Bahar Muradova: Bu kimi hərəkətə yol verənləri Lapşinin taleyinin gözləməsi birmənalıdır

Bakı:

29 °C

58 %

6 m/s

Əlaqə

AZ RU EN

Ana səhifə / Siyasət / Bahar Muradova: Bu kimi hərəkətə yol verənləri Lapşinin taleyinin gözləməsi birmənalıdır

Bahar Muradova: Bu kimi hərəkətə yol verənləri Lapşinin taleyinin gözləməsi birmənalıdır

09.02.2017 [09:04]

Milli Məclisin sədr müavini Bahar Muradova Dağlıq Qarabağa qanunsuz səfər edən Aleksandr Lapşinin Azərbaycana ekstradisiya edilməsini haqqın, ədalətin, hüququn qələbəsi adlandırıb.
Sədr müavini “Modern.az”a açıqlamasında kimliyindən asılı olmayaraq hamının qanun qarşısında cavabdeh olduğunu bildirib: “Lapşinin Azərbaycanın ərazi bütövlüyünü şübhə altına alan, separatçılığı dəstəkləyən çıxışlarına görə haqqında cinayət işi açılması və onun ölkəmizə ekstradisiya edilməsi hər şeydən əvvəl beynəlxalq hüququn, haqqın, ədalətin qələbəsidir. Hansı ölkəyə mənsubluğundan və hansı ölkəyə qarşı cinayət törətməsindən asılı olmayaraq, bu, hər kəsə şamil edilməlidir. Son dövrlər dünya düzəni tamamilə pozulub. Beynəlxalq hüquq, onun prinsipləri, ölkələrin ərazi bütövlüyü, suverenliyi, müstəqilliyi nəinki şübhə altına alınır, hətta onun pozulması istiqamətində açıq-aşkar fəaliyyətlər göstərilir. Ölkələr, xalqlar, sadə vətəndaşlar bundan zərər çəkirlər”.
Vitse-spiker hazırda dünyanın çox ciddi təhlükələrlə üz-üzə olduğunu qeyd edib: “Qanunsuzluğun hüququ, ədalətsizliyin ədaləti üstələməsi, cinayətlərin artması, cinayətkarların məsuliyyətdən yayınaraq cəzasız gəzməsi o qədər adiləşməkdədir ki, indiki məqamda Lapşinin Azərbaycana ekstradisiya olunması qeyri-adi hadisə effekti doğurub. Hesab edirəm ki, bu, çox normal, təbii, hüquqa söykənən qərardır. Hər kəs bunu belə qəbul etməlidir”.
B.Muradova bu ekstradisiyanın iki ölkə arasında bağlanmış hüquqi sənədlərə əsaslandığını vurğulayıb: “Bu günlərdə belə bir məlumat oxudum ki, Ukrayna vətəndaşına qarşı cinayət törətmiş Azərbaycan vətəndaşı həmin ölkəyə ekstradisiya olunub. Bu, ölkələr arasında imzalanan sənədlərə əsasən həyata keçirilir. Ona görə də bu kimi hallar birinin digərinə qarşı simpatiyası kimi qiymətləndirilməməlidir. Hesab edirəm ki, Belarus hüquq-mühafizə orqanları çox obyektiv bir qərar qəbul ediblər. Əminəm ki, qərar indiyə qədər bu kimi hərəkətlərə yol vermiş və yol vermək niyyətində olanları həmin addımı atmazdan əvvəl düşünməyə vadar edəcək. Ekstradisiya, eyni zamanda, dünya üzrə bu kimi hərəkətlərə qarşı uyğun mövqeni sərgiləməyə çağırış, mesaj olaraq qəbul edilməlidir. Çünki ola bilməz ki, bir ölkədə cinayət törədib digərində gizlənəsən, eyni zamanda, başqa bir ölkənin vətəndaşlığını əlində qalxan edəsən və beynəlxalq hüququ da ayaqlar altına atasan. Ona görə də hesab edirəm ki, bu, Azərbaycan diplomatiyasının, Azərbaycan hüquq-mühafizə orqanlarının uğuru, cənab Prezident İlham Əliyevin müstəqil siyasi iradəsinin və Dağlıq Qarabağa yönəlmiş hüquqazidd hərəkət edənlərə qarşı göstərdiyi birmənalı mövqeyin nəticəsidir. Ona görə də bu kimi hərəkətə yol verənləri Lapşinin taleyinin gözləməsi birmənalıdır”.
Bahar Muradova bu ekstradisiyadan sonra Ermənistan tərəfinin narahatlığının başadüşülən olduğunu deyib: “Ermənistan nəinki təcavüzkar siyasət yeridir, eyni zamanda, Azərbaycan torpaqlarını işğal altında saxlayır, insanları yerindən-yurdundan didərgin salıb, onların ən fundamental hüquqlarını pozub, humanitar fəlakətə düçar edib. Üstəlik də qeyri-qanuni zəbt etdikləri ərazilərin tanıdılması istiqamətində beynəlxalq aləmdə çox fəal şəkildə iş aparmaqdadırlar. Ermənilər indiyə qədər göstərdikləri fəaliyyətin təkcə Lapşinin Azərbaycana ekstradisiya edilməsi ilə bir anda göyə sovrulduğunun fərqindədirlər. Narahatlıqları anlaşılandır və narahat olmalıdırlar da”.

Paylaş:

Baxılıb: 604 dəfə