Azərbaycan Çin ilə strateji tərəfdaşlığın daha da inkişaf etməsində maraqlıdır

Bakı:

22 °C

64 %

6 m/s

Əlaqə

AZ RU EN

Ana səhifə / Siyasət / Azərbaycan Çin ilə strateji tərəfdaşlığın daha da inkişaf etməsində maraqlıdır

Azərbaycan Çin ilə strateji tərəfdaşlığın daha da inkişaf etməsində maraqlıdır

02.06.2016 [10:05]

İyunun 1-də Nazirlər Kabinetində Azərbaycan Respublikasının Baş naziri Artur Rasizadə Çin Kommunist Partiyası Mərkəzi Komitəsinin Siyasi Bürosunun daimi üzvü, Çin Xalq Respublikası Dövlət Şurası Sədrinin birinci müavini Can Qaolinin başçılıq etdiyi nümayəndə heyəti ilə görüşüb.
AZƏRTAC xəbər verir ki, Azərbaycan və Çin arasında bütün sahələrdə qarşılıqlı münasibətlərin səviyyəsini yüksək qiymətləndirən, qarşılıqlı fəaliyyətin bütün mərhələlərində Azərbaycana daim dəstək göstərdiyinə görə Çin rəhbərliyinə təşəkkür edən Artur Rasizadə deyib: “Çin xalqının böyük nailiyyətləri bizi çox sevindirir. Bu nailiyyətlər sayəsində Çin dünyanın aparıcı ölkəsinə çevrilib. Çin Xalq Respublikasının göstəriciləri ilə tanış olarkən dostlarımıza görə qürur hissi keçiririk”.
Ölkələrimiz arasında siyasi münasibətlərin yüksək səviyyədə olduğunu vurğulayan Artur Rasizadə bildirib ki, bu münasibətlər bütün səviyyələrdə daimi əlaqələrə əsaslanır. “Münasibətlərimiz strateji səviyyəyə çatıb. Biz onların saxlanılmasında və daha da inkişaf etdirilməsində çox maraqlıyıq” - deyən Baş nazir əmin olduğunu bildirib ki, Çin nümayəndə heyətinin bu səfəri ölkələrimiz arasında ikitərəfli strateji əməkdaşlığın möhkəmlənməsinə xidmət edəcək.
Ölkə iqtisadiyyatının sürətli inkişafından danışan A.Rasizadə energetika sahəsində Azərbaycanın iştirakı ilə həyata keçirilən layihələri, Yeni İpək Yolu çərçivəsindəki layihələri xüsusi qeyd edib. Baş nazir deyib: “Biz Çin Xalq Respublikasının təşəbbüsü olan bu möhtəşəm layihənin etibarlı vəsiləsi olmaq üçün hər cür səy göstərəcəyik”.
Neft layihələrinin həyata keçirilməsindən əldə olunan vəsaitin infrastrukturun inkişafına yönəldilməsi barədə məlumat verən A.Rasizadə deyib ki, hazırda Azərbaycan qeyri-neft sektorunun inkişafına böyük diqqət yetirir. Baş nazir Çin sərmayədarlarını Azərbaycanın qeyri-neft sektorunun inkişafında iştiraka dəvət edərək vurğulayıb ki, mövcud infrastruktur bu sektoru inkişaf etdirməyə imkan verir.
Azərbaycan torpaqlarının Ermənistan tərəfindən işğalının davam etdiyini, çoxlu sayda qaçqın və məcburi köçkünün olduğunu xatırladan Baş nazir deyib: “Münaqişənin beynəlxalq hüquq əsasında sülh yolu ilə həllində biz hamıdan çox maraqlıyıq. Təəssüf ki, qarşı tərəfin mövqeyi buna mane olur. Zəmanəmizdə separatizm bütün dünyaya təhlükədir”.
Baş nazir əmin olduğunu bildirib ki, bu səfər Azərbaycan ilə Çin arasında strateji tərəfdaşlığın inkişafına yeni təkan verəcək.
Çin Kommunist Partiyası Mərkəzi Komitəsinin Siyasi Bürosunun daimi üzvü, Çin Xalq Respublikası Dövlət Şurası Sədrinin birinci müavini Can Qaoli bildirib ki, Bakıya ilk dəfədir gəlir. Simasında tarixiliyin və müasirliyin harmoniyasını gördüyü Bakının gözəlliyi onda güclü təəssürat oyadıb. Səmimi qəbula və gözəl təşkilatçılığa görə Azərbaycan Prezidentinə, Baş nazirə və Azərbaycan Hökumətinə təşəkkür edən qonaq deyib: “Çin hökuməti bütün sahələrdə Azərbaycan ilə əlaqələrin inkişafına böyük əhəmiyyət verir”.
Qonaq Çin ilə Azərbaycan arasında əməkdaşlığın gələcəyi, iqtisadi-ticari əlaqələrin perspektivləri barədə fikirlərini bölüşüb.
Görüş çərçivəsində Azərbaycan Respublikasının Dövlət Neft Şirkəti və Çin Milli Neft Korporasiyası arasında neft-qaz və neft-kimya sektorlarında əməkdaşlığa dair qarşılıqlı anlaşma haqqında Memorandum imzalanıb. Sənədi Azərbaycan Respublikasının Dövlət Neft Şirkətinin prezidenti Rövnəq Abdullayev və Çin Milli Neft Korporasiyasının vitse-prezidenti Vang Şi Honq imzalayıblar.
Sonra Azərbaycan Respublikasının Hökuməti və Çin Xalq Respublikasının Hökuməti arasında texniki-iqtisadi əməkdaşlıq haqqında Saziş imzalanıb. Sənədi Azərbaycan Respublikasının Baş nazirinin müavini Abid Şərifov və Çinin Kommersiya Nazirliyinin beynəlxalq ticari danışıqlarda nümayəndəsi, kommersiya nazirinin müavini Cun Şan imzalayıblar.

Paylaş:

Baxılıb: 624 dəfə