Azərbaycan və Rusiya qarşılıqlı-faydalı münasibətlərin davamlı inkişafında maraqlıdır

Bakı:

17 °C

88 %

4 m/s

Əlaqə

AZ RU EN

Ana səhifə / Siyasət / Azərbaycan və Rusiya qarşılıqlı-faydalı münasibətlərin davamlı inkişafında maraqlıdır

Azərbaycan və Rusiya qarşılıqlı-faydalı münasibətlərin davamlı inkişafında maraqlıdır

12.06.2014 [09:29]

Ekspertlərin qənaətinə görə, Rusiyanın xarici işlər naziri Sergey Lavrov və baş nazirin müavini Dmitri Roqozinin Azərbaycana səfəri iki ölkə arasındakı əməkdaşlıq əlaqələrinin inkişafı, o cümlədən strateji
məsələlərin müzakirəsi baxımından müstəsna əhəmiyyət kəsb edəcək
Cənubi Qafqaz regionunun lider dövləti - güc mərkəzi olan Azərbaycan Respublikası çoxşaxəli beynəlxalq əlaqələrə malikdir. Milli maraqlar və bərabərhüquqlu əməkdaşlıq prinsipi əsasında həyata keçirilən xarici siyasət kursu qarşılıqlı-faydalı əlaqələrə söykənir. Bu kontekstdə ölkəmiz həm region dövlətləri, həm də regiondankənar ölkələrlə səmərəli və qarşılıqlı-faydalı əməkdaşlıq əlaqələrini uğurla davam və inkişaf etdirir. Qeyd edək ki, Azərbaycanın səmərəli əməkdaşlıq əlaqələrinə malik olduğu ölkələrdən biri də Avrasiyanın geosiyasi güc mərkəzlərindən biri olan Rusiya Federasiyasıdır.
Azərbaycanla Rusiya arasındakı münasibətlərin mütəmadi inkişaf tendensiyasına malik olmasını özündə əks etdirən başlıca göstəricilər məhz tərəflər arasındakı əlaqələrin dinamikasıdır. Ümumiyyətlə, Azərbaycan Respublikası ilə Rusiya Federasiyası arasındakı çoxşaxəli münasibətlər və sıx təmaslar müasir beynəlxalq münasibətlər sisteminin mühüm komponentlərindən birini təşkil edir. Dərin təməllərə və tarixi köklərə söykənən, ikitərəfli və çoxşaxəli qarşılıqlı-faydalı əməkdaşlığa əsaslanan tərəfdaşlıq münasibətləri dinamik xarakter daşıyır.
O da vurğulanmalıdır ki, qarşılıqlı səfər və görüşlər iki ölkə arasındakı münasibətlərin inkişafına əhəmiyyətli töhfələr verən amil kimi qiymətləndirilir. Yeri gəlmişkən qeyd edək ki, Rusiyanın xarici işlər naziri Sergey Lavrov və baş nazirin müavini, Rusiya-Azərbaycan hökumətlərarası komissiyasının sədri Dmitri Roqozin bu ay Azərbaycana səfər edəcəklər. Bu barədə Azərbaycan Milli Məclisinin sədri Oqtay Əsədov Rusiya Dövlət Dumasının sədri Sergey Narışkinlə keçirdiyi görüşdə məlumat vermişdi. Ekspertlərin qənaətinə görə, bu səfər də iki ölkə arasındakı əməkdaşlıq əlaqələrinin inkişafı, o cümlədən strateji məsələlərin müzakirəsi baxımından müstəsna əhəmiyyət kəsb edəcək. Qeyd edilir ki, bu cür səfərlər qarşılıqlı-faydalı əməkdaşlığa əsaslanan tərəfdaşlıq münasibətlərinin mütəmadi surətdə inkişaf etməsi və yeni keyfiyyət çalarları ilə zənginləşməsi baxımından olduqca önəmlidir. O da xüsusi olaraq diqqətə çatdırılır ki, iki ölkə arasındakı sıx təmaslar tərəflər arasındakı münasibətlərin inkişafını şərtləndirməklə yanaşı, eyni zamanda, regional əməkdaşlıq və təhlükəsizliyə də mühüm töhfələr verir. Çünki Rusiya-Azərbaycan münasibətləri özündə ehtiva etdiyi strateji çalarlar etibarilə regional təhlükəsizliyin təmin və mühafizə olunmasında önəmli rol oynayır. Mövcud resurs və potensialları ilə həm Azərbaycan, həm də Rusiya regionda təhlükəsizlik sisteminin təminatı baxımından olduqca mühüm təsir imkanlarına malikdir. Həmçinin, Rusiya-Azərbaycan münasibətləri ehtiva etdiyi sahələr və məsələlərə görə çoxşaxəli olmaqla yanaşı, regional miqyaslı, qlobal xarakterli əlaqələr sistemi kimi səciyyələndirilir.
Nəticə etibarilə, çoxşaxəli xarakterli olan və beynəlxalq əməkdaşlığa fundamental töhfələr verən Azərbaycan - Rusiya münasibətləri qarşılıqlı-faydalı səciyyə daşıyır və perspektiv üçün optimist proqnozlar ifadə etməyə imkan verir. Çünki tərəflər qarşılıqlı-faydalı münasibətlərin davamlı inkişafında maraqlıdır.
Nurlan QƏLƏNDƏRLİ

Paylaş:

Baxılıb: 743 dəfə