etdik. Türkiyə Texnologiya Komandası Vəqfi (T3 Vəqfi) sayəsində burada iştirak edirik. Universitetdən məzun olduqdan sonra kosmos sahəsində çalışmağı düşünürük. Bizim bu sahədə inkişafımız, eləcə də dünyagörüşümüzün genişlənməsi baxımından Konqres vacib rol oynayacaq”.

Bu fikirləri Bakıda keçirilən 74-cü Beynəlxalq Astronavtika Konqresində “Yeni Azərbaycana”a açıqlamasında “TEKNOFEST”in qalibləri Zeynəb Səfa və Mehmet Esat deyiblər.

“4 gündür ki, Azərbaycandayıq. Burada olmaqdan çox zövq aldıq. İlk dəfədir ki, qardaş Azərbaycana gəlirik. Qətiyyən, burada özümüzü yad hiss etmədik, sanki öz vətənimizdəyik. Azərbaycan Beynəlxalq Astronavtika Konqresinə ev sahibliyi edir. Buna şahid olmağın özü qürurvericidir”, - deyə tələbələr vurğulayıblar.

Xatırladaq ki, oktyabrın 2-də Bakı Konqres Mərkəzində Azərbaycanın Kosmik Agentliyinin ("Azərkomos") və Beynəlxalq Astronavtika Federasiyasının tətəfdaşlığı ilə 74-cü Bakı Beynəlxalq Astronavtika Konqresi işinə başlayıb. Oktyabrın 6-dək davam edəcək konqresin işində kosmik agentliklərin, dövlət sektorunun, investorlar və özəl kosmik şirkətlərin nümayəndələri, yerli və beynəlxalq media qurumlarının təmsilçiləri, ümumilikdə 101 ölkədən 5 mindən çox nümayəndə qatılıb.

Beynəlxalq Astronavtika Konqresində 150 şirkət sərgi pavilyonunda təmsil olunur. Sərgidə iştirak edən agentlik və şirkətlər arasında ABŞ-ın “Milli Aeronavtika və Kosmos Administrasiyası” (NASA), Yaponiyanın “JAXA” kosmik agentliyi, İtaliyanın “Agenzia Speziale Italiana” kosmik agentliyi, “AIRBUS” şirkəti, Kanadanın innovasiya mərkəzi “INO”, Fransanın Milli Kosmik Tədqiqatlar Mərkəzi “CNES”, Hindistanın kosmik agentliyi “ISRO”, Türkiyənin “Türkiye Uzay Ajansı” kosmik agentliyi və digər beynəlxalq şirkətlər yer alıb.

Bakı Konqresinə ümumilikdə 95 ölkədən 3600-dən çox elmi məqalə təqdim olunub. Beynəlxalq Astronavtika Federasiyası İkinci Dünya müharibəsindən sonra “soyuq müharibə” dövründə kosmos sahəsində elm adamlarının arasında dialoqun yenidən qurulması məqsədilə 1951-ci ildə yaradılıb. Federasiya sülh məqsədləri ilə kosmik tədqiqat və fəaliyyətin təşviq edilməsi, cəmiyyətin bu sahədə maariflənməsi və biliklərinin zənginləşdirilməsi məqsədilə üzv qurumlar arasında qlobal şəbəkə yaradır. Hər il federasiya konfrans, texniki sessiyalar, quruma üzv ölkələrin nazirləri və parlament üzvlərinin beynəlxalq iclası kimi beynəlxalq tədbirlər təşkil edir. Hazırda Federasiyanın 110 ölkədən 460-dan çox üzvü var. Azərbaycan 2003-cü ildən Federasiyanın üzvüdür.

Paylaş:

Baxılıb: 586 dəfə