Dini-mənəvi dəyərlər və beynəlxalq dialoq

Bakı:

24 °C

94 %

4 m/s

Əlaqə

AZ RU EN

Ana səhifə / Arxiv / Dini-mənəvi dəyərlər və beynəlxalq dialoq

Dini-mənəvi dəyərlər və beynəlxalq dialoq

21.09.2026 [13:10]

Azərbaycanın beynəlxalq dini və mədəni dialoqa verdiyi önəm son illərdə keçirilən mühüm tədbirlərdə özünü aydın şəkildə göstərir. Bakının Türk dünyasının və müxtəlif dini qurumların nümayəndələrinin iştirakı ilə keçirilən toplantılara ev sahibliyi etməsi ölkəmizin bu sahədəki rolunu daha da artırır. Belə bir tədbir çərçivəsində Cənab Prezident İlham Əliyevin Türk Dövlətləri Təşkilatının müsəlman dini idarə rəhbərləri Şurasının üzvlərindən və müşahidəçilərindən, Yəhya Bakuvi Beynəlxalq Konfransının həmtəşkilatçılarından və Qafqaz Xalqları Ali Dini Şurasının üzvlərindən ibarət nümayəndə heyətini qəbul etməsi xüsusi əhəmiyyət daşıyır.

Görüşdə Cənab Prezident İlham Əliyev Bakıda keçirilən Türk Dövlətləri Təşkilatının Müsəlman Dini Rəhbərləri Şurasının 7-ci toplantısının və Seyid Yəhya Bakuviyə həsr olunmuş beynəlxalq konfransın əhəmiyyətindən danışıb. Dövlət başçısı Azərbaycanın zəngin tarixi və mədəni irsini diqqətə çatdıraraq Nizami Gəncəvi, Xaqani Şirvani, İmadəddin Nəsimi, Seyid Yəhya Bakuvi, Şah İsmayıl Xətai və Məhəmməd Füzuli kimi böyük şəxsiyyətlərin xalqımızın mənəvi və intellektual irsində mühüm yer tutduğunu vurğulayıb.

Seyid Yəhya Bakuvinin irsinin beynəlxalq səviyyədə müzakirə olunması Azərbaycan tarixinin və mədəniyyətinin dünyada tanıdılması baxımından mühüm əhəmiyyətə malikdir. Müxtəlif ölkələrdən alimlərin və dini liderlərin iştirak etdiyi konfrans onun fəlsəfi və mənəvi irsinin daha geniş auditoriyaya çatdırılmasına imkan yaradır. Bu, Azərbaycanın öz tarixi şəxsiyyətlərinin irsinə göstərdiyi diqqətin də mühüm ifadəsidir.

Görüşdə Türk dünyasının dini liderləri arasında əməkdaşlığın inkişafı məsələsi də ön plana çıxıb. Türk Dövlətləri Təşkilatı çərçivəsində siyasi, iqtisadi, humanitar və mədəni əlaqələrlə yanaşı, dini-mənəvi sahədə əməkdaşlığın genişləndirilməsi xalqlar arasında tarixi və mənəvi bağların möhkəmlənməsinə xidmət edir. Azərbaycanın tolerantlıq və multikulturalizm ənənələri isə müxtəlif dini konfessiyaların nümayəndələri arasında qarşılıqlı hörmət və anlaşma üçün mühüm əsas yaradır.

Azərbaycanın işğaldan azad edilmiş ərazilərində tarixi və dini irsin bərpası da görüşün diqqət çəkən məqamlarından olub. Qarabağ və Şərqi Zəngəzurda məscidlərin, dini abidələrin və digər mədəni irs nümunələrinin bərpası milli-mənəvi dəyərlərin qorunması baxımından böyük əhəmiyyət daşıyır. Ağdam məscidinin tarixi əhəmiyyətinin vurğulanması bu baxımdan xüsusi önəm kəsb edir.

Cənab Prezident İlham Əliyevin dini liderlərlə görüşü müasir dünyada sülh, qarşılıqlı hörmət və anlaşma dəyərlərinin təşviqi baxımından da əhəmiyyətlidir. Müxtəlif ölkələri və dini qurumları təmsil edən insanların Bakıda bir araya gəlməsi dialoq və əməkdaşlıq imkanlarının genişlənməsinə xidmət edir.

Ümumilikdə, bu görüş Azərbaycanın Türk dünyası və İslam aləmi ilə mənəvi-humanitar əlaqələrin inkişafına verdiyi əhəmiyyəti bir daha göstərir. Bakıda belə tədbirlərin keçirilməsi ölkəmizin zəngin tarixi-mədəni irsinin beynəlxalq səviyyədə tanıdılmasına, dini liderlər arasında əməkdaşlığın möhkəmləndirilməsinə və xalqlar arasında qarşılıqlı anlaşmanın inkişafına mühüm töhfə verir.

Rövşən Əhmədov

YAP Ağcabədi rayon təşkilatının sədri

Paylaş:

Baxılıb: 217 dəfə