Əli Əliyevin ucuz populyarlıq qazanmaq cəhdi

Bakı:

26 °C

64 %

6 m/s

Əlaqə

AZ RU EN

Ana səhifə / Siyasət / Əli Əliyevin ucuz populyarlıq qazanmaq cəhdi

Əli Əliyevin ucuz populyarlıq qazanmaq cəhdi

07.09.2021 [09:07]

Bu gün Azərbaycan dünyada güclü və nüfuzlu dövlət kimi tanınır. Prezident İlham Əliyevin rəhbərliyi ilə həyata keçirilən siyasət ölkəmizin milli gücünün daha da artmasını təmin edib. Xüsusilə də, 44 günlük müharibədə möhtəşəm qələbə qazanan Azərbaycan yeni reallıqlar yaradıb. Vurğulamaq lazımdır ki, 30 ilə yaxın müddət ərzində işğaldan əziyyət çəkən Azərbaycan dövləti bütün sahələrdə inkişafa hədəflənən uğurlu siyasət həyata keçirməklə tarixi Zəfərə nail olub.
Bunlarla yanaşı, ölkəmiz qlobal problemlərin həllində beynəlxalq həmrəyliyin və əməkdaşlığın təmin olunmasına mühüm töhfələr verir. Yeri gəlmişkən, öz siyasətini daim milli maraqlar və meydana çıxan yeni qlobal çağırışlar əsasında quran Azərbaycan dövləti koronavirus pandemiyasına qarşı mübarizə çərçivəsində də əhəmiyyətli addımları ilə seçilir. Ölkəmizin təşəbbüsü ilə 2020-ci ilin aprelində Türk Şurasının, 2020-ci ilin mayında Qoşulmama Hərəkatının Zirvə toplantıları və 2020-ci ilin dekabrında BMT Baş Assambleyasının dövlət və hökumət başçıları səviyyəsində Xüsusi sessiyası keçirilib. Respublikamızın qlobal pandemiyaya qarşı beynəlxalq həmrəyliyin möhkəmləndirilməsinə yönələn səylərindən biri isə dünya miqyasında vaksinlərin ədalətli bölüşdürülməsi ilə bağlıdır. Azərbaycan bəhs olunan problemin həlli məqsədilə bu ilin martında Qoşulmama Hərəkatı adından BMT-nin İnsan Hüquqları Şurasında bütün ölkələrin peyvəndlərə bərabər və universal çıxışının təmin edilməsi ilə bağlı qətnamə irəli sürüb və həmin qətnamə cari ilin mart ayında yekdilliklə qəbul olunub.
Digər tərəfdən, ölkəmiz ikitərəfli və çoxtərəfli münasibətlərini uğurla inkişaf etdirməklə yanaşı, beynəlxalq təşkilatlarda da müvəffəqiyyətlə təmsil olunur. Bütün bunlar Azərbaycanın beynəlxalq mövqeyinin daha da güclənməsini təmin edir.
Təəssüfləndirici haldır ki, son dövrlərdə gündəmə gəlmək üçün sosial şəbəkələrdə müxtəlif mövzularda manipulyasiyalar edən bəzi “siyasətçi”lər bütün bu müsbət reallıqları təhrif etməyə, ictimai rəyi yanıltmağa çalışırlar. Onlardan biri də Vətəndaş və İnkişaf Partiyasının (VİP) sədri Əli Əliyevdir.
Qərəzli və qeyri-obyektiv fikirlərlə ucuz populyarlıq qazanmağa çalışan Ə.Əliyev konkret olaraq xalqı aldatmağa cəhd göstərir. Məsələn, özünü “peşəkar siyasətçi” kimi qələmə verməyə çalışan bu şəxs Azərbaycanın çoxvektorlu və milli maraqlara söykənən xarici siyasət kursu nəticəsində beynəlxalq müstəvidə qazandığı nailiyyətlərə kölgə salmağa çalışır. O, bu məqsədlə yalanlar danışır, gülünc iddialar səsləndirir. Lakin Ə.Əliyevə də məlumdur ki, bu gün Azərbaycanın qətiyyətli xarici siyasət kursu müttəfiqlərimiz olan dövlətlərlə münasibətlərin ən yüksək səviyyəyə çatmasını, o cümlədən ölkəmizin dünya siyasətində etibarlı tərəfdaş qismində qəbul olunmasını təmin edib. Eyni zamanda, Azərbaycanın dostlarının və tərəfdaşlarının sayı artıb. Əli Əliyevin bu məsələdə pafoslu “fikir”ləri - absurd iddiaları isə yalnız siyasi sayıqlamalardan ibarətdir.
Digər tərəfdən, iki ilə yaxındır ki, dünyanı cənginə almış koronavirus pandemiyasına “inanmadığını” deyən, bu xəstəliklə mübarizədə ən effektiv vasitə sayılan peyvəndləməyə qarşı kampaniya aparan Əli Əliyevin reallıqdan uzaq açıqlamaları ziyanlı olduğu qədər də təhlükəlidir. Bu şəxs anlamır ki, onun “həkim” olaraq verdiyi “məsləhət”lər yoluxmanın və xəstəlikdən ölüm sayının artdığı bir zamanda əsl məsuliyyətsizlik nümunəsidir. O, bu cür təxribatçı mövqe sərgiləməklə birbaşa vətəndaşların sağlamlığını hədəfə alır.
Göründüyü kimi, Ə.Əliyev sosial şəbəkələrdə bəsit yalanlar söyləməklə - absurd iddialar səsləndirməklə ictimai rəyi yanıltmağa, insanları aldatmağa çalışır. Bu isə cəmiyyətdə ikrah hissi ilə qarşılanır.
Pərviz SADAYOĞLU

Paylaş:

Baxılıb: 602 dəfə