Bakı Dövlət Sirkində Yeni il bayramı ərəfəsində hər gün fasiləsiz olaraq maraqlı şou nümayiş etdiriləcək

Bakı:

27 °C

53 %

9 m/s

AZ RU EN

Ana səhifə / Mədəniyyət / Bakı Dövlət Sirkində Yeni il bayramı ərəfəsində hər gün fasiləsiz olaraq maraqlı şou nümayiş etdiriləcək

Bakı Dövlət Sirkində Yeni il bayramı ərəfəsində hər gün fasiləsiz olaraq maraqlı şou nümayiş etdiriləcək

28.12.2017 [09:26]

Mahir Hümbətov: Möhtəşəm şouda əhliləşdirilmiş heyvanların maraqlı nömrələri, illüziya, hava gimnastları, akrobatların çıxışları təqdim ediləcək, o cümlədən Şaxta baba və Qar qız da iştirak edəcək
Artıq bir neçə gündən sonra Azərbaycanın ümumtəhsil məktəblərində qış tətili başlayacaq. Bu günlər ərzində uşaqların asudə vaxtlarını səmərəli keçirmələri üçün Bakı Dövlət Sirki bir-birindən zəngin proqram hazırlayıb. Qurumun mətbuat xidmətinin rəhbəri Mahir Hümbətovun sözlərinə görə, Bakı Dövlət Sirki maraqlı proqram ilə tamaşaçıların qarşısına çıxmağa hazırlaşır. Belə ki, dekabrın 29-dan başlayacaq “Ekstremal qış” adlanan yeni proqramın heyəti Rusiya və Ukrayna sirklərinin artistlərindən ibarətdir. Proqramın ən unikal nömrəsi isə dəmir şar içərisində göstəriləcək moto-şou olacaq: “Tamaşaçıları həmişə yeniliklərlə, qeyri-adi nömrələrlə sevindirən Bakı Dövlət Sirki bu dəfə də ənənəsinə sadiq qalıb. Belə ki, möhtəşəm şouda əhliləşdirilmiş heyvanların maraqlı nömrələri, illüziya, hava gimnastları, akrobatların çıxışları təqdim ediləcək, xüsusi işıq effektlərindən istifadə olunacaq. Yeni il günlərinə təsadüf etdiyi üçün proqramda bayramın rəmzi hesab olunan Şaxta baba və Qar qız da iştirak edəcək. Bir sözlə, sirk şousu qış tətili günlərində hər gün fasiləsiz olaraq nümayiş etdiriləcək”.
Mətbuat xidmətinin rəhbəri bildirib ki, Bakı Dövlət Sirki yalnız balacaların deyil, böyüklərin də sevimli məkanı sayılır. Onun sözlərinə görə, sirk yeganə yerdir ki, insanlar burada gündəlik qayğılardan, problemlərdən uzaqlaşaraq əylənir və özlərini bənzərsiz bir mühitdə hiss edirlər. Sirksevərlərin təbirincə desək, sanki manej üzərində möcüzəvi bir dünya yaradılır.
Yeri gəlmişkən, məlumat üçün bildirək ki, bir müddət öncə “Ağ pələnglər attraksionu” ilə açıq elan edilən yeni mövsümdə təqdim olunan şou proqram paytaxt sakinləri ilə yanaşı, xarici qonaqların da maraq və coşqusu ilə qarşılanıb: “Ağ pələnglər attraksionu” sirk şousuna ağ pələnglər, qeyri-adi illüziya, “İriston” cigitlər qrupu, əhliləşdirilmiş itlər, hava gimnastları, unikal yelləncəkdə akrobatlar, həlqələrlə rəqs, jonqlyor, şən kloun və digər nömrələr daxil idi. 2 saat davam edən şou üçün Rusiya Federasiyasından 40-dan artıq artist heyəti dəvət edilmişdi. Sirk ustaları və heyvanların birgə tryuklarının musiqi ilə ahəngi, bir-birindən parlaq və gözəl geyimlər, gözoxşayan dekorasiya, o cümlədən “İriston” cigitlər qrupunun ifasında nümayiş etdirilən nömrədən sonra Azərbaycan bayrağının dalğalanması gecəni yaddaqalan etmişdi. Qonaqlarımızın sevincini görmək bizdə də ruh yüksəkliyi yaradır və işimizə olan sevgini qat-qat artırır”.
Müşfiqə BAYRAMLI

Paylaş:

Baxılıb: 1152 dəfə