Davosda Əliyevin bir imzası, Zəngəzur dəhlizində erməni oyunpozanlığı - bacarırsınızsa.... Aydın Quliyev yazır...

Bakı:

26 °C

53 %

1 m/s

AZ RU EN

Ana səhifə / Analitik / Davosda Əliyevin bir imzası, Zəngəzur dəhlizində erməni oyunpozanlığı - bacarırsınızsa.... Aydın Quliyev yazır...

Davosda Əliyevin bir imzası, Zəngəzur dəhlizində erməni oyunpozanlığı - bacarırsınızsa.... Aydın Quliyev yazır...

09.02.2026 [13:44]

Erməni mediası İlham Əliyevin Davosda bir görüşünün nəticələri üzərində həm bu görüşü, həm də Zəngəzur dəhlizində başlanmış praktik işləri qaralamağa başlayıb.

Məsələ belədir ki, ABŞ-ın məşhur AECOM şirkətinin nümayəndələri Zəngəzur dəhlizində tikintinin texniki-iqtisadi əsaslandırmasını hazırlamaq üçün Yerevana gəliblər. Erməni mediası dərhal "axtarışa "başlayıb və dəhlizdə başlanmış prosesi qarışdırmaq üçün mövzu quraşdırıb. Birdən yadlarına prezident İlham Əliyevin bir neçə gün əvvəl Davos İqtisadi Forumunda keçirdiyi bir görüş və imzalanmış bir memorandum düşüb. İlham Əliyev Davosda məşhur ABŞ investisiya şirkəti "Blacrok"un baş direktoru ilə görüşüb və nəticədə bu şirkətlə Azərbaycan Dövlət Neft Fondu arasında Azərbaycana 1,5 milyard dollar sərmayə yatırılması barədə saziş imzalanıb. Erməni mediası burada özü üçün guya böyük bir kəşf edib və iddia edir ki, həmin bu " Blacrok" şirkəti Zəngəzur dəhlizində işə başlamış AECOM şirkətinin səhmlərinin 12 faizinə sahibdir... Buradan da "dahiyanə" bir nəticəyə gəlinir ki, İlham Əliyev Davosda imzaladığı bir sazişə söykənərək Amerika şirkətinin əli ilə Zəngəzur dəhlizində gedən proseslərə təsir göstərəcək və faktiki olaraq Zəngəzur dəhlizində aparılan işlərin iştirakçısına çevriləcək ...Göründüyü kimi, tam bir fobiyanın və pozuculuq niyyətinin üstündə qurulmuş məzmunsuz bir hekayənin içindəyik...

Əvvəla, Əliyevin Davosda danışıq apardığı " Blacrok" şirkətinin AECOM-da hansısa miqdarda səhmə sahib olması biznes fəaliyyətləri çərçivəsində tam mümkün olan şeydir, həm də bunun rəsmi təsdiqi hələ yoxdur..
İkinci, hətta bu rəsmən təsdiqlənsə belə, bunun Zəngəzur dəhlizində birgə Ermənistan- Amerika TRİPP şirkətinin işinə nə dəxli var?

Üçüncü, Zəngəzur dəhlizinin 46 kilometrlik həmin hissəsində Azərbaycanın da iştirakının mümkünlüyünü kim, nə vaxt qadağan edib ki?! Azərbaycanın buna haqqı da var. Çünki əgər Zəngəzur dəhlizinin Füzuli- Zəngilan, Ordubad- Arazdəyən hissəsinin çəkilməsi Azərbaycanın üzərindədirsə, Ermənistanın 46 kilometr ərazisindən keçən hissəsində Azərbaycan niyə də iştirak etməsin?!..Eyni zamanda, 8 avqust Vaşinqton sənədinə görə, ABŞ və Ermənistanın razılıqları əsasında 3-cü tərəf də Dəhlizdə işlərə cəlb oluna bilər. Həmin 3- cü tərəf qismində niyə Azərbaycan olmasın?!..

Nəhayət, bəli, Zəngəzur dəhlizi ilk növbədə böyük geosiyasi və geoiqtisadi layihə olduğu üçün onunla bağlı bütün proseslərdə liderlərin şəxsi uzaqgörənlik məharəti çox vacib amil kimi nəzərə alınmalıdır. Yəni İlham Əliyevin uzaqgörənlik edərək həftələr əvvəl Davosda atdığı bir imza bu nəticələri verirsə, bundan xoflanmaq yox, diplomatik məharətin təzahürü kimi qürurlanmaq lazımdır...

Bacarırsınızsa, siz də uzaqgörən olun...Oyunpozanlıq nə deməkdir...

Aydın Quliyev,

"Bakı-Xəbər" Media Qrupunun rəhbəri, politoloq

Paylaş:

Baxılıb: 711 dəfə