İtaliya Azərbaycanın bir nömrəli tərəfdaşıdır

Bakı:

17 °C

72 %

2 m/s

Əlaqə

AZ RU EN

Ana səhifə / Arxiv / İtaliya Azərbaycanın bir nömrəli tərəfdaşıdır

İtaliya Azərbaycanın bir nömrəli tərəfdaşıdır

07.05.2026 [15:36]

Mayın 4-də İtaliya Nazirlər Şurasının sədri Ciorcia Meloni Azərbaycana səfər etdi. Qeyd edək ki, Azərbaycan-İtaliya əlaqələri qədim köklərə malik olmaqla, müasir dövrdə strateji tərəfdaşlıq səviyyəsinə yüksəlib. İtaliya 1992-ci ilin yanvarında Azərbaycanın müstəqilliyini tanıyıb. Həmin ilin mayında isə iki ölkə arasında diplomatik münasibətlər qurulub. İtaliya Cənubi Qafqazda ilk səfirliyini 1997-ci ildə Bakıda açmışdır. 2003-cü ildə Azərbaycanın İtaliyada səfirliyi açıldı. Ümummilli Lider Heydər Əliyevin 1997-ci ildə İtaliyaya rəsmi səfəri ölkələrimiz və xalqlarımız arasında dostluğun, əməkdaşlığın daha da möhkəmləndirilməsində əhəmiyyətli rol oynadı. Həmin səfər zamanı əlaqələrin inkişafında hüquqi baza rolunu oynayan xeyli sayda sənədlər imzalanıb. O vaxtda iki ölkə arasında siyasi, iqtisadi, ticarət, enerji təhlükəsizliyi, nəqliyyat və kommunikasiyalar, mədəni, humanitar və sair istiqamətlər üzrə çoxşaxəli strateji tərəfdaşlıq münasibətləri quruldu. Ümummilli Lider Heydər Əliyevin siyasi kursunu uğurla davam etdirən Prezident İlham Əliyevin İtaliyaya səfərləri davamlı xarakter almış, hər bir səfər münasibətlərdə yeni səhifənin başlanğıcı olmuşdur. Cənab İlham Əliyev ölkəmizdə səfərdə olan İtaliya Nazirlər Şurasının sədri Ciorcia Meloni ilə mətbuata bəyanatında bildirdi ki, ölkələrimiz strateji tərəfdaşdırlar, 2014-cü və 2020-ci illərdə strateji tərəfdaşlığa dair iki bəyannamə imzalanmışdır. Bizim münasibətlərimizin əsasını təşkil edən bu iki sənəd və sənədlərdə təsbit edilmiş məsələlər bu gün həyatda da öz əksini tapır: “Sizin bu gün Azərbaycanda olmağınız bir daha Azərbaycan-İtaliya əlaqələrinin nə qədər dərin məzmunlu olmasından xəbər verir. Hər kəs bilir ki, Siz bu gün Ermənistanda idiniz. Ermənistanda öz proqramınızı bitirib Azərbaycana gəlmək bizim üçün xüsusi məna daşıyır, çox böyük rəmzi məna daşıyır, eyni zamanda, Azərbaycana göstərilən hörmətin və xoş münasibətin bariz təzahürüdür”.

İki ölkə arasında siyasi əlaqələr ən yüksək səviyyədədir. İtaliya Azərbaycanın bir nömrəli ticarət tərəfdaşıdır. Keçən il ticarət dövriyyəmiz təxminən 12 milyard dollar təşkil etmişdir. Cənab İlham Əliyev əlaqələrimizin əsas istiqamətlərindən birinin energetika sahəsi olduğunu önə çəkərək qeyd etdi ki, burada da biz uzun illər ərzində etibarlı tərəfdaşlar kimi bir-birimizi dəstəkləyirik. Azərbaycan İtaliyanın neft, eyni zamanda, qaz təchizatında ikinci yerdədir. İtaliya bazarı həm neft, həm qaz üzrə birinci dərəcəli əhəmiyyət daşıyır. Keçən il Azərbaycan 25 milyard kubmetr təbii qaz ixrac edib, onun 9,5 milyardı İtaliya bazarına ixrac olunmuşdur. Səfər zamanı danışıqlar əsnasında bu həcmi artırmaq üçün müzakirələr aparıldı. Bunun üçün Cənub Qaz Dəhlizinin tərkib hissəsi olan TAP layihəsinin genişləndirilməsi lazımdır. Artıq müəyyən dərəcədə genişləndirilib. Bu proses davam etdirilməlidir.

İtaliya Nazirlər Şurasının sədri Ciorcia Meloni də vurğuladı ki, birmənalı olaraq, əməkdaşlığımızı hər zaman səciyyələndirən sahələrdən biri enerji sahəsidir. Biz nəinki təchizat həcmləri, xüsusilə bütün sahələr üzrə sənaye tərəfdaşlığının keyfiyyəti üzərində çalışmalıyıq. Bilirik ki, enerji və bağlantılar eyni medalın iki üzüdür. İstərdik ki, Azərbaycan Avropa ilə Asiya arasında fundamental qovşaq rolunu möhkəmləndirsin. İtaliya bu baxımdan Avropa bazarına imtiyazlı giriş qapısı rolunu hər zaman oynamağa hazırdır. Aydındır ki, bu cür plan sərmayələri, uzunmüddətli proqramları, ölkələrimizdə istehsal və sənaye sistemlərimizin ən münasib imkanlarının bir araya gətirilməsini tələb edir. Bu səbəbdən biz 2026-cı ilin ikinci yarısında Bakıda biznes-forum təşkil etməyi planlaşdırmışıq ki, siyasi əməkdaşlığımızı müəssisələrimiz, işçilərimiz üçün konkret fürsətlərə çevirək.

Göründüyü kimi, Azərbaycan-İtaliya münasibətlərinin bütün sahələrdə uğurlu inkişafı üçün geniş imkanlar mövcuddur, tərəflər bunun üçün səylərini daha da artırırlar. Azərbaycan-İtaliya strateji tərəfdaşlığı Cənubi Qafqazda və Avropada sülhə, iqtisadi tərəqqiyə və enerji təhlükəsizliyinə böyük töhfədir.

Etibar Hacıyev

YAP Ağstafa rayon təşkilatının sədri

Paylaş:

Baxılıb: 156 dəfə