Azərbaycanda cəmiyyətə və dövlətə təhdid ünsürləri neytrallaşdırılır

Bakı:

25 °C

70 %

15 m/s

Əlaqə

AZ RU EN

Ana səhifə / Siyasət / Azərbaycanda cəmiyyətə və dövlətə təhdid ünsürləri neytrallaşdırılır

Azərbaycanda cəmiyyətə və dövlətə təhdid ünsürləri neytrallaşdırılır

08.12.2015 [09:47]

“Müsəlman birliyi” adlı terrorçu qruplaşmanın məqsədi dövlətin konstitusiya quruluşunun zorla dəyişdirilməsinə nail olmaq idi
Hər bir ölkənin milli təhlükəsizliyi müxtəlif istiqamətlərdə təhdid ünsürlərinin neytrallaşdırılması və neqativ faktorlarla mübarizə metodlarının düzgün müəyyənləşdirilməsindən asılıdır. Azərbaycanda milli təhlükəsizliyin təmin olunmasına konseptual yanaşma mövcuddur və təhdid ünsürləri effektiv vasitələrlə neytrallaşdırılmaqdadır. Xüsusilə də ölkəmizin milli təhlükəsizliyinin təmin olunmasında mühüm rol oynayan strateji amillərdən biri də ictimai-siyasi sabitlikdir. Bu gün Azərbaycan, sözün əsl mənasında, sabitlik adası kimi səciyyələndirilə bilər. Yəni Azərbaycanın milli gücünü artıran əhəmiyyətli amillərdən biri də möhkəm təməllərə söykənən sabitlikdir. Bu məsələdə yerli və xarici ekspertlərin ümumi rəyi odur ki, Azərbaycanda mövcud olan və ardıcıl səciyyə daşıyan sabitliyin əsasında duran başlıca faktor hakimiyyətin həyata keçirdiyi siyasi kursun milli maraqlara tam cavab verməsidir. Ölkəmizdə mövcud olan milli həmrəylik, xalq-iqtidar birliyi də Azərbaycanın milli gücünün artmasında ifadə olunur.
Lakin təəssüflər olsun ki, Azərbaycanın inkişafından narahatlıq duyan bəzi xarici dairələrin əlaltıları ölkəmizdə sabitliyi pozmaq, hətta konstitusiya quruluşunu dəyişmək üçün təxribatçı və illeqal fəaliyyət göstərir, hüquqazidd əməllərə yol verirlər. Təbii ki, bu cür illeqal fəaliyyət müxtəlif adlar altında davam etdirilir. Bu baxımdan, din pərdəsi arxasında çıxış edən terrorçuların fəaliyyətini xüsusi vurğulamaq gərəkdir. Eyni zamanda, din amilindən siyasi-ideoloji vasitə kimi istifadə edən bir sıra ölkələrin də müəyyən maraq və müdaxilələri aydın sezilir. Məhz bu çərçivədə qanunazidd və cəmiyyətdə təşəkkül tapmış dəyərlərə uyğun olmayan təxribatçı hərəkətlərə də rast gəlinir.
Belə ki, respublikada ictimai-siyasi sabitliyi pozmağı, təxribatlar, kütləvi iğtişaşlar, terror aktları törətməyi planlaşdıran və din pərdəsi arxasında fəaliyyət göstərən terrorçu dəstə dövlətin konstitusiya quruluşunun zorla dəyişdirilməsi, şəriət qanunları ilə idarə edilən dini dövlət qurulması məqsədilə “Müsəlman birliyi” adlı hərəkat yaradıblar. Həmçinin paytaxtın Nardaran qəsəbəsində qanunsuz yığıncaqlar keçirərək respublikanın əhalisini hakimiyyətə qarşı qaldırmağın yollarını müzakirə edib, bununla bağlı tərəfdarlarına göstərişlər verib və əhaliyə çağırış vərəqələri paylayıblar. Silahlı cinayətkar dəstənin hər bir üzvünün üzərinə düşən konkret vəzifələr, o cümlədən hakimiyyət nümayəndələrinə qarşı terror aktları törədəcək məsul şəxslər müəyyən edilib.
Terrorçu dəstə başçısı Taleh Bağırov onun ətrafında birləşmiş terrorçular xalqı itaətsizliyə çağırıb, nəzarətlərində olan saytlar və sosial şəbəkələr vasitəsilə hakimiyyət orqanlarını, vəzifəli şəxsləri hədələyib, onlara qarşı ölüm çağırışları ediblər. Qeyd etdiyimiz kimi, Nardaranda bir tərəfdə terrorçular, radikal-ekstremist təfəkkürlü ünsürlər, digər tərəfdə isə onların iddialarını bölüşməyən və buna görə də təhdid və təzyiqlərlə üzləşən insanlar birgə yaşamaq məcburiyyətində qalmışdılar. Bu terrorçu dəstə Nardaran əhalisini qorxu içində saxlayır, sadə insanları yoldan çıxarıb, onların mövqeyini bölüşməyənləri məcburi şəkildə öz iradəsinə tabe etdirərək məkrli niyyətlərini həyata keçirməyə çalışırdı. Onların başlıca məqsədi təhdidlə, zorakı yollarla əhalinin kütləvi şəkildə hakimiyyətə qarşı radikal çıxışlarını təşkil etmək idi.
Yeri gəlmişkən, daxili işlər naziri, general-polkovnik Ramil Usubov Nardaran hadisələri ilə bağlı Azərbaycan Televiziyasına müsahibəsində noyabrın 26-dan etibarən Bakı şəhərinin Nardaran qəsəbəsində “Müsəlman birliyi hərəkatı” adlanan silahlı təşkilatın Azərbaycan dövlətinə və konstitusion quruluşuna qarşı açıq fəaliyyətə başladığını vurğulayıb. Nazir araşdırmalar nəticəsində “Müsəlman birliyi hərəkatı”nın bir ildən artıq müddətdə mövcud olduğunu və əsas məqsədinin qeyri-konstitusion yolla Azərbaycanda hakimiyyətə gəlmək, ölkəmizdə din pərdəsi altında şəriət qanunları ilə idarə edilən dövlət quruluşu yaratmaq olduğunu söyləyib.
Görünən odur ki, dindən siyasi məqsədlər naminə istifadə olunması cəhdləri, bu kontekstdə terrorçuların xidmətlərindən yararlanmaq təcrübəsi indiki mərhələdə xüsusi aktuallıq kəsb edir. Bütövlükdə isə, Bakının Nardaran qəsəbəsində baş verən hadisə din pərdəsi arxasında fəaliyyət göstərən, əslində isə, xarici dairələrin göstərişləri ilə Azərbaycanda ictimai-siyasi sabitliyi pozmaq və qarşıdurma yaratmaq istəyən terrorçuların əsl simasını xalqa açıq nümayiş etdirdi. Bütün hallarda Azərbaycanda dini təhlükəsizlik təmin olunub və dövlət terrorçuların xaos yaratmaq cəhdlərinə izin verməyəcək! Azərbaycan güclü dövlətdir və heç bir qüvvənin ölkədəki sabitliyi pozmaq və müxtəlif qanlı ssenarilər reallaşdırmaq istəyi baş tutmayacaq. Buna cəhd edənlər isə layiqli cəzalarını alacaqlar.
Siyasət şöbəsi

Paylaş:

Baxılıb: 718 dəfə