Azərbaycan-Bolqarıstan münasibətləri yeni mərhələyə qədəm qoyur

Bakı:

14 °C

77 %

8 m/s

Əlaqə

AZ RU EN

Ana səhifə / Gündəm / Azərbaycan-Bolqarıstan münasibətləri yeni mərhələyə qədəm qoyur

Azərbaycan-Bolqarıstan münasibətləri yeni mərhələyə qədəm qoyur

17.11.2009 [09:55]

ölkələr arasında siyasi-iqtisadi əlaqələrin dərinləşməsi və faydalı əməkdaşlıq üçün əsaslı təməllər yaradılıb
Bolqarıstan hökuməti Azərbaycanın regionda strateji mövqeyinin möhkəmlənməsi və Avropanın enerji təhlükəsizliyinin təmin olunmasında aparıcı dövlətə çevrilməsini nəzərə alaraq ölkəmizlə təmasları intensivləşdirmək niyyətindədir. Rəsmi Sofiya regionda baş verən son prosesləri nəzərə alaraq özünün enerji və karbohidrogen ehtiyatları ilə təmin olunmasında ölkəmizi ən etibarlı tərəfdaş hesab edir. Bolqarıstanın respublikamızla yanacaq nəqli ilə bağlı göstərdiyi səylər öz mühüm nəticəsini verib. Prezident İlham Əliyevin ötən həftə bu ölkəyə səfəri zamanı enerji sahəsində əməkdaşlığa dair imzalanmış saziş Azərbaycan qazının Bolqarıstana ixracını nəzərdə tutur.
Dövlət Neft Şirkəti ilə Bolqarıstanın “Bulqartransqaz” şirkəti arasında imzalanmış sazişə əsasən yaxın müddətdə Azərbaycan qazı bu ölkəyə ixrac olunacaq. Bolqarıstana həcmi 1 milyard kubmetr sıxılmış formada olan qaz çatdırılacaq. Beləliklə, respublikamız ilk dəfə olaraq yanacağı sıxılmış formada Qara dənizdən tankerlər vasitəsilə daşıyaraq Bolqarıstanın Varna limanındakı ərazidə yerləşən qaz sisteminə ötürəcək. Qeyd etmək yerinə düşər ki, maye qazın bu cür nəqlini Norveç, Liviya, Rusiya kimi ölkələr bir neçə ildir həyata keçirir. Beləliklə, Azərbaycan Avropaya qazın nəqlində əsas, tranzit xətlərindən biri kimi, Gürcüstan-Qara dəniz - Bolqarıstan marşrutuna da üstünlük verəcək.
Bolqarıstanla Azərbaycan arasında enerji sahəsində əməkdaşlıq təkcə bu ölkəni yanacaq resursları ilə etibarlı şəkildə təmin etməyəcək, eyni zamanda, respublikamızın diversifikasiya siyasətinin həyata keçirilməsi nəticəsində, digər Şərqi Avropa ölkələri də neft və qaz ehtiyatlarını əldə etmiş olacaqlar. İki ölkə arasında imzalanmış sazişin əsas elementlərindən biri təchizatın şaxələndirilməsidir ki, bu Azərbaycan qazının digər Avropa ölkələrinə də çatdırılmasından ibarətdir. Azərbaycan Bolqarıstana 1 milyard kubmetr həcmində təbii qaz nəql etdikdən sonra həmin kəmərin daha bir marşruta şaxələndirilməsinə - Yunanıstanın qazpaylayıcı sisteminə birləşdirilməsinə çalışacaq. Bu layihə, eyni zamanda, “Cənub dəhlizi”nin reallaşmasını sürətləndirmiş olacaq. Azərbaycan yaxın perspektivdə Bolqarıstanın Burqas limanından Yunanıstanın Aleksandrapolis limanına da qaz ötürə bilər. Bundan sonra yanacağın İtaliya və Avstriyaya, eləcə də, TransAdriatik çoxşaxəli qaz xətti vasitəsilə bir çox ölkələrə nəqlinin reallaşması mümkün sayılır. Avropa İttifaqı ilə enerji sahəsində əməkdaşlığı yeni mərhələdə inkişaf etdirən Azərbaycan enerji daşıyıcılarının nəqlinin şaxələndirilməsi siyasətinə uyğun olaraq Şərqi və Mərkəzi Avropanın bir çox ölkələrini yanacaqla təmin etməyi planlaşdırır. Beləliklə, ölkəmiz Avropa regionunda qaz sistemlərinin birləşdirilməsinə töhfə verməklə öz mövqeyini möhkəmləndirmiş olacaq.
Bolqarıstanla Azərbaycan arasında siyasi-iqtisadi əlaqələrin dərinləşməsi və hər iki ölkə arasında faydalı əməkdaşlıq üçün əsaslı təməllərin yaradılması, birgə yeni layihələrin həyata keçirilməsini zəruri edir. Hazırda iki ölkə arasında ticarət dövriyyəsinin həcmi onların mövcud iqtisadi potensialını əks etdirmədiyindən biznes qurumlarının iştirakı ilə ikitərəfli təmasların gücləndirilməsi vacib hesab olunur. Bolqarıstan ölkəmizin maşınqayırma, kənd təsərrüfatı, mebel sənayesi, metallurgiya, turizm, yüngül və yeyinti sənayesi, məişət mallarının birgə istehsalı üçün müəssisələrin yaradılması və bank sektorunda əməkdaşlıq istiqamətlərini təklif edir. Eyni zamanda, Azərbaycanın qeyri-neft sektorunun aparıcı sahəsi olan informasiya texnologiyaları sahəsində əməkdaşlıq nəzərdən keçirilir. Tərəflər biznes forumlarının keçirilməsinin intensivləşdirilməsini də vacib sayır və hər iki ölkənin biznes strukturları arasında bir çox iqtisadi sahədə əlaqələrin möhkəmləndirilməsini dövlətlərarası əməkdaşlığın ümumi inkişafına mühüm töhfə verəcəyini düşünürlər.
Bolqarıstan prezidenti Georgi Pırvanovla Azərbaycan Prezidenti İlham Əliyev arasında aparılan səmərəli danışıqlar ölkələr arasında siyasi-iqtisadi əlaqələrin dərinləşməsinə və respublikamızın Avropa İttifaqına sıx inteqrasiyanın daha da möhkəmlənməsinə təkan verəcək.

Paylaş:

Baxılıb: 1356 dəfə